Primé libru de Crónicas
24 Gundaacabe ca ni zeeda de ca xiiñiʼ Aarón pur grupu. Ca xiiñiʼ Aarón nga Nadab, Abihú, Eleazar ne Itamar. 2 Peru guti Nadab ne Abihú ante gatiʼ bixhózecaʼ ne qué ñápacaʼ xiiñicaʼ, peru Eleazar ne Itamar gúcarucaʼ sacerdote. 3 Gundaa David laacabe pur grupu para ganda gúnicabe xhiiñacabe, —gucané Sadoc, ni zeeda de ca xiiñiʼ Eleazar, laabe ne zaqueca Ahimélec, ni zeeda de ca xiiñiʼ Itamar—. 4 Cumu jma stale xaíque napa ca xiiñiʼ Eleazar que ca xiiñiʼ Itamar la? nga runi gundaacabe laacaʼ sicaríʼ: guca tocar ca xiiñiʼ Eleazar 16 xaíque familia neza bixhózecaʼ ne ca xiiñiʼ Itamar guca tocar laacaʼ xhono xaíque familia neza bixhózecaʼ.
5 Ne bíʼnicabe sorteu para gudixhe chaahuicabe dxiiñaʼ ni chiguni ca xiiñiʼ Eleazar ne ca xiiñiʼ Itamar purtiʼ lu guiropaʼ grupu riʼ nuu hombre ni naca xaíque stiʼ lugar santo ne xaíque ni runi xhiiñaʼ Dios ni dxandíʼ. 6 Para bicaa Semaya xiiñiʼ Netanel, secretariu stiʼ ca levita, lá ca hombre riʼ nezalú rey, ca príncipe, sacerdote Sadoc, nezalú Ahimélec xiiñiʼ Abiatar ne nezalú ca xaíque familia stiʼ ca sacerdote ne ca levita neza bixhózecaʼ. Gulícabe ca grupu que tobi pur tobi: tobi de ca ni zeeda de Eleazar ne tobi de ca ni zeeda de Itamar.
7 Ora bilaacabe suerte* que, primé que guca tocar ni Jehoiarib, guiropa que Jedayá, 8 guionna que Harim, guidapa que Seorim, 9 gaayuʼ que Malkiya, xhoopaʼ que Mijamín, 10 gadxe que Hacoz, xhono que Abías, 11 gaʼ que Jesúa, chii que Secanías, 12 once que Eliasib, doce que Jaquim, 13 trece que Hupá, catorce que Jesebeab, 14 quince que Bilgá, dieciséis que Imer, 15 diecisiete que Hezir, dieciocho que Hapizez, 16 diecinueve que Petahías, gande que Jehezquel, 17 veintiuno que Jakín, veintidós que Gamul, 18 veintitrés que Delayá ne veinticuatro que Maazías.
19 Zacá nga gutachaahuiʼ modo naquiiñeʼ chécabe ra lidxi Jehová para chigúnicabe dxiiñaʼ, casi maca gudixhe bixhozebiidacabe Aarón gácani, casi peʼ biʼniʼ mandar Jehová, Dios stiʼ Israel, ni laabe.
20 Ne lade xcaadxi levita que nuu: de ca xiiñiʼ Amram la? Subael; de ca xiiñiʼ Subael la? Jehdeyá; 21 de ca xiiñiʼ Rehabías la? xaíque Isías; 22 de ca izharita la? Selomot; de ca xiiñiʼ Selomot la? Jáhat; 23 ne de lade ca xiiñiʼ Hebrón la? nuu Jerías xaíque que; Amarías nga guiropa; Jahaziel nga guionna ne Jecameam nga guidapa; 24 de ca xiiñiʼ Uziel la? Miqueas; de ca xiiñiʼ Miqueas la? Samir. 25 Biʼchiʼ Miqueas nga Isías; ne de ca xiiñiʼ Isías la? nuu Zacarías.
26 Ca xiiñiʼ Merarí nga Mahlí ne Musí; de ca xiiñiʼ Jaazías nuu Beno. 27 Lade ca xiiñiʼ Merarí nuu Jaazías, ne ca xiiñiʼ Jaazías nga Beno, Soham, Zacur ne Ibrí; 28 laaca nuu Mahlí ne xiiñiʼ Mahlí nga Eleazar, peru qué ñápabe xiiñibe hombre; 29 laaca nuu Quis, ca xiiñiʼ Quis nga Jerahmeel; 30 ne ca xiiñiʼ Musí nga Mahlí, Éder ne Jerimot.
Laacabe nga ca xiiñiʼ Leví según ca familia sticaʼ neza bixhózecaʼ. 31 Ne laaca bilaacabe suerte* casi biʼniʼ ca bíʼchicabe, ca xiiñiʼ Aarón, nezalú rey David, Sadoc, Ahimélec ne nezalú ca xaíque familia stiʼ ca sacerdote ne ca levita neza bixhózecaʼ. Cásica biʼniʼ tratárcabe xaíque familia ni jma huaniisi que zaqueca biʼniʼ tratárcabe xaíque familia ni jma nahuiiniʼ que.