Guiropa libru stiʼ Samuel

7 Dxi maʼ nabeza rey que ndaaniʼ lidxi,* gúpabe guendariuudxí purtiʼ maʼ qué nudii Jehová lugar nucaalú ca enemigu stibe laabe, ca ni nabeza gaxha de laabe. 2 Para ná rey que rabi profeta Natán: «Naa nabezaʼ ndaaniʼ ti yoo de cedru, peru Arca stiʼ Dios ni dxandíʼ, nuuni ndaaniʼ ti yoo de lari». 3 Óraque bicabi Natán rey que: «Biʼniʼ ni ná ladxidoʼloʼ, purtiʼ nuuné Jehová lii».

4 Gueelaʼ queca gudxi Jehová ca diidxaʼ riʼ Natán: 5 «Guyé ne gudxi David, hombre ni runi xhiiñaʼ: “Ndiʼ nga ni ná Jehová: «¿Ñee lii piouʼ* nga caquiiñeʼ gucuiluʼ ti yoo para cuezaʼ ndaaniʼ la? 6 Dede dxi guleeʼ guidxi Israel de Egipto hasta nagasi, qué huabezaʼ diaʼ ndaaniʼ nin ti yoo, sínuque huazayaʼ cheríʼ chericaʼ ndaaniʼ ti yoo de lari ne ndaaniʼ ti tabernáculo. 7 Biaʼ tiempu guzayaʼ lade ca israelita,* ¿ñee bizeeteʼ ni lu ca xaíque stiʼ ca tribu stiʼ Israel, ca ni gulieeʼ para gapaʼ xquidxeʼ la? ¿Ñee guyuu dxi gudxeʼ laacabe “¿Xiñee qué huayúnitu ti yoo de cedru para naa pue?”?»”. 8 Yanna gudxi David, hombre ni runi xhiiñaʼ: “Ndiʼ nga ni ná Jehová, Dios stiʼ ca ejércitu: «Naa guleeʼ lii de lu ca layú ra rigaa guixi, ra rigápaluʼ dendxuʼ dxiqué, para gácaluʼ xaíque stiʼ Israel, guidxi stinneʼ. 9 Ne ratiica cheluʼ, ziuaaʼ gaxha de lii. Zuuyaluʼ modo guniteluáʼ ca enemigu stiluʼ. Ne pur naa nabé zunibiáʼ binni lii casi runibiáʼcabe ca hombre risaca stiʼ guidxilayú. 10 Zuyubeʼ ti lugar para Israel, guidxi stinneʼ. Ne zacaniáʼ laacabe para cuézacabe luni sin guchiiñaʼ guirutiʼ laacabe. Ne maʼ qué zuquichináʼ ca binni malu laacabe casi bíʼnicaʼ ni dxiqué, 11 dxi gudixheʼ chuʼ juez ndaaniʼ guidxi Israel, guidxi stinneʼ. Ne zápaluʼ guendariuudxí purtiʼ maʼ qué zucaalú ca enemigu stiluʼ lii.

»”»Laaca maʼ gudxi Jehová lii zucuí Jehová ti yoo* para lii. 12 Ora guedandá dxi gátiluʼ ne guiziiláʼdxiluʼ casi caziilaʼdxiʼ ca bixhozebiidaluʼ,* zuneʼ tobi de ca ni zeeda de lii rey, ti xiiñiʼ piouʼ,* ne qué zusaana de guni mandar reinu stibe. 13 Laabe nga chigucuibe ti yoo para guisaca laʼyaʼ,* naa zucueeʼ laabe casi rey ne qué ziuu dxi gusaana de guni mandar reinu stibe. 14 Zacaʼ bixhózebe ne laabe zácabe xiiñeʼ. Ora gúnibe ti cosa malu, zaguaaʼ jneza laabe né vara stiʼ ca hombre ne golpe stiʼ ca xiiñiʼ hombre.* 15 Qué zusaanaʼ de gannaxhieeʼ laabe casi bisaanaʼ de gannaxhieeʼ Saúl, hombre ni bicaanayaʼ para chuʼluʼ lugar stiʼ. 16 Qué ziuu dxi gusaana de guni mandar ca xiiñiluʼ; zuni mandar reinu stiluʼ para siempre»”».

17 Para gudxi Natán David guiráʼ ni binadiaga ne ni biʼyaʼ lu visión riʼ.

18 Para biree rey David zeʼ, yetí nezalú Jehová ne guníʼ: «Jehová, Señor ni runi mandar guiráʼ xixé ni nuu, ¿tu nacaʼ naa ne tu naca familia stinneʼ* para gúniluʼ guiráʼ ndiʼ pur laadu pue? 19 Nérusica* cayábiluʼ naa, Jehová, Señor ni runi mandar guiráʼ xixé ni nuu, xadxí zuni mandar ca xiiñeʼ; ne naca ndiʼ ti ley para guiráʼ binni, Jehová, Señor ni runi mandar guiráʼ xixé ni nuu. 20 ¿Xiruʼ ndiʼ zanda gabeʼ lii yaʼ, Jehová, Señor ni runi mandar guiráʼ xixé ni nuu, pa lii nga runibiáʼ chaahuiluʼ naa? 21 Maʼ bíʼniluʼ guiráʼ ca cosa naroʼbaʼ riʼ, Señor stinneʼ, purtiʼ nga nga ni ná ladxidoʼloʼ* ne ni biʼniʼ prometerluʼ, ne maʼ biluiʼluʼ ni naa. 22 Nápaluʼ stale poder, Jehová, Señor ni runi mandar guiráʼ xixé ni nuu. Gástiruʼ stobi casi lii ne lii si nga Dios; pur guiráʼ ni maʼ binadiágadu, nánnadu dxandíʼ zacá ni. 23 ¿Ñee nuuruʼ sti guidxi casi xquídxiluʼ Israel lu guidxilayú riʼ la? Dios stinneʼ, lii nga bilaluʼ laacabe para gácacabe guidxi stiluʼ; pur laacabe bíʼniluʼ stale cosa ni bidxagayaa binni ne zacá bisisácaluʼ laluʼ.* Pur xquídxiluʼ, ni guliluʼ ne guleeluʼ de Egipto, binitiluluʼ stale guidxi ne ca dios sticaʼ. 24 Gudíxheluʼ gaca guidxi Israel xquídxiluʼ para siempre. Ne lii, Jehová, beeda gácaluʼ Dios stícabe.

25 »Yanna, Jehová Dios, canabaʼ lii qué chuʼ dxi gusiaandaluʼ promesa ni bíʼniluʼ hombre ni runi xhiiñaluʼ ne ca xiiñiʼ, ne biʼniʼ cumplir guiráʼ ni maʼ guniʼluʼ. 26 Ne cadi gusaana de guisaca laluʼ,* ti zacá guiníʼ binni: “Jehová, Dios stiʼ ca ejércitu, nga Dios stiʼ guidxi Israel”. Ne qué chuʼ dxi gusaana de guni mandar ca xiiñiʼ David, hombre ni runi xhiiñaluʼ, nezaluluʼ. 27 Purtiʼ lii, Jehová, Dios stiʼ ca ejércitu, Dios stiʼ guidxi Israel, gúdxiluʼ hombre ni runi xhiiñaluʼ ti cosa ni qué ganna, ora guniʼluʼ: “Zucueeʼ ti yoo* para lii”. Nga runi napa hombre ni runi xhiiñaluʼ riʼ valor para guni orar lii. 28 Jehová, Señor ni runi mandar guiráʼ xixé ni nuu, lii nga Dios ni dxandíʼ ne dxandíʼ guiráʼ ni riniʼluʼ. Ne maʼ biʼniʼ prometerluʼ guiráʼ cosa galán riʼ hombre ni runi xhiiñaluʼ. 29 Nga runi canabaʼ lii cadi gusaanaluʼ lidxeʼ* sin ndaayaʼ stiluʼ, ne qué chuʼ dxi gusaana de guni adorárcabe lii ne guni mandarcabe. Purtiʼ lii, Jehová, Señor ni runi mandar guiráʼ xixé ni nuu, maʼ biʼniʼ prometerluʼ ni. Ne qué chuʼ dxi gusaana de cuʼluʼ ndaayaʼ ca familia ni zeeda de hombre ni runi xhiiñaluʼ».