Guiropa libru de Crónicas

24 Napa Jehoás gadxe iza dxi beeda gaca rey, ne biʼniʼ mandarbe 40 iza Jerusalén. Zibíah láʼ jñaabe ne de Beer-Seba laa. 2 Biʼniʼ Jehoás ni jneza nezalú Jehová biaʼ dxi bibani sacerdote Jehoiadá. 3 Biyubi Jehoiadá chupa gunaa para guichaganabe, ne gúpabe xiiñibe hombre ne xiiñibe gunaa.

4 Gudiʼdiʼ si ti tiempu, biale de ndaaniʼ ladxidóʼ Jehoás guni chaahuiʼ lidxi Jehová. 5 Ngue runi bisendacaabe ca sacerdote ne ca levita, ne gúdxibe laacaʼ: «Laché ndaaniʼ ca guidxi stiʼ Judá ne lagutopa bueltu stiʼ guidubi guidxi Israel para gaca chaahuiʼ ra lidxi Dios stitu guiráʼ iza; ne laguni ni nagueenda». Peru qué nizaalaʼdxiʼ ca levita ñúnicaʼ ni nagueenda. 6 Ngue runi bisendacaa rey que Jehoiadá, xaíque stiʼ ca sacerdote, ne gúdxibe laa: «¿Xiñee qué huayábiluʼ ca levita guedanecaʼ de Judá ne de Jerusalén impuestu para Dios ni gudixhe Moisés, hombre ni biʼniʼ xhiiñaʼ Jehová, gudiicabe pue? Impuestu ni gunabaʼ Dios guidxi Israel para yoo ra riaapaʼ ca tabla stiʼ Testimonio. 7 Yechuu ca xiiñiʼ Atalía, gunaa qué iquiiñeʼ que, ra lidxi Dios ni dxandíʼ ne gucuaacabe guiráʼ ca cosa ni bireechú para iquiiñeʼ ra lidxi Jehová ne biquiiñecabe ni para ca dios Baal stícabe». 8 Para biʼniʼ mandar rey que gúnicabe ti caja ne bizuhuaacabe ni ra puertaʼ lidxi Jehová pur fuera. 9 Despué de ngue, bidiicabe diidxaʼ guiráʼ ca binni de Judá ne de Jerusalén guedanecaʼ para Jehová impuestu ni gudixhe Moisés —hombre ni biʼniʼ xhiiñaʼ Dios ni dxandíʼ— gudii ca binni de Israel dede dxi guyuucaʼ lu desiertu. 10 Guizáʼ biecheʼ guiráʼ ca binni guidxi que ne guiráʼ ca príncipe que. Reedanécabe donación stícabe ne rusábacabe ni ndaaniʼ caja que dede ra guidxani.*

11 Ora maʼ né ca levita caja que para gudiicaʼ ni rey que, ruuyacabe guizáʼ stale bueltu nuu ndaanini, óraque reeda secretariu stiʼ rey que ne ni racané xaíque stiʼ ca sacerdote que, ribeecabe guiráʼ ni nuu ndaaniʼ caja que ne risaanacabe ni ra ruzuhuaani. Zaqué rúnicabe guiráʼ dxi, ne guizáʼ stale bueltu bitopalúcabe. 12 Ne rey que ne Jehoiadá ricaacaʼ bueltu que ne rudiicaʼ ni guiráʼ ca ni cayuuyaʼ ca dxiiñaʼ ni cayaca ra lidxi Jehová, ne maʼ laacaʼ ruyúbicaʼ hombre ni rugá guié ne artesanu para guni chaahuiʼ ra lidxi Jehová, ne laaca ruyúbicaʼ binni runi dxiiñaʼ de guiibaʼ ne de cobre para guni chaahuiʼ ra lidxi Jehová. 13 Guiráʼ ca ni biaana lu náʼ guʼyaʼ gaca ca dxiiñaʼ que bizulucaʼ cayuni chaahuicaʼ yoo que, zeʼ dxi ziyaca chaahuiʼ ni ne laapecabe biiyacabe gaca ca dxiiñaʼ que jneza. Bisaanacabe lidxi Dios ni dxandíʼ casi nacubi ne bíʼnicabe ni jma naguidxi. 14 Biluxesícabe, yesaanacabe bueltu biaana sobra que ra nuu rey que ne ra nuu Jehoiadá, ne biquiiñecabe ni para gúnicabe herramienta ni iquiiñeʼ ra lidxi Jehová: traste para guninécabe dxiiñaʼ ne para gudiicabe ofrenda, laaca bíʼnicabe copa ne cosa de oro ne de plata. Biaʼ dxi bibani Jehoiadá, qué nusaana de nudiicabe sacrificiu ni riaʼquiʼ ra lidxi Jehová.

15 Despué de bibani Jehoiadá xadxí ne galán, beeda gati: nápabe ti gayuaa treinta iza dxi gútibe. 16 Ne bicaachicabe laabe ndaaniʼ Xquidxi David, ra gaʼchiʼ ca rey, purtiʼ bíʼnibe stale cosa galán pur Dios ni dxandíʼ ne pur lidxi Dios ndaaniʼ guidxi Israel.

17 Guti si Jehoiadá, beeda ca príncipe de Judá ra nuu rey que, bizuxíbicaʼ nezalube ne bicaadiágabe laacaʼ. 18 Bisaanacabe lidxi Jehová, Dios stiʼ ca bixhozebiidacabe, ne bizulú biʼniʼ adorárcabe bidóʼ ne ca poste ni runi adorar binni, ne pur pecadu bíʼnicabe riʼ, bicaacabe Dios guidxiichiné Judá ne Jerusalén. 19 Qué nusaana Jehová de nuseendaʼ profeta ra nuucabe para gacanecaʼ laacabe guibiguétacabe ra nuu. Riguixhená ca profeta que laacabe,* peru qué rinácabe gucaadiágacabe laacaʼ.

20 Ne biaba espíritu stiʼ Dios luguiáʼ Zacarías, xiiñiʼ sacerdote Jehoiadá. Para bizuhuaabe ti lugar jma nasoo que ra zuhuaa ca binni guidxi que, ne gúdxibe laacaʼ: «Ndiʼ nga ni maʼ guníʼ Dios ni dxandíʼ: “¿Xiñee cadi zinándatu ca mandamientu stiʼ Jehová pue? ¡Qué zuni ganartu gastiʼ zacá! Maʼ bisaanatu Jehová, nga runi laaca zusaanabe laatu”». 21 Peru guníʼ stiidxacabe guuticabe laabe, bichácabe guié laabe lu patiu stiʼ lidxi Jehová dede ra gútibe, purtiʼ nga nga biʼniʼ mandar rey que. 22 Bisiaandaʼ rey Jehoás pabiáʼ gunnaxhii Jehoiadá laa, bixhoze Zacarías, ne biitibe xiiñiʼ, ne ora cayati guníʼ: «Cayuuyaʼ Jehová ndiʼ ne maʼ laa cuidxi cuenta lii».

23 Biaʼ ra ruzulú iza, biree ejércitu stiʼ ca siriu yegucaalucaʼ Jehoás. Yechuucabe Judá ne Jerusalén ne binduuxecabe guiráʼ ca príncipe stiʼ guidxi que, ne guiráʼ ca cosa ni gucuaacabe, biseendacabe cani ra nuu rey stiʼ Damasco. 24 Neca huaxiéʼ ca hombre ni nuu lu ejércitu stiʼ ca siriu ni yegucaalú laacabe, peru bidii Jehová lugar guni ganarcaʼ ti ejércitu guizáʼ naroʼbaʼ, purtiʼ bidxiideche ca binni guidxi que Jehová, Dios stiʼ ca bixhozebiidacabe; zaqué nga biquiiñeʼ Dios laacaʼ* para guni castigar Jehoás. 25 Guizáʼ naná bisaana ca siriu laabe, ne bireesicaʼ zecaʼ guníʼ stiidxaʼ ca xpínnibe gucaalucaʼ laabe purtiʼ biitibe ca xiiñiʼ* sacerdote Jehoiadá. Biiticabe laabe lu xcámabe. Gútibe ne bicaachicabe laabe ndaaniʼ Xquidxi David, peru cadi ra gaʼchiʼ ca rey.

26 Ndiʼ nga ca hombre ni guníʼ stiidxacaʼ guuticaʼ laabe: Zabad xiiñiʼ Simeat ti gunaa ammonita ne Jehozabad xiiñiʼ Simrit ti gunaa moabita. 27 Guiráʼ ni bizaaca ca xiiñibe ne guiráʼ ni guníʼ ca profeta zazaacabe ne modo guca chaahuiʼ lidxi Dios ni dxandíʼ, cá cani lu libru stiʼ ca rey. Ne maʼ xiiñibe Amasías beeda gaca rey.