Guiropa libru de Crónicas
12 Dxi maʼ naca reinu stiʼ Rehoboam nadipaʼ ne maʼ nácabe ti rey risaca, maʼ qué ninándabe Ley stiʼ Jehová ne zaqueca biʼniʼ guidubi guidxi Israel. 2 Ante gusaa Rehoboam gaayuʼ iza de cayuni mandar, gudxiʼbaʼ Sisac, rey stiʼ Egipto, para gucaalú Jerusalén, purtiʼ bidxiidéchecabe* Jehová. 3 Dede ndaaniʼ guidxi Egipto bireenebe ti mil chupa gayuaa carru* ni rié lu guerra, sesenta mil hombre ni riguiʼbaʼ caballu ne guizáʼ stale soldadu de Libia, Etiopía ne ca sukiyim bieeguʼ laabe. 4 Yechuube ndaaniʼ ca guidxi nadipaʼ* stiʼ Judá dede yendabe Jerusalén.
5 Cumu cadxibi Rehoboam ne ca príncipe stiʼ Judá Sisac la? bidxíñacabe Jerusalén, raqué nuucabe ora beeda profeta Semaya ne ná rabi laacabe: «Ndiʼ nga ni ná Jehová: “Cumu maʼ bisaanatu naa la? nga runi, naa laaca maʼ bisaanaʼ laatu lu náʼ Sisac”». 6 Ora binadiaga rey que ne ca príncipe stiʼ Israel ca diidxaʼ riʼ, biuubaʼ ladxidoʼcaʼ* ne nacaʼ: «Jneza ni runi Jehová». 7 Ora biʼyaʼ Jehová cayuubaʼ ladxidóʼcabe, gudxi Jehová ca diidxaʼ riʼ Semaya: «Maʼ biiyaʼ cayuubaʼ ladxidóʼcabe. Nga runi qué zuniteluáʼ laacabe, ne maʼ cadi candaa zulaʼyaʼ laacabe. Qué zaquiiñeʼ Sisac para gusihuinneʼ xiana stinneʼ luguiáʼ Jerusalén. 8 Peru zúnicabe xhiiñabe, ne zánnacabe maʼ gadxé nga gúnicabe dxiiñaʼ stinneʼ que gúnicabe xhiiñaʼ ca rey* stiʼ xcaadxi guidxi».
9 Para guyé* Sisac, rey stiʼ Egipto, yegucaalú Jerusalén. Zinebe guiráʼ ca tesoro ni nuu ra lidxi Jehová ne ca tesoro ni nuu ra lidxi* rey que. Zinebe guirani, dede né ca escudu de oro ni bizáʼ Salomón. 10 Ngue runi bizáʼ rey Rehoboam caadxi escudu de cobre lugar stícani ne bisigápabe cani ca xaíque stiʼ ca guardia* ni rapa entrada ra lidxi rey que. 11 Cada cheʼ rey que ra lidxi Jehová redané ca guardia que ca escudu que ne despué rudxiguétacabe cani ndaaniʼ ca cuartu stiʼ ca guardia que. 12 Cumu biuubaʼ ladxidóʼ* rey que la? biete xiana stiʼ Jehová ne maʼ qué nunduuxeʼ laacabe. Ne purtiʼ rúniruʼ ca binni de Judá caadxi cosa galán.
13 Guizáʼ nadipaʼ beeda gaca reinu stiʼ Rehoboam ndaaniʼ guidxi Jerusalén ne biʼniʼ mandarbe xcaadxi iza; nápabe 41 iza dxi beeda gácabe rey, ne biʼniʼ mandarbe 17 iza Jerusalén, guidxi ni gulí Jehová lade ca tribu stiʼ Israel para gusisácacabe lá. Jñaa Rehoboam nga Naamá, ammonita que. 14 Peru bíʼnibe ni cadi jneza purtiʼ qué nuyúbibe Jehová de guidubi ladxidoʼbe.
15 Xcaadxi cosa ni bizaaca Rehoboam, de primé ne últimu ni bizaacabe lu xquendanabánibe, cá cani lu ca registru stiʼ ca familia ni bicaa profeta Semaya ne Idó, hombre ni ricaa visión que. Ne siempre gudindesaa Rehoboam ne Jeroboán. 16 Guti Rehoboam ne bicaachicabe laabe ndaaniʼ Xquidxi David ne yanna maʼ caziiláʼdxibe casi caziilaʼdxiʼ ca bixhozebiidabe. Ne maʼ xiiñibe Abías beeda gaca rey.