Guiropa libru de Crónicas
13 Dxi mayaca gusaa Jeroboán 18 iza de cayuni mandar, beeda gaca Abías rey stiʼ Judá. 2 Biʼniʼ mandarbe chonna iza Jerusalén, jñaabe nga Micaya xiiñiʼ Uriel de Guibeá. Nabé gudindesaa Abías ne Jeroboán.
3 Para biree Abías zitindené Jeroboán ne zinebe tapa gayuaa mil soldadu nadipaʼ ne ni nanna tinde.* Ne bizuhuaa chaahuiʼ Jeroboán ca xpinni para gucaalú laabe, xhono gayuaa mil hombre ni nanna tinde* ne nadipaʼ. 4 Para yeguzuhuaa Abías lu dani Zemaraim, ni nuu lade ca dani stiʼ Efraín, ne guníʼ: «¡Jeroboán ne guidubi guidxi Israel, lagucaadiaga naa! 5 ¿Ñee qué gánnatu maʼ biʼniʼ Jehová, Dios stiʼ Israel, ti acuerdu de zidi* né David para cadi gusaana de guni mandarbe, laabe ne ca xiiñibe, guidxi Israel la? 6 Peru Jeroboán xiiñiʼ Nebat, mozo stiʼ Salomón, xiiñiʼ David, bicaalú rey stiʼ. 7 Ridxaaga caadxi hombre ni qué gapa dxiiñaʼ ne qué iquiiñeʼ laabe. Ne ora bicaalúcabe Rehoboam xiiñiʼ Salomón, biʼniʼ ganárcabe laa, purtiʼ nahuiiniʼ Rehoboam, ridxibi ne qué ñapa valor para nucaalú laacabe.
8 »Ne yanna rábitu zanda gucaalutu reinu stiʼ Jehová ni nuu lu náʼ ca xiiñiʼ David purtiʼ si jma stáletu ne purtiʼ nápatu ca yuzehuiiniʼ de oro ni bizáʼ Jeroboán para guni adorartu la? 9 ¿Ñee cadi laatu nga guládxitu ca sacerdote stiʼ Jehová, ca ni zeeda de familia stiʼ Aarón, ne guládxitu ca levita la? ¿Ne cadi laatu nga gulitu ca sacerdote stitu, casi runi ca binni de xcaadxi guidxi la? Tutiica guedané ti yuzehuiiniʼ ne gadxe dendxuʼ barracu rúnitu laa sacerdote para ca dios ni cadi dxandíʼ dios laacaʼ. 10 Peru laadu la? Jehová nga Dios stidu ne qué huasaanadu laabe; ca sacerdote stidu ni zeeda de familia stiʼ Aarón cayúnicaʼ xhiiñaʼ Jehová ne cayacané ca levita laacabe. 11 Guiráʼ siadóʼ ne huadxí rúnicabe guʼxhuʼ né ca ofrenda ni ruzaaquicabe para Jehová ne laaca ruzaaquicabe inciensu* rindáʼ naxhi, ne ruuyacabe cadi guiaadxaʼ pan ni raʼtaʼ pur capa* lu mexaʼ de oro puru que, ne guiráʼ huadxí rucaaguícabe candelabru de oro ne ca lámpara stini. Cayúnidu guiráʼ ni naquiiñeʼ gúnidu para Jehová, Dios stidu, peru laatu maʼ bisaanatu laabe. 12 ¡Laguuyaʼ! Nuuné Dios ni dxandíʼ laadu, zanírube ludu né ca sacerdote stibe ni chiguxhidxi ca trompeta naazecaʼ ti gánnadu pora gucáʼludu laatu. Hombre de Israel caʼ, cadi gucaalutu Jehová, Dios stiʼ ca bixhozebiidatu,* purtiʼ qué zuni ganartu».
13 Peru gudixhe Jeroboán ti trampa para gucaalú laacabe neza déchecabe. Bizuhuaabe ejércitu stibe nezalú ca hombre de Judá ne biseendabe xcaadxi soldadu chuʼ laacabe neza déchecabe. 14 Ora bidxiguetalú ca hombre de Judá que, bidiicaʼ cuenta caquiiñeʼ tindenecaʼ ca soldadu ni zuhuaa nezalucaʼ ne ca ni zuhuaa neza déchecaʼ. Ngue runi bizulú canábacaʼ Jehová gacané laacaʼ ne guizáʼ reciu cuxhidxi ca sacerdote que ca trompeta naazecaʼ. 15 Óraque bicaa ca hombre de Judá ti ridxi nadipaʼ para tíndecaʼ. Ora bicaa ca hombre de Judá ridxi que, biʼniʼ ganar Dios ni dxandíʼ Jeroboán ne guiráʼ ca hombre de Israel nezalú Abías ne ca hombre de Judá. 16 Bixoñelú ca israelita de ca hombre de Judá peru bisaana Dios laacaʼ lu nácabe. 17 Guizáʼ stale de laacabe biiti Abías ne ca xpinni; guti gaayuʼ gayuaa mil hombre de Israel ni nanna tinde.* 18 Zaqué nga bisituícabe lú ca hombre de Israel dxi que, peru ca hombre de Judá la? biʼniʼ ganarcaʼ purtiʼ gúpacaʼ confianza Jehová, Dios stiʼ ca bixhozebiidacaʼ. 19 Ne guzananda Abías Jeroboán ne gúxhabe laa ca guidxi riʼ: Betel ne ca guidxihuiiniʼ nuu gaxha de laani, Jesaná ne ca guidxihuiiniʼ nuu gaxha de laani, ne Efrén ne ca guidxihuiiniʼ nuu gaxha de laani. 20 Ne maʼ qué nibiguetaʼ ñaca Jeroboán ti rey nadipaʼ biaʼ tiempu biʼniʼ mandar Abías; despué biiti Jehová laabe.
21 Peru Abías la? ziyaca ti rey nadipaʼ. Beeda gápabe 14 xheelabe, 22 xiiñibe hombre ne 16 xiiñibe gunaa. 22 Xcaadxi cosa ni bizaaca Abías —ca cosa ni bíʼnibe ne ni guniʼbe— zeedacani lu ca registru ni bicaa profeta Idó.