Guiropa libru de Crónicas
27 Napa Jotán 25 iza dxi guca rey, ne biʼniʼ mandarbe 16 iza Jerusalén. Jñaabe nga Jerusá xiiñiʼ Sadoc. 2 Biʼniʼ Jotán ni jneza nezalú Jehová casi peʼ biʼniʼ bixhózebe Uzías. Xi si la? laabe qué nichuube ndaaniʼ templu stiʼ Jehová. Peru ca binni guidxi que qué nusaanacaʼ de ñúnicaʼ cosa malu. 3 Bíʼnibe Puertaʼ Nasoo stiʼ lidxi Jehová ne bíʼnibe stale obra lu muru ni nuu Ofel. 4 Laaca bíʼnibe guidxi lade ca dani stiʼ Judá, ne gundísabe muru ne bicuibe torre ca lugar ra nuu stale yaga.* 5 Gudindenebe rey stiʼ ca ammonita, ne últimu, biʼniʼ ganarbe laacaʼ. Ngue runi iza que bidii ca ammonita laabe ti gayuaa talentu* de plata, chii mil coro* de trigu ne chii mil de cebada. Guiropa ne guionna iza que, laaca biáʼqueca gudixe ca ammonita laabe. 6 Zaqué nga beeda gaca Jotán ti rey guizáʼ nadipaʼ, purtiʼ gudixhe íquebe sabe lu ca neza stiʼ Jehová, Dios stibe.
7 Xcaadxi cosa ni bizaaca Jotán, guiráʼ ca guerra ni guyebe ne guiráʼ ni bíʼnibe, zeedacani lu Libru stiʼ ca Rey stiʼ Israel ne stiʼ Judá. 8 Nápabe 25 iza dxi gúcabe rey, ne biʼniʼ mandarbe 16 iza Jerusalén. 9 Guti Jotán ne bicaachicabe laabe ndaaniʼ Xquidxi David ne yanna maʼ caziiláʼdxibe casi caziilaʼdxiʼ ca bixhozebiidabe.* Ne maʼ xiiñibe Acaz beeda gaca rey.