Primé libru de Crónicas
23 Dxi maʼ nagola David ne mayaca gatiʼ, bíʼnibe Salomón xiiñibe rey stiʼ Israel. 2 Para bisendacaabe guiráʼ ca príncipe stiʼ Israel, ca sacerdote ne ca levita. 3 Bigábacabe ca levita ni napa treinta iza para delante, ne ra bigábacabe laacaʼ tobi pur tobi, biaʼsi bizaacaʼ treinta y ocho mil hombre. 4 De lade ca hombre riʼ, veinticuatro mil de laacabe ruuyacabe ca dxiiñaʼ ni raca ra lidxi Jehová, xhoopaʼ mil de laacabe nácacabe xaíque* ne juez, 5 tapa mil de laacabe rápacabe ra puertaʼ ne tapa mil de laacabe rusisácacaʼ Jehová né ca instrumentu biʼniʼ David. Sicaríʼ guníʼ David de laacani: «Bineʼ cani para iquíʼñenu cani para gusisácanu Dios».
6 Para gudixhe chaahuiʼ* David ca levita pur grupu ne cada grupu zeeda de tobi de ca xiiñiʼ Leví: Guersón, Cohat ne Merarí. 7 Lade ca guersonita la? nuu Ladán ne Simeí. 8 Ne gupa Ladán chonna xiiñiʼ: Jehiel —ni guca xaíque—, Zetam ne Joel. 9 Simeí gupa chonna xiiñiʼ: Selomot, Haziel ne Harán. Laacabe nga ca xaíque familia stiʼ Ladán. 10 Ne ca xiiñiʼ Simeí nga Jáhat, Ziná, Jeús ne Berías. Guidápacabe nga ca xiiñiʼ Simeí. 11 Jáhat nga guca xaíque ne Zizá nga guiropa. Peru cumu qué ñapa Jehús ne Berías stale xiiñicaʼ la? bieegucaʼ* ne gúcacaʼ ti familia si ne biʼniʼ tendercaʼ ti dxiiñaʼ si.
12 Ne Cohat gupa tapa xiiñiʼ: Amram, Izhar, Hebrón ne Uziel. 13 Ca xiiñiʼ Amram nga Aarón ne Moisés. Peru gulícabe Aarón ne ca xiiñiʼ para cadi gusaana de gúnicaʼ dxiiñaʼ ndaaniʼ* Santísimo que ne para gudiicaʼ sacrificiu nezalú Jehová, gúnicaʼ xhiiñabe ne cadi gusaana de uguucaʼ ndaayaʼ de lu labe. 14 Ne ca xiiñiʼ Moisés, hombre stiʼ Dios ni dxandíʼ que, bigábacaʼ lade tribu stiʼ ca levita. 15 Ca xiiñiʼ Moisés nga Guersom ne Eliezer. 16 De lade ca xiiñiʼ Guersom la? Sebuel nga xaíque. 17 De ca ni zeeda de xiiñiʼ* Eliezer, Rehabías nga xaíque. Maʼ qué ñáparuʼ Eliezer xiiñiʼ, peru Rehabías guizáʼ stale xiiñiʼ gupa. 18 De lade ca xiiñiʼ Izhar la? Selomit nga naca xaíque. 19 De lade ca xiiñiʼ Hebrón la? Jerías nga xaíque; Amarías, guiropa; Jahaziel, guionna, ne Jecameam, guidapa. 20 Ca xiiñiʼ Uziel nga Miqueas —ni guca xaíque— ne Isías, guiropa.
21 Ca xiiñiʼ Merarí nga Mahlí ne Musí. Ca xiiñiʼ Mahlí nga Eleazar ne Quis. 22 Guti Eleazar ne qué ñapa xiiñiʼ hombre, puru baʼdudxaapaʼ si gupa. Ngue runi ca xiiñiʼ Quis, ca xfamíliabe,* bichaganacaʼ ca baʼdudxaapaʼ riʼ. 23 Gupa Musí chonna xiiñiʼ: Mahlí, Éder ne Jeremot.
24 Laacabe nga ca xiiñiʼ Leví ni gucuá lá según ca familia sticaʼ neza bixhózecaʼ, según ca xaíque familia neza bixhózecaʼ. Bigábacabe laacaʼ ne gucuá lacaʼ, ne laaca bíʼnicaʼ ca dxiiñaʼ ni raca ra lidxi Jehová dede dxi nápacaʼ gande iza. 25 Purtiʼ guníʼ David: «Maʼ bidii Jehová, Dios stiʼ Israel, lugar guiziilaʼdxiʼ xquidxi ne zabézabe Jerusalén para siempre. 26 Laaca cadi naquiiñeʼ guáʼ ca levita tabernáculo, nin ca cosa ni riquiiñeʼ para gaca dxiiñaʼ ndaanini». 27 Casi maca gudixhe David gácani, bigábacabe ca levita ni napa gande iza para delante. 28 Dxiiñaʼ stícabe nga gacanécabe ca xiiñiʼ Aarón para gaca ca dxiiñaʼ ni raca ra lidxi Jehová lu ca patiu que, ra nuu ca comedor que ne para guiá guiráʼ cosa santo casi ná Ley, zaqueca guiráʼ cosa ni caquiiñeʼ gaca para gúnicabe dxiiñaʼ ndaaniʼ lidxi Dios ni dxandíʼ. 29 Racanécabe para gaca ca pan ni raʼtaʼ pur capa,* riguu chaahuicabe harina de ni jma galán para ofrenda de biidxiʼ, racanécabe gaca galleta nalaseʼ ni qué gapa levadura, pan ni raca lu dxiá ne cuba pan ni nuchaʼ aceite, ruuyacabe ca medida que ne riguubiáʼcabe ca cosa que. 30 Guiráʼ siadóʼ ne guiráʼ huadxí caquiiñeʼ chécabe para gudiicabe xquixe peʼ Jehová ne gusisácacabe laa. 31 Racanécabe guiráʼ biaje raca sacrificiu ni riaʼquiʼ para Jehová dxi sábadu, dxi riree beeuhuiiniʼ, ne ca dxi raca saa, biaʼ rinabaʼ Ley, ne rúnicabe ni gatigá nezalú Jehová. 32 Laaca runi cumplírcabe guiráʼ ca dxiiñaʼ raca tocar laacabe gúnicabe ndaaniʼ yoo ra raca reunión,* rápacabe lugar ra raca adorar Dios ne racanécabe ca bíʼchicabe, ca xiiñiʼ Aarón, para gaca ca dxiiñaʼ ni raca ra lidxi Jehová.