Números
24 Ora biʼyaʼ Balaam riuulaʼdxiʼ Jehová cuʼ ndaayaʼ Israel, maʼ qué ñebe sti biaje niyúbibe ñúnibe dañu laacaʼ, sínuque bidxiguetalube ne biiyadxibe neza lu desiertu. 2 Gundisalú Balaam ne biiyaʼ nucuí Israel ca yoo de lari stiʼ pur tribu. Óraque beeda espíritu stiʼ Dios luguiabe. 3 De raqué, guniʼbe proverbio* riʼ:
«Ca diidxaʼ stiʼ Balaam xiiñiʼ Beor,
ca diidxaʼ stiʼ ti hombre ni maʼ bixhélecabe lú.
4 ca diidxaʼ stiʼ tuuxa ni runadiaga ca diidxaʼ stiʼ Dios,
ni gupa ti visión stiʼ Dios ni jma napa poder.
ni gutagudaa ne zuxeleʼ ca bizalú:
5 ¡Pabiáʼ sicarú ca yoo de lari stiluʼ, lii, Jacob!
¡Pabiáʼ sicarú ca tabernáculo stiluʼ, lii, Israel!
6 Guizáʼ ribiaacani casi ca valle,*
casi jardín ni nuu cueʼ guiiguʼ,
casi yaga áloe* ni maʼ bizuhuaa Jehová,
casi cedru ni zuhuaa gaxha de nisa.
7 Cayaba gota nisa ni daʼ ndaaniʼ guiropaʼ bolsa de guidi stibe
ne riaba semiá* stibe gaxha de ra nuu ziáʼ nisa.
Jma nadipaʼ zaca rey stibe que Agag
ne zasaca reinu stibe.
8 Cabee Dios laabe de Egipto.
Zeeda gaca Dios para laabe casi ca cachu stiʼ ti toro guiʼxhiʼ.
Zunduuxebe ca guidxi ni cayuniná laabe,
záʼsabe ca dxitaládicaʼ ne zunidebe cani né ca flecha stibe.
9 Ratagudaabe, ne ráʼtabe casi ti lión,
ne, casi ti lión, ¿tu laa gacalaʼdxiʼ gucaalú laame yaʼ?
Guiaba ndaayaʼ luguiáʼ ca ni uguu ndaayaʼ lii
ne guiaba maldición luguiáʼ ca ni guni maldecir lii».
10 Óraque bidxiichiné Balac Balaam. Dede cagapanáʼ Balac cadxiichi ne gúdxibe Balaam: «Bisendacaaʼ lii para guni maldecirluʼ ca enemigu stinneʼ, peru lugar de nga maʼ guluuluʼ ndaayaʼ laacabe guionnaʼ biaje riʼ. 11 Biguetaʼ ra lídxiluʼ nagueendaca. Rabeʼ ndaʼ nudieeʼ lii stale cosa risaca, peru, biaa, qué nudii Jehová lugar nicaaluʼ cani».
12 Para bicabi Balaam Balac: «¿Cadi maca gudxeʼ ca hombre ni biseendaluʼ que 13 “Neca nudii Balac naa lidxi dxátipa de plata ne oro, qué zanda diʼ guneʼ de naa siaʼ* xiixa cosa galán o xiixa cosa malu aparte de ni maʼ biʼniʼ mandar Jehová naa guneʼ” la? ¿Cadi gudxeʼ laacabe “Ni gabi si Jehová naa nga ni zanda guinieeʼ” la? 14 Yanna maʼ chaaʼ xquidxeʼ. Peru ante la? gudáʼ ne bidii lugar gabeʼ lii xi chiguni guidxi riʼ xquídxiluʼ despué».* 15 Ngue runi gúdxibe laa proverbio riʼ:
«Ca diidxaʼ stiʼ Balaam xiiñiʼ Beor,
ca diidxaʼ stiʼ ti hombre ni maʼ bixhélecabe lú,
16 ca diidxaʼ stiʼ tuuxa ni runadiaga ca diidxaʼ stiʼ Dios,
ni maʼ bisiidiʼ Dios ni nuu jma luguiáʼ* laa;
ni gupa ti visión stiʼ Dios ni jma napa poder
laga ziyatagudaa ne zuxeleʼ ca bizalú:
17 zuuyaʼ laabe, peru cadi nagasi;
zuuyadxiéʼ laabe, peru cadi yanna.
Zaree ti beleguí de Jacob
ne de Israel ziasa ti bastón stiʼ rey.
Dxandíʼ peʼ zandaabe lucuá* Moab
ne bichuga ique guiráʼ ca ni riuulaʼdxiʼ guendaridinde.
18 Zaca stibe Edom,
ya, zaca stiʼ ca enemigu stiʼ Seír laa,
peru Israel la? zusihuinni naca nadxibalú.
19 Ne tuuxa ni biree de Jacob zuni dominar xcaadxi
ne zunduuxebe guiráʼ ca ni bilá ndaaniʼ guidxi ca».
20 Ora biʼyaʼ Balaam Amalec, guníʼrube proverbio ni maca caniʼbe que:
«Amalec nga primé de lade guiráʼ guidxi,
peru últimu la? zati Amalec».
21 Ora bíʼyabe ca quenita, guníʼrube proverbio ni maca caniʼbe que:
«Naguidxi zuhuaa lídxiluʼ ne zuhuaa lídxiluʼ lu ti guié ngola.
22 Peru zuzaaquiʼ tuuxa Cayín.
¿Xpabiáʼ cayaadxaʼ para guinaazeʼ Asiria lii ne chiné lii yaʼ?».
23 Ne guníʼrube proverbio ni maca caniʼbe que:
«¡Ay! ¿Tuu ndiʼ guilá ora guni Dios ndiʼ pue?
24 Zeedandá barcu ni zeeda de ruaa nisadóʼ stiʼ Kitim,
ne zuninácani Asiria
ne zuninácani Éber.
Peru laabe laaca zanitilube».
25 Óraque biasa Balaam ne biguetaʼ zeʼ xquidxi. Balac laaca biree zeʼ lu neza stiʼ.