Guiropa libru de Crónicas
16 Dxi mayaca gusaa Asá 36 iza de cayuni mandar, bicaalú Baasá, rey stiʼ Israel, guidxi Judá ne biʼniʼ chaahuibe ca muru stiʼ Ramá para cadi guiree ne nin cadi chuʼ guirutiʼ biaʼ ra runi mandar Asá, rey stiʼ Judá. 2 Ne gulee Asá plata ne oro ni nuu ndaaniʼ ca cuartu ra riaapaʼ tesoro ni nuu ra lidxi Jehová ne ra lidxi* rey, ne biseendabe cani ra nuu Ben-Hadad, rey stiʼ Siria, ni nabeza Damasco. Ne gúdxibe laa: 3 «Nápanu ti tratu, tratu ni biʼniʼ bixhózeluʼ ne bixhozeʼ. Cuseendaʼ plata ne oro para lii, peru maʼ cadi chinándaluʼ acuerdu ni bíʼnineluʼ Baasá, rey stiʼ Israel, ti guixélebe de naa».
4 Para biʼniʼ Ben-Hadad ni ná rey Asá ne biseendabe ca xaíque stiʼ ca ejércitu stibe chigucaalucaʼ ca guidxi stiʼ Israel. Ne gucuaacabe Ijón, Dan, Abel-Maim ne guiráʼ lugar ra riaapaʼ ca cosa stiʼ ca guidxi stiʼ Neftalí. 5 Ora gunna Baasá ni bizaaca que, maʼ qué ñuni chaahuirube guidxi Ramá ne biaanadxí dxiiñaʼ que. 6 Para gucuaa rey Asá guiráʼ xixé binni de Judá ne yenebe laacaʼ para chicaacabe ca guié ne ca yaga ni nuu Ramá, ni caquiiñeʼ Baasá para guni chaahuiʼ guidxi que. Biquiiñeʼ rey Asá cani para guni chaahuiʼ Gueba ne Mizpá.
7 Tiempu que beeda Hananí, ti hombre ni riene visión, ra nuu Asá rey stiʼ Judá, ne nabe rábibe laa: «Cumu gúpaluʼ confianza rey stiʼ Siria ne qué ñápaluʼ confianza Jehová, Dios stiluʼ, maʼ qué ñuni ganarluʼ ejércitu stiʼ Siria. 8 ¿Rietenaláʼdxiluʼ pabiáʼ naroʼbaʼ ejércitu bedané ca etíope ne ca libiu ne pabiáʼ stale carru* ni rié lu guerra ne hombre riguiʼbaʼ caballu bicaalunecaʼ lii la? Peru cumu gúpaluʼ confianza Jehová la? gucanebe lii guni ganarluʼ laacaʼ.* 9 Purtiʼ cayuuyaʼ Jehová guiráʼ ni cazaaca lu guidubi guidxilayú ne cuyúbibe ca ni runi ni nabe de guidubi ladxidoʼcaʼ para gacanebe laacaʼ né stipa stibe. Peru biaje riʼ gúcaluʼ nahuati. Nga runi dede yannadxí siempre zucaalúcabe lii ne zadindenécabe lii».
10 Ora binadiaga Asá ndiʼ guizáʼ bidxiichi; bidxiichinebe Hananí, hombre ni riene visión que, ne biseguyoobe laa.* Laaca ca dxi que bizulú Asá biquiichináʼ caadxi binni de guidxi que. 11 Guiráʼ ni bizaaca Asá, de primé ne últimu ni bizaacabe lu xquendanabánibe, cá cani lu Libru stiʼ ca Rey stiʼ Judá ne stiʼ Israel.
12 Dxi mayaca gusaa Asá 39 iza de cayuni mandar, gucahuará ñeebe ne guizáʼ malu guyuube; peru neca huarabe, qué nuyúbibe Jehová, sínuque guyebe ra nuu doctor.* 13 De raqué guti Asá ne yanna maʼ caziiláʼdxibe, casi caziilaʼdxiʼ ca bixhozebiidabe, gútibe ante gusaabe 41 iza de cayuni mandarbe. 14 Ne bicaachicabe laabe ndaaniʼ ti baʼ naroʼbaʼ ni maca gundaabe ndaaniʼ Xquidxi David, gudíxhecabe laabe lu ti camilla ni guxúbicabe aceite rindáʼ naxhi ne ti aceite especial ni nuchaʼ gadxé gadxé tipu guixi rindáʼ naxhi. Ne dxi bicaachicabe laabe bíʼnicabe ti bele naroʼbaʼ.*