Primé libru de Reyes

19 De raqué gudxi Acab Jezabel guiráʼ ni biʼniʼ Elías ne ximodo biiti guiráʼ profeta que né espada. 2 Ngue runi biseendaʼ Jezabel tuuxa chitidxi Elías: «¡Guni castigar ca dios ca naa pa guixíʼ biaʼ oraríʼ caʼruʼ guuteʼ lii casi biitiluʼ cada tobi de laacabe!». 3 Guizáʼ bidxibi Elías, ngue runi bixooñelú para guilá. Yendabe Beer-Seba, ti guidxi stiʼ Judá, ne raqué bisaanabe hombre ni racané laabe. 4 Para biuube lu desiertu ne guzabe guidubi ti dxi dede yendabe ra nuu ti yaga retama ne guribe xáʼnani. Canábabe gátibe ne caniʼbe: «¡Maʼ ngasi, Jehová! Biiti naa, purtiʼ guirutiʼ nacaʼ cueʼ ca bixhozebiidaʼ».*

5 Óraque gúʼtabe xaʼnaʼ yaga retama que ne gucuá bacaandaʼ laabe. Peru málasi gudaʼnaʼ ti ángel laabe ne ná rabi laabe: «Biasa, gudó xiixa». 6 Ora bixheleʼ lube, biiyabe cueʼ íquebe nexheʼ ti pan redondo lu caadxi guié nandáʼ ne zuhuaa ti jarra nisa. Gudobe ne güeʼbe, ne gúʼtabe sti biaje. 7 Gupa si ratu, biguetaʼ ángel stiʼ Jehová ra nuube, gudaʼnaʼ laabe ne ná rabi laabe: «Biasa, gudó. Pacaa qué zuni huantarluʼ viaje ca». 8 Para biásabe, gudobe ne güeʼbe. Ne ni gudobe que bidiini stipa laabe para guzabe 40 dxi ne 40 gueelaʼ dede yendabe Horeb, dani stiʼ Dios ni dxandíʼ.

9 Raqué guyuube ndaaniʼ ti cueva ne raqué biaanabe huaxhinni que. Málasi binadiágabe cayabi Jehová laabe: «Elías, ¿xi cayúniluʼ raríʼ pue?». 10 Para nabe: «Qué huayuu dxi gusaana de guneʼ adorar Jehová si, Dios stiʼ ca ejércitu. Maʼ qué ñuni cumplir guidxi Israel acuerdu ni biʼniné lii, maʼ binidécabe ca altar stiluʼ ne maʼ biiticabe ca profeta stiluʼ né espada, maʼ naa si beeda guiaanaʼ. Ne yanna nuucabe guuticabe naa». 11 Peru ná Dios rabi laabe: «Biree ne bizuhuaa lu dani ca nezalú Jehová». Óraque peʼ zidiʼdiʼ Jehová neza raqué. Guizáʼ reciu bindubi ti bi, dede gundaani ca dani que ne binideni ca guié dani que nezalú Jehová, peru cadi nuu Jehová lu bi que. De raqué guca ti xu roʼ, peru cadi nuu Jehová lu xu roʼ que. 12 Despué de guca xu roʼ que biree bele, peru cadi nuu Jehová lu bele que. Despué de bele que biree ti ridxi nadóʼ ne chaahuidugá. 13 Casi binadiaga Elías ridxi que, oraqueca bichii lú né lari stiʼ,* para bireebe ne yeguzuhuaabe entrada stiʼ cueva que. Óraque gunabadiidxaʼ ridxi que laabe: «Elías, ¿xi cayúniluʼ raríʼ pue?». 14 Para nabe: «Qué huayuu dxi gusaana de guneʼ adorar Jehová si, Dios stiʼ ca ejércitu. Maʼ qué ñuni cumplir guidxi Israel acuerdu ni biʼniné lii, maʼ binidécabe ca altar stiluʼ ne maʼ biiticabe ca profeta stiluʼ né espada, maʼ naa si beeda guiaanaʼ. Ne yanna nuucabe guuticabe naa».

15 Para ná Jehová rabi laabe: «Biguetaʼ ne guyé lu desiertu stiʼ Damasco. Ora chindaluʼ raqué, biʼniʼ Hazael rey stiʼ Siria. 16 Gulí Jehú, xnietu Nimsí, para gaca rey stiʼ Israel. Ne gulí Eliseo* xiiñiʼ Safat de Abel-Meholá para gaca profeta ne guiaana lugar stiluʼ. 17 Guiráʼ ni guilá de lu náʼ Hazael zuuti Jehú laacaʼ; ne guiráʼ ni guilá de lu náʼ Jehú zuuti Eliseo laacaʼ. 18 Nuuruʼ gadxe mil binni ndaaniʼ guidxi Israel ni caʼruʼ guzuxibi nezalú Baal ne qué huadiicaʼ bixiduʼ laabe».

19 Para biree Elías de raqué ne yendabe Eliseo xiiñiʼ Safat cucaa surcu lu layú. Zániru 12 yunta toro nezalú. Ne laabe cayuninebe últimu yunta que dxiiñaʼ. Para bidxiña Elías ra nuube ne bilaa lari stiʼ* que luguiabe. 20 Oraqueca bisaana Eliseo ca toro que ziguxooñeʼ ziugaanda Elías ne nabe rábibe laa: «Bidii lugar naa chaaʼ chigudieeʼ bixiduʼ jñaaʼ ne bixhozeʼ ti chinandaʼ lii». Para ná Elías rabi laabe: «Guyé, cadi cucueeza diaʼ lii». 21 Ngue runi bireebe zebe, zinebe chupa toro ne biitibe laacame. Biquiiñebe yaga stiʼ aradu ne ayubu que para ugaaguibe beela stiʼ ca toro que. De raqué bidiibe ni binni ne gudocaʼ. Despué bireebe zinándabe Elías ne bizulú bíʼnibe xhiiñaʼ.