Guiropa libru de Crónicas
33 Napa Manasés 12 iza dxi guca rey, ne biʼniʼ mandarbe 55 iza ndaaniʼ guidxi Jerusalén.
2 Bíʼnibe ni cadi jneza nezalú Jehová, bíʼnibe ca cosa dxabaʼ ni runi ca guidxi ni gulee Jehová nezalú guidxi Israel. 3 Biʼniʼ chaahuibe ca lugar ra nasoo* ni binidé Ezequías, bixhózebe, bíʼnibe caadxi altar para ca dios Baal ne laaca bíʼnibe poste para guni adorar binni. Ne laaca bizuxíbibe nezalú interu ejércitu stiʼ guibáʼ ne biʼniʼ adorarbe ni. 4 Laaca bíʼnibe caadxi altar ra lidxi Jehová, lugar ra guníʼ Jehová «Qué ziuu dxi gusaana de gusisácacabe laʼyaʼ* Jerusalén». 5 Ne bíʼnibe caadxi altar para interu ejércitu ni nuu guibáʼ lu chupa patiu ni nuu ra lidxi Jehová. 6 Ne bizaaquibe* ca xiiñibe lu bele ndaaniʼ valle stiʼ Xiiñiʼ Hinón; bíʼnibe magia ne brujería, biʼniʼ practicarbe adivinación ne biyúbibe binni ni ná riniʼné gueʼtuʼ ne ni runi adivinar para guni xhiiñabe. Guizáʼ stale cosa malu bíʼnibe nezalú Jehová para guchiichibe laa.
7 Ne bidóʼ ni bíʼnibe que guluube ni ra lidxi Dios ni dxandíʼ, ra maca gudxi Dios David ne xiiñiʼ Salomón: «Qué ziuu dxi gusaana de gusisácacabe laʼyaʼ ndaaniʼ yoo riʼ ne ndaaniʼ guidxi Jerusalén, ti lugar ni gulieeʼ lade guiráʼ tribu stiʼ Israel. 8 Ne qué ziuuruʼ dxi gudieeʼ lugar gaxha ñee ca binni de Israel de ndaaniʼ guidxi ni bidieeʼ ca bixhozebiidacaʼ,* qué zudieeʼ lugar guizaaca ndiʼ pa chinándacabe né stale cuidadu guiráʼ ni maʼ bineʼ mandar laacabe, guiráʼ ni zeeda lu Ley, ca regla ne ca decisión stinneʼ* ni gudxeʼ Moisés gudii laacabe». 9 Ne guleechuruʼ Manasés ca binni de Judá ne ca binni nabeza Jerusalén ra bicaa laacabe gúnicabe cosa jma feu que ni runi ca guidxi ni binitilú Jehová nezalú ca israelita.
10 Nin né guniʼné Jehová Manasés ne xquidxi, qué nulábicaʼ laabe. 11 Ngue runi bicaa Jehová ca xaíque ejércitu stiʼ Rey stiʼ Asiria gueedacaʼ luguiácabe. Gunaazecabe Manasés né gandxu,* bindiibicabe laabe né chupa cadena de cobre ne zinécabe laabe Babilonia. 12 Ne ra maʼ cayacanabe, biʼniʼ rogarbe Jehová, Dios stibe, gacané laabe ne bisaana de gácabe orgulloso nezalú Dios stiʼ ca bixhozebiidabe. 13 Cumu stale biaje biʼniʼ orarbe Dios la? biá Dios laabe ne bicaadiaga ca oración bíʼnibe de guidubi ladxidoʼbe, ne biguetaʼ biʼniʼ laabe rey ndaaniʼ guidxi Jerusalén. Zaqué nga bidii Manasés cuenta Jehová nga Dios ni dxandíʼ.
14 Despué de bizaaca ndiʼ, gundísabe ti muru pur fuera para Xquidxi David —ladu riaaziʼ gubidxa de Guihon, ndaaniʼ valle—* hasta ra nuu Puertaʼ stiʼ Benda. Bidii muru que vuelta hasta Ofel, ne guizáʼ nasoo bíʼnibe ni. Laaca gulibe caadxi xaíque ejércitu ne guluube laacaʼ ndaaniʼ ca guidxi nadipaʼ* stiʼ Judá. 15 Guleebe ca dios stiʼ ca guidxi que ne bidóʼ ni bizaʼbe, ni nuu ra lidxi Jehová, zaqueca guiráʼ ca altar ni bizaʼbe lu dani ra nuu lidxi Jehová ne ca ni nuu Jerusalén, ne biʼniʼ mandarbe chisáʼbicabe cani fuera de ndaaniʼ guidxi que. 16 Laaca guluube listu altar stiʼ Jehová ne bizulú bidiibe sacrificiu de paz ne sacrificiu para gudiibe xquixe peʼ laa, ne gúdxibe ca binni de Judá guni adorarcaʼ Jehová, Dios stiʼ Israel. 17 Bíʼniruʼ ca binni guidxi que sacrificiu ca lugar ra nasoo* que, peru maʼ para Jehová si, Dios stícabe.
18 Xcaadxi cosa ni bizaaca Manasés, oración ni bíʼnibe Dios stibe ne ca diidxaʼ ni guníʼ ca hombre ni ricaa visión ni guniʼné laabe lu lá Jehová, Dios stiʼ Israel, zeeda guirácani lu libru ra riete historia stiʼ ca rey stiʼ Israel. 19 Ne oración ni bíʼnibe que, modo bicabi Dios ni gunábabe laa, guiráʼ ca pecadu bíʼnibe ne modo maʼ qué nuzuubabe stiidxaʼ Dios, guiráʼ ra bíʼnibe ca lugar ra nasoo ante gusaana de gácabe orgulloso ne ra bizuhuaabe ca poste ne ca bidóʼ ni runi adorar binni, guirácani zeedacani ra gucuá ca diidxaʼ stiʼ ca hombre ni rabi laabe ca visión ni ricaacaʼ. 20 Guti Manasés ne yanna maʼ caziiláʼdxibe casi caziilaʼdxiʼ ca bixhozebiidabe, ne bicaachicabe laabe cueʼ lídxibe; ne maʼ xiiñibe Amón beeda gaca rey.
21 Napa Amón 22 iza dxi beeda gaca rey, ne biʼniʼ mandarbe chupa iza ndaaniʼ guidxi Jerusalén. 22 Bíʼnibe ni cadi jneza nezalú Jehová, cásica biʼniʼ Manasés, bixhózebe; ne biʼniʼ Amón sacrificiu para ca bidóʼ ni biʼniʼ Manasés, bixhózebe, ne biʼniʼ adorarbe laacaʼ. 23 Peru qué nusaana de ñácabe orgulloso nezalú Jehová, casi biʼniʼ Manasés, bixhózebe; lugar de ngue jmaruʼ si bíʼnibe cosa malu. 24 Últimu la? biʼniʼ traicionar ca mozo stibe laabe ne biiticabe laabe ra lídxibe. 25 Peru biiti ca binni guidxi que guiráʼ ca ni biʼniʼ traicionar rey Amón, ne bíʼnicabe xiiñibe Josías rey.