Primé libru de Reyes
16 Ndiʼ nga ca diidxaʼ gudxi Jehová Jehú, xiiñiʼ Hananí, chiguizaaca Baasá: 2 «De ndaaniʼ yudé gundisaʼ lii ne bineʼ lii xaíque stiʼ xquidxeʼ Israel, peru yenándaluʼ guiráʼ ni bi’ni’ Jeroboán ne bicaaluʼ xquidxeʼ Israel guchee, ne bichiichitu naa pur ca pecadu bíʼnitu. 3 Nga runi zunduuxeʼ Baasá ne guiráʼ ca familia stiʼ, zuneʼ laacabe casi bineʼ familia stiʼ Jeroboán, xiiñiʼ Nebat. 4 Guiráʼ familia stiʼ Baasá ni gatiʼ ndaaniʼ guidxi zo bi’cu’ laacaʼ. Ne guiráʼ ca ni gatiʼ ndaaniʼ gui’xhi’ zo ca pájaru laacaʼ».
5 Xcaadxi cosa ni bizaaca Baasá, guiráʼ ni bíʼnibe ne poder ni gúpabe, zeedacani lu libru ra riete historia stiʼ ca rey stiʼ Israel. 6 Ne bicaachicabe Baasá ndaaniʼ guidxi Tirzá ne yanna maʼ caziiláʼdxibe casi caziilaʼdxiʼ ca bixhozebiidabe.* Ne maʼ xiiñibe Elá nga beeda gaca rey. 7 Ne profeta Jehú, xiiñiʼ Hananí, nga biquiiñeʼ Jehová para guiníʼ xi chiguizaaca Baasá ne ca familia stiʼ, pur ca cosa malu bíʼnibe nezalú Jehová —ra bichiichibe laa pur ca cosa ni bíʼnibe ne beeda gácabe casi ca familia stiʼ Jeroboán— ne purtiʼ biitibe laa.*
8 Beeda gaca Elá, xiiñiʼ Baasá, rey stiʼ Israel dxi maʼ ziné Asá, rey stiʼ Judá, 26 iza de cayuni mandar, ne bi’ni’ mandarbe chupa iza. 9 Ti mozo stibe ni láʼ Zimrí ni naca xaíque stiʼ galaa de ca carru ni rié lu guerra stibe biʼniʼ traicionar laabe ne biiti laabe Tirzá dxi caxúdxibe ra lidxi Arzá, hombre ni rapa ra lidxi rey que ndaaniʼ guidxi Tirzá. 10 Guyuu Zimrí ra nuube, bicaalú laabe ne biiti laabe dxi maʼ ziné Asá, rey stiʼ Judá, 27 iza de cayuni mandar, ne maʼ Zimrí beeda gaca rey. 11 Casi gúcabe rey ne guribe lu trono stibe, biitibe guiráʼ ca familia stiʼ Baasá. Biitibe guiráʼ hombre* ni naca xfamilia* ne xhamigu Baasá. 12 Zaqué binduuxeʼ Zimrí guiráʼ familia stiʼ Baasá, casi maca guníʼ Jehová de ruaa profeta Jehú zazaaca Baasá. 13 Bizaaca ndiʼ pur guiráʼ pecadu bi’ni’ Baasá ne xiiñibe Elá ne guiráʼ ca pecadu bicaacabe guidxi Israel guni ra bichiichicabe Jehová, Dios stiʼ Israel, pur ca bidóʼ ni qué risaca stícabe. 14 Xcaadxi cosa ni bizaaca Elá, guiráʼ ni bíʼnibe, zeedacani lu libru ra riete historia stiʼ ca rey stiʼ Israel.
15 Dxi maʼ ziné Asá, rey stiʼ Judá, 27 iza de cayuni mandar, guca Zimrí rey gadxe gubidxa ndaaniʼ guidxi Tirzá, bizaaca ndiʼ dxi naguixhe ca soldadu campamentu sticaʼ para gucaalucaʼ Guibetón, ti guidxi stiʼ ca filisteu. 16 Para binadiaga ca soldadu ni naguixhe campamentu que caníʼcabe: «Biʼniʼ traicionar Zimrí rey ca ne biitibe laa». Ngue runi dxi que, guiráʼ ca israelita nuu ra campamentu que bí’nica’ Omrí —xaíque stiʼ ejércitu que— rey stiʼ guidxi Israel. 17 Para biree Omrí ne guiráʼ ca binni de Israel de ndaaniʼ guidxi Guibetón ne guluucaʼ leʼ Tirzá. 18 Ora biʼyaʼ Zimrí maʼ biʼniʼ ganárcabe guidxi que, biuu ndaaniʼ cuartu ni nuu lu torre stiʼ palaciu que ne bicaaguibe palaciu que, ne cumu nuube dentru la? gútibe. 19 Bizaaca ndiʼ pur ca pecadu bíʼnibe ne ca cosa ni cadi jneza bíʼnibe nezalú Jehová ne purtiʼ bíʼnibe laca ni biʼniʼ Jeroboán, ne pur ca pecadu ni bicaabe guidxi Israel guni. 20 Xcaadxi cosa ni bizaaca Zimrí ne modo biʼniʼ traicionarbe Elá, zeedacani lu libru ra riete historia stiʼ ca rey stiʼ Israel.
21 Despué de ngue, guca guidxi Israel chupa grupu, ti grupu que yenanda Tibní xiiñiʼ Guinat, ne gucaláʼdxicaʼ ñúnicaʼ laabe rey, ne sti grupu que yenándacaʼ Omrí. 22 Peru biʼniʼ ganar ca xpinni Omrí ca xpinni Tibní xiiñiʼ Guinat, ne últimu guti Tibní ne maʼ Omrí beeda gaca rey.
23 Lu 31 iza de cayuni mandar Asá, rey stiʼ Judá, beeda gaca Omrí rey stiʼ Israel, ne biʼniʼ mandarbe 12 iza. Ne ndaaniʼ guidxi Tirzá biʼniʼ mandarbe xhoopaʼ iza. 24 Guziʼbe dani stiʼ Samaria lu Sémer ne gudíxebe chupa talentu* de plata pur laani ne bicuibe ti guidxi luni. Gulee labe ni Samaria,* pur lá hombre ni guca stiʼ dani ca. 25 Ne biʼniʼ Omrí ni cadi jneza nezalú Jehová ne jma feu ni bíʼnibe que ni biʼniʼ ca rey ni guyuu ante de laabe. 26 Yenándabe ni biʼniʼ Jeroboán xiiñiʼ Nebat, ne bíʼnibe ca pecadu ni bicaa Jeroboán guidxi Israel guni ra biʼniʼ adorarcaʼ ca bidóʼ ni qué risaca para guchiichicaʼ Jehová, Dios stiʼ Israel. 27 Xcaadxi cosa ni bizaaca Omrí, guiráʼ ni bíʼnibe ne ca guerra ni biʼniʼ ganarbe, zeedacani lu libru ra riete historia stiʼ ca rey stiʼ Israel. 28 Ne bicaachicabe Omrí Samaria ne yanna maʼ caziiláʼdxibe casi caziilaʼdxiʼ ca bixhozebiidabe ne maʼ xiiñibe Acab nga beeda gaca rey.
29 Lu 38 iza de cayuni mandar Asá, rey stiʼ Judá, beeda gaca Acab xiiñiʼ Omrí, rey stiʼ Israel. Ne dede Samaria biʼniʼ mandarbe 22 iza guidxi Israel. 30 Ne biʼniʼ Acab xiiñiʼ Omrí ni cadi jneza nezalú Jehová ne jma feu ni bíʼnibe que ni biʼniʼ ca rey ni guyuu ante de laabe. 31 Ne aparte de bicheebe casi bichee Jeroboán xiiñiʼ Nebat, bichaganabe Jezabel, xiiñiʼ Etbaal rey stiʼ ca sidonio, biʼniʼ adorarbe Baal ne bizuxíbibe nezalú. 32 Laaca bíʼnibe ti altar para Baal ndaaniʼ templu stiʼ* Baal ni bicuibe Samaria. 33 Laaca biʼniʼ Acab ti poste ni runi adorar binni. Bíʼnibe stale cosa para guchiichibe Jehová, Dios stiʼ Israel, jma que ni biʼniʼ ca rey stiʼ Israel ni guyuu ante de laabe.
34 Ca dxi bibani Acab, biʼniʼ chaahuiʼ Hiel, betelita que, guidxi Jericó. Gudíxhebe base stini peru guti Abiram, baʼduʼ primé stibe, bicaabe ca puertaʼ stini peru guti Segub, xiiñibe ni jma nahuiiniʼ. Bizaaca ndiʼ casi gudxi Jehová Josué, xiiñiʼ Nun, zazaacani.