Guiropa libru de Crónicas

9 Binadiaga reina de Saba* pabiáʼ runibiáʼcabe Salomón, ngue runi beedabe Jerusalén para gúnibe laa caadxi pregunta nagana, ti gánnabe pa dxandíʼ nuu xpiaaniʼ. Bedanebe stale xpínnibe, nécabe camellu ni nuáʼ aceite rindáʼ naxhi,* stale oro ne guié sicarú. Ne guyebe nezalú Salomón yetídxibe laa guiráʼ ni nuu ndaaniʼ ladxidoʼbe.* 2 Bicabi Salomón guiráʼ ni gunabadiidxabe laa. Qué ñaca nagana para Salomón nusiene laabe guiráʼ xixé ni nuube gánnabe.

3 Ora biʼyaʼ reina de Saba pabiáʼ nuu xpiaaniʼ Salomón, ne biiyabe yoo ni bicuí, 4 ca guendaró ni nexheʼ lu mexaʼ stiʼ, modo zuba ca mozo stiʼ, modo cayuni tender ca meseru que ne ni nácucaʼ, ne ora bíʼyabe ca coperu que ne ni nácucaʼ ne guiráʼ ca sacrificiu ni riaʼquiʼ ni rudii Salomón ra lidxi Jehová, dede qué nidxélabe xi niniʼbe. 5 Ngue runi rábibe rey que: «Dxandíʼ* nga guiráʼ ni huayunadiagaʼ ndaaniʼ xquidxeʼ de guiráʼ ni huayúniluʼ ne pabiáʼ nuu xpiaaniluʼ. 6 Peru qué ñuneʼ cré guiráʼ ni caníʼcabe dede óraruʼ bedandayaʼ raríʼ ne naa piaʼ* biiyaʼ ni. Yanna maʼ nannaʼ gastiʼ ngue ni gúdxicabe naa de biaʼ nuu xpiaaniluʼ. Jma stale guiráʼ ni maʼ biiyaʼ que ni binadiagaʼ. 7 ¡Dichoso ca binni xquídxiluʼ ne dichoso ca mozo stiluʼ purtiʼ siempre nuucaʼ ra nuuluʼ cayunadiágacaʼ pabiáʼ nuu xpiaaniluʼ! 8 Guisaca Jehová, Dios stiluʼ, ni nuu nayecheʼ pur ni cayúniluʼ ne ni bicuí lii lu trono stiʼ casi ti rey ni gulí Jehová, Dios stiluʼ. Cumu guizáʼ nadxii Dios stiluʼ guidxi Israel ne qué racaláʼdxibe guinitilú ni la? maʼ bíʼnibe lii rey para gúniluʼ ni jneza ne gúniluʼ justicia ora maʼ cayuni mandarluʼ».

9 De raqué bidiibe rey que ti guyuaa gande talentu* de oro ne ziáʼ aceite rindáʼ naxhi ne stale guié sicarú. Ne qué ñuuruʼ dxi ñedanécabe ziáʼ aceite rindáʼ naxhi casi ni bidii reina de Saba rey Salomón.

10 Ne ca mozo stiʼ Hiram ne stiʼ Salomón, ca ni bedané oro de Ofir, laaca bedanecaʼ yaga sándalo ne guié sicarú. 11 Ne biquiiñeʼ rey que ca yaga sándalo que para biʼniʼ escalera para lidxi Jehová ne lidxi* rey que, ne para biʼniʼ arpa ne xcaadxi instrumentu ni napa cuerda ni riquiiñeʼ ca ni ruundaʼ. Qué huayuuruʼ dxi gúʼyacabe yaga galán casi laacani lu layú stiʼ Judá.

12 Laaca bidii rey Salomón reina de Saba guiráʼ ni gucalaʼdxiʼ ne ni gunabaʼ, jma que biaʼ* ni bedané para rey que. De raqué, biree reina que zeʼ ne biguetané ca mozo stiʼ xquidxi.

13 Guiráʼ iza ricaa rey Salomón xhoopaʼ gayuaa sesenta y seis talentu de oro, 14 aparte de ni redané ca ni rutoo ne ca comerciante, ne aparte oro ne plata ni redané ca rey stiʼ ca árabe ne ca gobernador stiʼ guidxi que para Salomón.

15 Laaca biʼniʼ rey Salomón chupa gayuaa escudu naroʼbaʼ de oro ni nuchaʼ sti guiibaʼ (cada escudu napa xhoopaʼ gayuaa siclo* de oro ni nuchaʼ sti guiibaʼ) 16 ne chonna gayuaa escudu nahuiiniʼ* de oro ni nuchaʼ sti guiibaʼ (cada escudu napa chonna mina* de oro). Para yené rey que cani ndaaniʼ yoo ni láʼ Bosque stiʼ Líbano.

17 Laaca biʼniʼ rey que ti trono naroʼbaʼ de marfil ne biʼniʼ forrarbe ni de oro puru. 18 Bíʼnibe xhoopaʼ escalón para quíbacabe ra nuu trono que ne luni bíʼnibe ti banguhuiiniʼ de oro para gudxibañeebe. Cada ladu de asientu que napa ra quixhenácabe ne cueʼ cada ladu ra riguixhenácabe que zuhuaa ti lión. 19 Lu xhoopaʼ escalón que zuhuaa 12 lión, tobi cada ladu de cada escalón que, ninruʼ sti rey qué gapa ti trono zaqué. 20 De oro guiráʼ ca copa stiʼ rey Salomón ne laaca de oro puru guiráʼ cosa ni riquiiñecabe ndaaniʼ yoo láʼ Bosque stiʼ Líbano. Qué ñápabe nin ti cosa de plata purtiʼ ca dxi bibani Salomón qué risaca plata. 21 Rié ca barcu stiʼ rey que Tarsis ne rinécabe ca mozo stiʼ Hiram. Cada chonna iza ribiguetaʼ ca barcu que de Tarsis, maʼ nécani oro, plata, marfil, migu ne pavo real.

22 Beeda gaca Salomón rey ni jma ricu ne ni jma nuu xpiaaniʼ lade guiráʼ rey nuu lu guidxilayú. 23 Ruyubi ca rey de guiráʼ ladu checaʼ ra nuu Salomón para gucaadiágacaʼ laabe ne gúʼyacaʼ pabiáʼ guendabiaaniʼ bidii Dios ni dxandíʼ laabe. 24 Ne guiráʼ iza redanécabe regalu ra nuube: rudiicabe laabe cosa de plata, de oro, lari, guiibaʼ ni rinécabe lu guerra, aceite rindáʼ naxhi, caballu ne mulaʼ. 25 Ne gupa Salomón caadxi currá ni napa tapa mil lugar ra rieguyoo caballu stiʼ ne gúpabe carru* ne doce mil caballu* ni bizuhuaabe ndaaniʼ ca guidxi ra riaapaʼ ca carru stibe ne ndaaniʼ guidxi Jerusalén, gaxha de ra nuube. 26 Ne biʼniʼ mandarbe guiráʼ ca rey ni nuu dede ra nuu Guiiguʼ* que hasta ra nuu ca layú stiʼ ca filisteu ne dede ra dxaagani guidxi Egipto. 27 Tantu stale plata guyuu Jerusalén dxi biʼniʼ mandar rey que dede ruluíʼcani guié ni zanda guidxélacabe ratiica si, ne bitálebe stale tablón de cedru casi ca sicómoro ni nuu Sefelá. 28 Ne laaca redanécabe caballu de Egipto ne de xcaadxi guidxi para Salomón.

29 Xcaadxi cosa ni bizaaca Salomón, de primé ne últimu ni bizaacabe lu xquendanabánibe, bicaa profeta Natán cani, laaca zeedacani lu profecía stiʼ Ahíya, silonita que, ne lu registru stiʼ ca visión ni gucuaa Idó —hombre ni ricaa visión— ni caníʼ de Jeroboán xiiñiʼ Nebat. 30 Biaʼsi 40 iza biʼniʼ mandar Salomón guidubi naca guidxi Israel dede ndaaniʼ guidxi Jerusalén. 31 Guti Salomón ne bicaachicabe laabe ndaaniʼ Xquidxi David, bixhózebe, ne yanna maʼ caziiláʼdxibe casi caziilaʼdxiʼ ca bixhozebiidabe; ne maʼ xiiñibe Rehoboam nga beeda gaca rey.