Primé carta stiʼ Juan

1 Cuséʼndadu carta riʼ ra nuutu para güínedu laatu de ni* maca xadxí de nuu.* Bicaʼdiágadu laabe, biduyadxíchidu laabe, gudánadu laabe ne canacaabe diidxaʼ ni rudii guendanabani 2 (dxandíʼ, dxi bihuinni guendanabani que, laapedu bidúʼyadu ni ne cudiʼdu testimonio ne cayuínedu laatu de laani, dxiqué guyuu guendanabani ni qué zaluxe riʼ ra nuu Bixhózenu peru despué bidúʼyadu ni). 3 Cayuínedu laatu ni maʼ bidúʼyadu ne ni maʼ binadiágadu ti chúʼnetu laadu tobi si,* cásica nuudu tobi si né Bixhózenu ne Xiiñiʼ, Jesucristu. 4 Nga runi cucaʼdu guiráʼ ndiʼ para guizaa guendanayecheʼ stinu.*

5 Racaláʼdxidu gábidu laatu ni gudxi Jesús laadu: Dios nga biaaniʼ ne gastiʼ guelacahui ra nuu. 6 Pa guininu «Nuunu tobi si* né laabe», peru canazárunu lu guelacahui la?* cusiguiinu ne cadi nabáninu casi ná ni dxandíʼ. 7 Peru pa canazanu lu biaaniʼ* cásica nuu Dios lu biaaniʼ la? nuunu tobi si,* ne rusiá rini stiʼ Jesús, Xiiñibe, guiráʼ pecadu stinu.

8 Pa guininu «Qué rucheʼnu»,* caguítenu laca laanu ne gastiʼ ni dxandíʼ luguianu. 9 Fiel Dios ne runi ni jneza,* nga runi pa guni confesarnu ca pecadu stinu la? zuni perdonarbe ca pecadu stinu ne zusiabe laanu de guiráʼ ni cadi jneza.* 10 Pa guininu «Qué huacheʼnu»,* casi ñaca nininu rusiguii Dios ne qué ricaanu stiidxabe.*