Guiropa libru de Crónicas

34 Napa Josías xhono iza dxi beeda gaca rey, ne biʼniʼ mandarbe 31 iza ndaaniʼ guidxi Jerusalén. 2 Bíʼnibe ni jneza nezalú Jehová ne yenándabe ni biʼniʼ David, bixhozebiidabe.* Qué nireechube nin ladu derechu nin ladu bigaʼ.*

3 Ne ante gusaabe xhono iza de cayuni mandarbe, dxi nahuiinirube, bizulú biyúbibe Dios stiʼ David, bixhozebiidabe; ne ante gusaabe 12 iza de cayuni mandarbe, bizulú bisiabe ndaaniʼ guidxi Judá ne Jerusalén, guleebe ca lugar ra nasoo* que ne ca poste ni runi adorar binni, ca bidóʼ ne ca estatua de guiibaʼ* que. 4 Ne bisábacabe ca altar stiʼ ca dios Baal que nezalube. Laaca bisábabe ca altar ra ruzaaquicabe inciensu ni nuu luguiácani. Ne gundaabe ca poste ni runi adorar ca binni que, ca bidóʼ ne ca estatua de guiibaʼ* que; binidebe cani ne bicheechebe dé que luguiáʼ ca baʼ ra gaʼchiʼ ca binni ni biʼniʼ sacrificiu para laacani. 5 Ne bizaaquibe ca dxitaladi ca sacerdote que lu ca altar sticaʼ. Zaqué nga bisiabe guidxi Judá ne Jerusalén.

6 Ne ra nuu ca lugar ni gucadé stiʼ guidxi Manasés, Efraín, Simeón ne dede Neftalí 7 bisábabe ca altar que ne gundaabe ca poste ni runi adorar ca binni que ne ca bidóʼ dede ra bíʼnibe cani dé; bisábabe ca altar ra ruzaaquicabe inciensu ni nuu lu guidubi naca layú stiʼ Israel, ne despué de ngue, biguétabe Jerusalén.

8 Ante gusaabe 18 iza de cayuni mandarbe, despué de bisiabe guidxi que ne templu* que, biseendabe Safán xiiñiʼ Azalías, Maaseya —xaíque guidxi que— ne Joá xiiñiʼ Joacaz, ni riné ti registru para laabe, chiguni chaahuicaʼ lidxi Jehová, Dios stibe. 9 Guyécabe ra nuu Hilquías, sacerdote ni jma risaca, ne bidiicabe laabe bueltu ni bedanécabe ra lidxi Dios, bueltu ni bitopa ca levita ni rapa ra puertaʼ, ni bedané ca binni de Manasés, Efraín ne xcaadxi binni de Israel, de Judá, de Benjamín ne ca binni ni nabeza ndaaniʼ guidxi Jerusalén. 10 De raqué bidiicabe bueltu que ca hombre ni cayuuyaʼ gaca dxiiñaʼ ra lidxi Jehová. Ne biquiiñeʼ ca trabajador ni cayuni dxiiñaʼ ra lidxi Jehová bueltu que para guni chaahuicaʼ yoo que. 11 Bidiicabe ni ca artesanu ne ca obreru para sicaʼ guié ni maca bigá ne yaga naguidxi para guáʼ ca yoo ni bidii ca rey stiʼ Judá lugar gaca feu ne para guchaacabe ca muriú stícani.

12 Jneza biʼniʼ ca hombre que xhiiñacaʼ. Ne ca levita ni biʼyaʼ xhiiñacabe nga Jáhat ne Abdías —ca ni zeeda de ca merarita—, ne Zacarías ne Mesulam —ca ni zeeda de ca cohatita—. Ne ca levita, ca ni naca músicu ni nanna guxhidxi que nga 13 ca ni ruuyaʼ dxiiñaʼ ni runi xcaadxi trabajador* que ne laca laacabe nga ca ni ruuyaʼ gaca xcaadxi tipu dxiiñaʼ; ne xcaadxi levita que nácacaʼ secretariu, hombre ni napa autoridad ne nuu de laacaʼ rápacaʼ ra puertaʼ.

14 Laga cabeecabe bueltu ni bedanécabe ra lidxi Jehová, bidxela sacerdote Hilquías libru ra ca Ley stiʼ Jehová, ni bidii Moisés guidxi que. 15 Para gudxi Hilquías secretariu Safán: «Bidxelaʼ libru ra cá Ley que ra lidxi Jehová», para bidii Hilquías libru que Safán. 16 Para yené Safán libru que ra nuu rey que; ne nabe rábibe laa: «Cayuni ca mozo stiluʼ guiráʼ ni bicaabiluʼ laacaʼ. 17 Bitópacabe bueltu ni nuu ra lidxi Jehová ne bidiicabe ni ca hombre ni cayuuyaʼ gaca ca dxiiñaʼ ca ne ca trabajador». 18 Ne laaca gudxi secretariu Safán rey que: «Bidii sacerdote Hilquías naa ti libru». Ne bizulube cayuundabe ni nezalú rey que.

19 Casi binadiaga rey que ni ná Ley que, gucheza xhaba. 20 Para biʼniʼ mandar rey que Hilquías, Ahicam xiiñiʼ Safán, Abdón xiiñiʼ Miqueas, secretariu Safán ne Asaya, mozo stiʼ rey que: 21 «Laché, lachinabadiidxaʼ Jehová xi naquiiñeʼ guneʼ ne xi naquiiñeʼ guni ca binni ni riaana de Israel ne de Judá pur ni cá lu libru ni bidxélatu ca, purtiʼ guizáʼ naroʼbaʼ xiana ni zedané Jehová luguianu purtiʼ qué nuzuubaʼ ca bixhozebiidanu stiidxaʼ Jehová, qué ñuni cumplírcabe guiráʼ ni cá lu libru riʼ».

22 Para biree Hilquías ziné ca hombre ni bisendané rey que laa, guyécabe ra nuu profetisa Huldá. Xheelaʼ gunaa riʼ nga Salum —xiiñiʼ Ticvá, xiiñiʼ Harhás—, ti hombre ni rapa lari.* Nabeza Huldá Guiropa Barriu stiʼ Jerusalén ne raqué guniʼnécabe laabe. 23 Para ná gunaa que rabi laacabe: «Ndiʼ nga ni ná Jehová, Dios stiʼ Israel: “Lagabi ndiʼ hombre biseendaʼ laatu ra nuaaʼ: 24 «Ndiʼ nga ni ná Jehová: “Zuseendaʼ ti castigu lugar riʼ ne para guiráʼ ca binni nabeza racá, ne guiráʼ ca castigu ni zeeda lu libru ni bíʼndacabe nezalú rey stiʼ Judá. 25 Purtiʼ bisaanacabe naa ne cayúnicabe guʼxhuʼ stiʼ sacrificiu para xcaadxi dios para guchiichicabe naa né guiráʼ ni cayúnicabe, nga runi ziaba xiana stinneʼ lugar riʼ casi ti bele ni qué zazuíʼ”». 26 Peru lagabi rey stiʼ Judá, ni biseendaʼ laatu para guinabadiidxaʼ Jehová: «Ndiʼ nga ni ná Jehová, Dios stiʼ Israel: “Ndiʼ nga ni chitidxeʼ lii de ca diidxaʼ ni binadiágaluʼ que: 27 cumu biguudxi ladxidoʼloʼ ne guca humillarluʼ nezaluáʼ ora binadiágaluʼ ni gunieeʼ chiguizaaca lugar riʼ ne ca binni ni nabeza ndaanini, ne gúcaluʼ humilde nezaluáʼ, guchézaluʼ xhábaluʼ ne biinaluʼ nezaluáʼ la? naa laaca maʼ bicaadiagaʼ lii —ná Jehová—. 28 Nga runi zuchiñaʼ lii ra nuu ca bixhozebiidaluʼ,* né guendariuudxí zucaachicabe lii ndaaniʼ baʼ stiluʼ ti cadi gúʼyaluʼ castigu chiguseendaʼ lugar riʼ ne para ca binni ni nabeza luni”»”».

Para bireecabe zécabe zitídxicabe ca diidxaʼ riʼ rey que. 29 Para bisendacaa rey que guiráʼ hombre huaniisi* de Judá ne de Jerusalén. 30 Despué de ngue guyé rey que ra lidxi Jehová, laa ne guiráʼ ca hombre de Judá, ca binni ni nabeza Jerusalén, ca sacerdote ne ca levita —guidubi naca guidxi que, cásica ni huaniisi zaqueca xcuidi—, ne biindanebe laacaʼ guiráʼ ca diidxaʼ ni zeeda lu libru ra cá acuerdu ni bidxélacabe ra lidxi Jehová. 31 Para bizuhuaa rey que nezalúcabe ne biʼniʼ ti acuerdu* nezalú Jehová ra biʼniʼ prometerbe zúnibe ni ná Jehová ne zinándabe ca mandamientu, ca stiidxaʼ* ne ca regla stiʼ de guidubi ladxidoʼbe ne guidubi xhiálmabe ra guni cumplirbe ni ná acuerdu ni cá lu libru que. 32 Laaca gunábabe guiráʼ ca binni de Jerusalén ne Benjamín gudii stiidxacaʼ zuni cumplircaʼ ni. Ne ca ni nabeza Jerusalén bíʼnicaʼ ni ná acuerdu stiʼ Dios, Dios stiʼ ca bixhozebiidacaʼ. 33 Gulee Josías guiráʼ ca cosa* yuudxuʼ ni nuu lu ca layú stiʼ ca israelita, ne gúdxibe ca binni de Israel guni adorarcaʼ Jehová, Dios sticaʼ. Biaʼ dxi bibánibe, qué nireechucaʼ de ninándacaʼ Jehová, Dios stiʼ ca bixhozebiidacaʼ.