Hechos
24 Gudiʼdiʼ si gaayuʼ gubidxa guyé* Ananías, sumo sacerdote que, ne chupa chonna ancianu ne ti abogadu láʼ Tértulo, yenecaʼ casu stiʼ Pablo nezalú gobernador. 2 Ora bicaa rídxicabe Tértulo, bizulú guluu xqueja Pablo ne guníʼ:
«Pur lii napa xquídxidu paz ne cayúniluʼ stale cosa galán ndaaniʼ guidxi riʼ purtiʼ nuu xpiaaniluʼ. 3 Cudiʼdu xquixe peʼ lii saca cayúniluʼ ca ndiʼ guiráʼ ladu, estimado Félix. 4 Peru, para cadi cueeʼ stale tiempu stiluʼ, rinabaʼ lii gácaluʼ nachaʼhuiʼ ne gucaadiágaluʼ laadu ti ratu. 5 Maʼ bidúʼyadu nuu hombre riʼ casi ti guendahuará. Rucaabe ca judíu ni nuu lu guidubi guidxilayú gucaalucaʼ gobiernu ne laabe nga zanírube lu secta* stiʼ ca nazarenu. 6 Ne laaca gucaláʼdxibe ñuni contaminarbe templu, peru gunáʼzedu laabe. 7 * 8 Ne pa guinabadiidxaluʼ laabe, zudiiluʼ cuenta dxandíʼ guiráʼ ni cayábidu lii».
9 De raqué maʼ né ca judíu caguucaʼ xqueja Pablo, ne caniʼcaʼ dxandíʼ guiráʼ ni caníʼ Tértulo. 10 Ora biʼniʼ gobernador que seña lú Pablo para guiníʼ la? bicabi:
«Nannaʼ maʼ xadxí napa guidxi riʼ lii de juez, nga runi nayecheʼ zuhuaaʼ nezaluluʼ para gacaʼ defender. 11 Raca 12 dxi de guyaaʼ* Jerusalén para guneʼ adorar Dios, zanda guinabadiidxaluʼ pa dxandíʼ ni. 12 Qué ñuuyacabe naa ñuneʼ discutirniáʼ tuuxa ndaaniʼ templu, ne qué ñuneʼ bulla lade binni ndaaniʼ Sinagoga o ndaaniʼ guidxi. 13 Ne laaca qué gápacabe prueba de ni cugaanicabe luguiaʼyaʼ riʼ. 14 Ndiʼ huaxa zabeʼ lii: runeʼ adorar* Dios stiʼ ca bixhozebiidaʼ modo gudíxhebe gaca ni, purtiʼ runeʼ cré guiráʼ ni cá lu Ley ne ni bicaa ca Profeta, peru para ca judíu riʼ ti secta* ni. 15 Cásica cabeza ca binni riʼ, naa laaca cabezaʼ gusibani Dios ca ni maʼ guti, ca ni biʼniʼ ni jneza* ne ca ni qué ñuni ni jneza.* 16 Nga runi siempre runeʼ stipa pur chuʼ conciencia* stinneʼ nayá nezalú Dios ne nezalú binni. 17 Gudiʼdiʼ si stale iza, bibiguetaʼ xquidxeʼ para gudieeʼ donación* ca binni xquidxeʼ ne para gudieeʼ ofrenda. 18 Ngue nga cayuneʼ ndaaniʼ templu, maʼ biluxe bineʼ ni ná Ley naquiiñeʼ guni binni para chuʼ nayá.* Cadi nuaaʼ lade stale binni ne cadi cayuneʼ bulla. Laaca nuu caadxi judíu de provincia stiʼ Asia raqué, 19 ne pa ñaca dxandíʼ bineʼ xiixa ni ugaanicabe luguiaʼyaʼ la? laacabe nga naquiiñeʼ ñuucabe raríʼ para niguucabe xquejaʼ. 20 O guiníʼ ca hombre nuu raríʼ xi cosa malu bineʼ dxi gucaʼ juzgar nezalú Sanedrín. 21 Ti cosa si zanda ugaanicabe iqueʼ, laani nga ni gunieeʼ riʼ: “¡Cayacaʼ juzgar yannadxí purtiʼ runeʼ cré zabani ca ni maʼ guti!”».
22 Peru cumu runibiáʼ chaahuiʼ Félix neza stiʼ Señor, guladxi laacabe ne guníʼ: «Ora gueeda* Lisias, comandante militar que, maʼ guneʼ decidir xi gaca de laani». 23 Ne biʼniʼ mandar Félix oficial stiʼ ejércitu que gapa Pablo, peru gudii lugar laabe gúnibe caadxi cosa ne chuʼ ca xhamígube para gudii ni iquiiñebe.
24 Gudiʼdiʼ si chupa chonna gubidxa bedané Félix Drusila, xheelaʼ, ti judía. Biseendacaa Félix Pablo ne bicaadiaga ora bisiénebe ni runi cré binni de Cristu Jesús. 25 Peru ora bizulú caníʼ Pablo guni binni ni jneza,* gucueeza binni laca laa* ne de juiciu ni chigueeda, bidxibi Félix ne guníʼ: «Guyé yanna. Zuseendacaaʼ lii sti biaje ora gapaʼ tiempu». 26 Ne laaca cabézabe pa gudii Pablo laabe bueltu. Nga runi gatigá ruseendacaabe laa para güínebe* laa diidxaʼ. 27 Peru gudiʼdiʼ si chupa iza, biuu Porcio Festo lugar stiʼ Félix. Peru qué nundaa Félix Pablo, purtiʼ racalaʼdxiʼ guiaana bien né ca judíu.