Guiropa libru de Crónicas
14 Guti Abías ne bicaachicabe laabe ndaaniʼ Xquidxi David ne yanna maʼ caziiláʼdxibe casi caziilaʼdxiʼ ca bixhozebiidabe, ne maʼ xiiñibe Asá beeda gaca rey. Tiempu biʼniʼ mandar Asá gúpacabe chii iza de guendariuudxí.*
2 Biʼniʼ Asá cosa galán ne ni jneza nezalú Jehová, Dios stiʼ. 3 Gúxhabe ca altar stiʼ ca dios stiʼ xcaadxi guidxi ne ca lugar ra nasoo* que, binidebe ca columna ni runi adorar ca binni que ne bisábabe ca poste ni runi adorarcaʼ. 4 Laaca gúdxibe ca binni de Judá guyúbicaʼ Jehová, Dios stiʼ ca bixhozebiidacaʼ,* ne chinándacaʼ Ley ne ca mandamientu stiʼ. 5 Guleebe ca lugar ra nasoo ne ca altar ra riaʼquiʼ inciensu ni nuu ndaaniʼ guiráʼ ca guidxi stiʼ Judá, ne beeda gapa binni guendariuudxí biaʼ tiempu biʼniʼ mandarbe casi rey. 6 Bíʼnibe ca guidxi stiʼ Judá jma nadipaʼ laga nuu guendariuudxí ndaaniʼ guidxi que. Nin ti guidxi qué nucaalú laabe ca iza que purtiʼ bidii Jehová lugar guiziiláʼdxibe de ca enemigu stibe. 7 Ndiʼ nga ni gudxi Asá ca binni de Judá: «Gúninu ca guidxi riʼ jma nadipaʼ ne guindísanu muru ne torre guidubi vuéltacani, gucaʼnu puertaʼ* ne gúninu barra para guieegucani. Nuuruʼ guidxi riʼ lu nanu, purtiʼ maʼ biyúbinu Jehová, Dios stinu. Maʼ biyúbinu laabe, ne cayacanebe laanu gápanu guendariuudxí* guiráʼ ladu». Ne biaʼsi biree guiráʼ ni bíʼnicabe que.
8 Gupa Asá ti ejércitu de chonna gayuaa mil hombre de Judá ni napa escudu naroʼbaʼ ne lanza. Ne tribu stiʼ Benjamín gupa chupa gayuaa ochenta mil soldadu nadipaʼ ni naaze escudu nahuiiniʼ* ne naaze arcu.*
9 Gudiʼdiʼ si ti tiempu, beeda gucaalú Zérah laacabe, ti hombre de Etiopía, ne bedané ti ejércitu de ti millón hombre ne chonna gayuaa carru* ni rié lu guerra. Ora bedandá Zérah ndaaniʼ guidxi Maresá, 10 biree Asá para gucaalú laabe, ne bizuhuaa chaahuiʼ ca soldadu stiʼ ndaaniʼ valle stiʼ Zefata, ni nuu cueʼ Maresá. 11 Para gunabaʼ Asá Jehová, Dios stiʼ, gacané laacaʼ, ne nabe rábibe laa: «Jehová, Dios stinneʼ, cásica racaneluʼ ca ni nadipaʼ,* zaqueca racaneluʼ ca ni qué gapa stipa. Gucané laadu, Jehová, Dios stidu, purtiʼ nápadu confianza lii, ne lu laluʼ* nga bireʼdu zeeda gucáʼludu guiráʼ binni riʼ. Jehová, lii nga Dios stidu. Cadi gudiiluʼ lugar guni ganar ca hombre riʼ lii purtiʼ guirutiʼ nácacabe nezaluluʼ».
12 Para biʼniʼ ganar Jehová ca etíope que nezalú Asá ne nezalú ca hombre de Judá, ne biree guxooñeʼ ca etíope que. 13 Guzananda Asá ne ca xpinni laacabe hasta Guerar, ziyuuticaʼ laacabe dede ra gutiʼ guirácabe, purtiʼ binduuxeʼ Jehová ne ejércitu stiʼ laacabe. Despué de ngue gucuaa ca hombre de Judá stale cosa stícabe. 14 Laaca gunda bicaalucaʼ guiráʼ guidxi ni nuu gaxha de Guerar purtiʼ guizáʼ maʼ cadxibi ca binni riʼ Jehová. Gúxhacabe guiráʼ ca cosa stiʼ ca guidxi que purtiʼ guizáʼ stale cosa nápacaʼ. 15 Laaca bicaalúcabe ca binni ni napa maniʼ ni nabeza ndaaniʼ yoo de lari ne biaananécabe ca dendxuʼ ne ca camellu sticaʼ. Despué de ngue biguétacabe Jerusalén.