Primé libru de Reyes
15 Beeda gaca Abiyam rey stiʼ Judá dxi maʼ ziné rey Jeroboán, xiiñiʼ Nebat, 18 iza de cayuni mandar. 2 Biʼniʼ mandarbe chonna iza Jerusalén, jñaabe nga Maacá, xnieta Abisalom. 3 Laaca bíʼnibe ca pecadu ni biʼniʼ bixhózebe dxi bibani. Qué ñúnibe ni ná Jehová, Dios stibe, de guidubi ladxidoʼbe casi biʼniʼ David bixhozebiidabe* ni. 4 Neca zacá, pur David bidii Jehová, Dios stibe, lugar guni mandar tuuxa ni zeeda de familia stibe Jerusalén,* ra bicuí xiiñibe casi rey despué de laabe ti cadi guinitilú Jerusalén. 5 Purtiʼ biʼniʼ David ni jneza nezalú Jehová ne qué nireechube de guiráʼ ni biʼniʼ mandar laabe gúnibe biaʼ dxi bibánibe, ra bireechúsibe nga pur ni bizaacanebe Urías, hitita que. 6 Biaʼ dxi bibánibe gundíndesaa Rehoboam ne Jeroboán.
7 Xcaadxi cosa ni bizaaca Abiyam, guiráʼ ni bíʼnibe, zeedacani lu libru ra riete historia stiʼ ca rey stiʼ Judá. Ne laaca gudíndesaa Abiyam ne Jeroboán. 8 Ne bicaachicabe Abiyam ndaaniʼ Xquidxi David ne yanna maʼ caziiláʼdxibe casi caziilaʼdxiʼ ca bixhozebiidabe,* ne maʼ xiiñibe Asá beeda gaca rey.
9 Bizulú Asá cayuni mandar Judá dxi ziné Jeroboán gande iza de naca rey stiʼ guidxi Israel. 10 Biaʼsi 41 iza biʼniʼ mandarbe Jerusalén. Jñaabiidabe* nga Maacá, xnieta Abisalom. 11 Biʼniʼ Asá ni jneza nezalú Jehová casi biʼniʼ David bixhozebiidabe ni. 12 Guleebe de ndaaniʼ guidxi que ca prostituto stiʼ templu,* ne guleebe guiráʼ bidóʼ yuudxuʼ* ni biʼniʼ ca bixhozebiidacaʼ. 13 Dede gúxhabe puestu risaca napa jñaabiidabe Maacá casi reina, purtiʼ biʼniʼ ti bidóʼ yuudxuʼ para gusisácacabe poste ni runi adorárcabe. Bisaba Asá bidóʼ yuudxuʼ que ne bicaaguibe ni ndaaniʼ valle stiʼ Cedrón. 14 Peru biaanaruʼ ca lugar ra nasoo* que. Neca zaqué, biaʼ dxi bibani Asá biʼniʼ ni ná Jehová de guidubi ladxidóʼ. 15 Ne beedanebe ca cosa ni guleechube ne ni guleechú bixhózebe ra lidxi Jehová: plata, oro ne xcaadxi cosa riquiiñecabe ndaanini.
16 Siempre guyuudinde Asá ne Baasá, rey stiʼ Israel. 17 Bicaalú Baasá, rey stiʼ Israel, guidxi Judá ne biʼniʼ chaahuibe guidxi Ramá para cadi guiree nin chuʼ guirutiʼ biaʼ ra runi mandar Asá, rey stiʼ Judá. 18 Ne ziné Asá guiráʼ plata ne oro ni biaana ndaaniʼ ca cuartu ra riaapaʼ tesoro ni nuu ra lidxi Jehová ne ni nuu ndaaniʼ ca cuartu ra riaapaʼ tesoro ni nuu ra lidxi* rey que, ne bidiibe cani ca mozo stibe. De raqué biseendaʼ rey Asá cani ra nuu Ben-Hadad —xiiñiʼ Tabrimón, xiiñiʼ Hezión— rey stiʼ Siria, ni nabeza Damasco. Ne gúdxibe laa: 19 «Bíninu ti tratu,* tratu ni biʼniʼ bixhózeluʼ ne bixhozeʼ. Gucuaa ca plata ne ca oro cusigaʼdeʼ lii. Ne maʼ cadi chinándaluʼ acuerdu bíʼnineluʼ Baasá, rey stiʼ Israel, ti guixélebe de naa». 20 Para biʼniʼ Ben-Hadad ni ná rey Asá ne biseendabe ca xaíque stiʼ ca ejércitu stibe chigucaalucaʼ ca guidxi stiʼ Israel. Ne gucuaacabe Ijón, Dan, Abel-Bet-Maacá, guidubi naca Kinéret ne guiráʼ layú stiʼ Neftalí. 21 Ora gunna Baasá ni bizaaca que, maʼ qué ñuni chaahuirube guidxi Ramá ne biaanabe Tirzá. 22 Para bisendacaa rey Asá guiráʼ xixé binni de Judá ne zinécabe ca guié ne yaga ni nuu Ramá ni caquiiñeʼ Baasá para guni chaahuiʼ guidxi que, ne biquiiñeʼ rey Asá cani para guni chaahuiʼ Gueba, ti guidxihuiiniʼ stiʼ Benjamín, ne para guni chaahuibe Mizpá.
23 Xcaadxi cosa ni bizaaca Asá, poder ni gúpabe, guiráʼ cosa risaca bíʼnibe ne ca guidxi ni biʼniʼ chaahuibe, zeedacani lu libru ra riete historia stiʼ ca rey stiʼ Judá. Dxi maʼ nagólabe gucahuará ñeebe. 24 Ne bicaachicabe Asá ra gaʼchiʼ ca bixhozebiidabe ndaaniʼ Xquidxi David, bixhozebiidabe, ne yanna maʼ caziiláʼdxibe casi caziilaʼdxiʼ ca familia stibe, ne maʼ xiiñibe Jehosafat beeda gaca rey.
25 Beeda gaca Nadab, xiiñiʼ Jeroboán, rey stiʼ Israel dxi ziné Asá chupa iza de naca rey stiʼ Judá, ne biʼniʼ mandarbe guidxi Israel chupa iza. 26 Bíʼnibe ni cadi jneza nezalú Jehová. Yenándabe ni biʼniʼ bixhózebe ne bíʼnibe ca pecadu biʼniʼ, ca ni bicaa bixhózebe guidxi Israel guni. 27 Dxi guluu Nadab ne guidxi Israel leʼ Guibetón, bicaalú Baasá xiiñiʼ Ahíya, ni zeeda de ca xiiñiʼ Isacar, Nadab ne biitibe laa Guibetón, tobi de ca guidxi stiʼ ca filisteu. 28 Biiti Baasá laabe dxi ziné Asá chonna iza de naca rey stiʼ Judá ne maʼ Baasá beeda gaca rey. 29 Casi gúcabe rey biitibe guiráʼ ca ni zeeda de familia stiʼ Jeroboán; nin tobi qué nilá. Binduuxebe laacaʼ casi maca guníʼ Jehová de ruaa Ahíya silonita que, hombre ni runi xhiiñaʼ. 30 Bizaaca ndiʼ pur ca pecadu biʼniʼ Jeroboán ne ca ni bicaabe guidxi Israel guni, ne purtiʼ guizáʼ bichiichibe Jehová, Dios stiʼ Israel. 31 Xcaadxi cosa ni bizaaca Nadab, guiráʼ ni bíʼnibe, zeedacani lu libru ra riete historia stiʼ ca rey stiʼ Israel. 32 Ne siempre guyuudinde Asá ne Baasá, rey stiʼ Israel.
33 Dxi maʼ ziné Asá chonna iza de naca rey stiʼ Judá beeda gaca Baasá, xiiñiʼ Ahíya, rey stiʼ guidubi naca guidxi Israel, ne dede Tirzá biʼniʼ mandarbe 24 iza. 34 Peru bíʼnibe ni cadi jneza nezalú Jehová. Yenándabe ni biʼniʼ Jeroboán ne bíʼnibe ca pecadu biʼniʼ, ca ni bicaa Jeroboán guidxi Israel guni.