Primé libru de Crónicas

20 Biaʼ ra ruzulú iza,* tiempu rié ca rey que lu guerra, bireené Joab ti ejércitu ne yenebe laacaʼ lu layú stiʼ ca ammonita ne binitilube lugar que; guyebe ne guluube leʼ Rabá, peru David la? biaana Jerusalén. Bicaalú Joab Rabá ne binitilube ni. 2 Ne guxha David corona nuu ique Malcam.* Biiyabe nanaa corona que ti talentu* de oro, ne cá jma guié sicarú luni; ne guluucabe ni ique David. Laaca zinebe stale cosa risaca stiʼ guidxi que. 3 Laaca guleebe ca binni que de ndaaniʼ guidxi que ne bicaabe laacaʼ ugacaʼ* guié ne iquiiñecaʼ herramienta de guiibaʼ ni rugá ne iquiiñecaʼ jacha. Zacá biʼniʼ David guiráʼ guidxi stiʼ ca ammonita. Últimu la? biguetaʼ David ne guiráʼ ca soldadu stiʼ Jerusalén.

4 Despué de ngue, gudindenécabe ca filisteu ndaaniʼ guidxi Guézer. Biaje que biiti Sibecái husatita que Sipái, ti hombre ni zeeda de ca refaím, ne biʼniʼ ganárcabe ca filisteu.

5 Biguetaʼ gudindenécabe ca filisteu, ne biiti Elhanán xiiñiʼ Jair Lahmí, biʼchiʼ Goliat, hombre de Gat que, naaze hombre que ti lanza ni zeeda gaca casi vara stiʼ ti telar.*

6 Despué de ngue gudínderucabe sti biaje. Gudíndecabe Gat, ne raqué nuu ti hombre ngola guizáʼ nasoo, xhoopaʼ bicuini napa cada nabe ne laaca xhoopaʼ bicuini napa cada ñeebe, biaʼsi 24 bicuini nápabe. Laaca zeeda hombre riʼ de ca refaím. 7 Cumu cadi cusaana de gucaalube guidxi Israel la? gucuaa Jonatán xiiñiʼ Simeá, biʼchiʼ David, biiti laabe.

8 Zeeda ca hombre riʼ de ca refaím ne nabézacabe Gat ne gúticabe lu náʼ David ne ca xpinni.