Guiropa libru de Crónicas
1 Ra zidiʼdiʼ dxi ziyaca reinu stiʼ Salomón xiiñiʼ David jma nadipaʼ. Guyuu Jehová, Dios stibe, gaxha de laabe ne biʼniʼ laabe ti rey ni nabé biʼniʼ respetar binni.
2 Bisendacaa Salomón guidubi naca guidxi Israel, ca xaíque stiʼ ti mil ne stiʼ ti gayuaa, ca juez ne guiráʼ ca xaíque stiʼ guidxi Israel, ca ni naca xaíque familia neza bixhózecabe. 3 De raqué biree Salomón ne guidubi guidxi que zecaʼ lugar ra nasoo* ni nuu Gabaón, purtiʼ raqué nga nuu yoo ra raca reunión stiʼ Dios ni dxandíʼ, ni biʼniʼ Moisés, hombre ni biʼniʼ xhiiñaʼ Jehová, lu desiertu. 4 Peru maca yecaa David Arca* stiʼ Dios ni dxandíʼ Quiryat-Jearim ne yenebe ni Jerusalén, ti lugar ra maca biʼniʼ prepararbe para laani; ra bíʼnibe ti yoo de lari para laani. 5 Bizuhuaacabe altar de cobre ni biʼniʼ Bezalel —xiiñiʼ Urí, xiiñiʼ Hur— nezalú tabernáculo stiʼ Jehová; ne raqué, nezalú altar que nga runi orar Salomón ne guidubi guidxi que.* 6 Para bidii Salomón ofrenda raqué nezalú Jehová; bidiibe ti mil ofrenda ni riaʼquiʼ lu altar de cobre ni nuu ra yoo ra raca reunión.
7 Gueelaʼ que bihuinni Dios nezalú Salomón lu ti bacaandaʼ ne rabi laabe: «Gunabaʼ naa intiica si ni gacaláʼdxiluʼ». 8 Para ná Salomón rabi Dios: «Qué nusaana de nusihuínniluʼ pabiáʼ nadxiiluʼ David bixhozeʼ, ne maʼ bíʼniluʼ naa rey lugar stibe. 9 Yanna, Jehová Dios, biʼniʼ cumplir promesa ni bíʼniluʼ David bixhozeʼ, purtiʼ maʼ bíʼniluʼ naa rey stiʼ ti guidxi nabé naroʼbaʼ ni napa stale binni casi yudé nuu lu guidxilayú. 10 Dané naa guendabiaaniʼ ne guendariene para ganda guneʼ mandar guidxi riʼ, purtiʼ ¿tuu ndiʼ zanda guni juzgar ti guidxi naroʼbaʼ casi xquídxiluʼ yaʼ?».
11 Para ná Dios rabi Salomón: «Cumu nga nga ná ladxidoʼloʼ ne qué ninábaluʼ naa cosa risaca, nin gusisácacabe lii, nin gatiʼ ca ni nanalaʼdxiʼ lii ne nin guibániluʼ xadxí,* sínuque gunábaluʼ naa guendabiaaniʼ ne guendariene para guni juzgarluʼ xquidxeʼ, ni bidieeʼ lii para gácaluʼ rey stiʼ la? 12 zacaaluʼ guendabiaaniʼ ne guendariene; peru laaca zudieeʼ lii cosa risaca ne zusisácacabe lii. Qué huayuu dxi ne qué ziuu dxi gapa sti rey guiráʼ ndiʼ».
13 Para biree Salomón de lugar ra nasoo ni nuu Gabaón, frente de yoo ra raca reunión, ne zeʼ Jerusalén; ne gúcabe rey stiʼ guidxi Israel. 14 Bitale Salomón ca carru* ne ca caballu* stiʼ. Beeda gápabe ti mil tapa gayuaa carru ne doce mil caballu* ni bizuhuaabe ndaaniʼ ca guidxi ra riaapaʼ ca carru stibe ne ndaaniʼ guidxi Jerusalén, gaxha de ra nuube. 15 Tantu stale plata ne oro guyuu Jerusalén dxi biʼniʼ mandar rey que dede ruluíʼcani guié ni zanda guidxélacabe ratiica si, ne bitálebe stale tablón de cedru casi ca sicómoro ni nuu Sefelá. 16 De ndaaniʼ guidxi Egipto reeda ca caballu stiʼ Salomón; maca pur manada rizíʼ ca xpinni Salomón ca caballu que* ne maca nexheʼ preciu stícame. 17 Cada carru rizíʼcabe Egipto risaca xhoopaʼ gayuaa pieza de plata ne cada caballu risaca ti gayuaa cincuenta pieza de plata. De raqué ruseendacabe cani ra nuu guiráʼ ca rey stiʼ ca hitita ne ra nuu ca rey stiʼ Siria.