Guiropa libru stiʼ Samuel

12 Ngue runi biseendaʼ Jehová Natán ra nuu David. Ora guyuube ra nuu David, gúdxibe laa: «Guyuu chupa hombre ca ndaaniʼ ti guidxi. Tobi que ricu laa ne stobi que pobre. 2 Hombre ricu que napa stale dendxuʼ ne vaca, 3 peru hombre pobre que tobi lucha si dendxuʼ napa, ni guzíʼ. Rápabe laame ne ziniisime lade ca xiiñibe. Ruyaanabe laame né biaʼ nápasibe, reʼme nisa ndaaniʼ vasu stibe ne rásime ndaaniʼ nabe. Beeda gácame casi ti xiiñibe. 4 Ti dxi, beeda ti hombre beeda ganna hombre ricu que, peru qué ninabe ñuutibe ti dendxuʼ o ti vaca stibe para ñúnibe ti guendaró. Lugar de ngue, gucuaabe dendxuhuiiniʼ stiʼ hombre pobre que, biitibe laame ne bíʼnibe ti guendaró para go hombre beeda ganna laabe que».

5 Ora binadiaga David ni, guizáʼ bidxiichinebe hombre que ne rábibe Natán: «¡Casi peʼ nuu Jehová, naquiiñeʼ gatiʼ hombre ca! 6 Pur cosa malu bíʼnibe ca, naquiiñeʼ quíxebe tapa biaje biaʼ saca dendxuhuiiniʼ ca».

7 Para ná Natán rabi David: «¡Lii nga hombre ca! Ne ndiʼ nga ni ná Jehová, Dios stiʼ Israel: “Naa gulieeʼ lii para gácaluʼ rey stiʼ Israel ne bilaʼyaʼ lii de lu náʼ Saúl. 8 Biale de naa gudieeʼ lii guiráʼ ni napa xpixuaanaluʼ ne bidieeʼ lii guiráʼ xheelabe ndaaniʼ naluʼ. Laaca bidieeʼ lii guidxi Israel ne Judá para guni mandarluʼ. Ne cadi ngasi, guyuaaʼ dispuestu gúneruaʼ jma cosa pur lii. 9 ¿Xiñee qué nucaadiágaluʼ guiráʼ ni gudxi Jehová lii ne bíʼniluʼ ti cosa malu nezalube pue? ¡Biitiluʼ Urías, hitita que, né espada! Ne despué de bidiiluʼ lugar biiti ca ammonita laabe né espada, biaananeluʼ xheelabe ne bichaganaluʼ laa. 10 Nga runi, siempre ziuu guendanagana* ra lídxiluʼ, purtiʼ qué nucaadiágaluʼ naa ne gúxhaluʼ xheelaʼ Urías, hitita que, ne bichaganaluʼ laa”. 11 Ndiʼ nga ni ná Jehová: “Ndiʼ nga ca yuubaʼ ni chiguseendaʼ para lii: laca ndaaniʼ lídxiluʼ zaree binni ni guniná lii. Ne nezaluluʼ, zaxhaʼ guiráʼ xheelaluʼ ne zudieeʼ laacabe sti hombre. Zatané hombre ca laacabe ne zanna guiráʼ binni ni. 12 Lii la? bicaachiluʼ ni bíʼniluʼ, peru naa zuneʼ guiráʼ ndiʼ nezalú guidxi Israel ne guiráʼ binni zanna ni”».

13 Óraque ná David rabi Natán: «Maʼ bicheeniáʼ Jehová». Para ná Natán rabi David: «Jehová la? maʼ biʼniʼ perdonar pecadu stiluʼ. Qué zátiluʼ. 14 Peru, cumu qué ñápaluʼ respetu Jehová pur ni bíʼniluʼ ca la? zati xiiñiluʼ ni deruʼ gule ca».

15 Despué de ngue biree Natán zibíʼ ra lidxi.

Ne bidii Jehová lugar gaca huará xiiñiʼ David, baʼduhuiiniʼ ni gupanebe xheelaʼ Urías. 16 Ngue runi gunabaʼ David Dios gulá baʼduhuiiniʼ que. Qué lica ninabe ñobe gastiʼ ne bieguyoobe, ne guidubi gueelaʼ maʼ néxhebe layú. 17 Para bidxiña ca hombre huaniisi* nuu ra lídxibe que ra nuube ne gucaláʼdxicaʼ nindísacaʼ laabe, peru qué ninabe ne laaca qué ninabe ñónebe laacaʼ. 18 Lu gadxe gubidxa que guti baʼduhuiiniʼ que. Peru cadxibi ca mozo stiʼ David gábicaʼ laabe guti baʼduhuiiniʼ que. Ne nacaʼ: «Pa dxi nabani baʼduhuiiniʼ ca, rinínenu rey ca ne qué rucaadiaga laanu, yanna, ¿ximodo gábinu laabe guti baʼduhuiiniʼ ca yaʼ? Zándaca gúnibe ti guendahuati».

19 Ora biʼyaʼ David cayuíʼ ca xpínnibe diidxaʼ chahuidugá para cadi gunadiágabe, bidiibe cuenta maʼ guti baʼduhuiiniʼ que. Para gunabadiidxaʼ David ca mozo stiʼ: «¿Ñee guti baʼduhuiiniʼ que la?». Para bicábicabe laabe: «Gútibe». 20 Óraque biasa David layú que. Gúzebe, guxúbibe aceite guidubi ládibe, bichaabe de lari ne zebe ra lidxi Jehová para guni adorarbe laa. Despué biguétabe ra lídxibe* ne gunábabe guedanécabe xiixa para gobe. 21 Para ná ca mozo stibe rabi laabe: «¿Xi cayácaluʼ pue? Dxi nabani baʼduhuiiniʼ que, qué lica ninaluʼ ñoloʼ gastiʼ ne guidubi dxi maʼ cayuunaluʼ. Ne yanna casi gúnnaluʼ maʼ guti baʼduhuiiniʼ ca, biásaluʼ ne gudoloʼ». 22 Para bicábibe laacaʼ: «Dxi nabani baʼduhuiiniʼ ca qué ñahuaʼ gastiʼ ne guidubi dxi biinaʼ purtiʼ guníʼ iqueʼ “Zándaca ziá Jehová naa ne zulá baʼduhuiiniʼ ca”. 23 Peru yanna cumu maʼ gútibe la? ¿Xi para ndiʼ guiaanaʼ sin gahuaʼ? ¿Zanda xa gusibaneʼ laabe? Jma nagueenda naa nga gateʼ que guibánibe nagasi».

24 De raqué guyé David yetixhedxibe ladxidóʼ xheelabe Bat-Seba. Gutanebe laa ne gudiʼdiʼ si ti tiempu gupa gunaa riʼ ti baʼduhuiiniʼ ne gulee lácabe laa Salomón,* ne guizáʼ gunnaxhii Jehová laabe. 25 Cumu nadxii Jehová baʼduhuiiniʼ que la? gúdxibe profeta Natán cuee lácabe laabe Jedidías.*

26 Cadindeneruʼ Joab Rabá, xquidxi ca ammonita, ne biʼniʼ ganarbe parte de guidxi ra nuu palaciu stiʼ rey que. 27 Ngue runi biseendaʼ Joab caadxi hombre chitidxi David: «Maʼ bicaaluaʼ Rabá ne maʼ bineʼ ganar guidxi ra nuu nisa* que. 28 Yanna, bichiña xcaadxi soldadu ca ne bicaalú guidxi ca ne biʼniʼ ganar ni, ti cadi naa guneʼ ganar guidxi riʼ ne gusisácabe naa».*

29 Ngue runi bichiña David guiráʼ ca soldadu que ne zebe Rabá, bicaalube guidxi que ne biʼniʼ ganarbe ni. 30 Ne gúxhabe corona nuu ique Malcam,* nanaa corona riʼ ti talentu* de oro maca né ca guié sicarú nápani, ne guluucabe ni ique David. Laaca zinebe stale cosa risaca stiʼ guidxi que. 31 Laaca guleebe ca binni que de ndaaniʼ guidxi que ne bicaabe laacaʼ ugacaʼ guié, iquiiñecaʼ herramienta de guiibaʼ ni rugá ne iquiiñecaʼ jacha de guiibaʼ, ne gúnicaʼ ladríu. Zacá bíʼnibe guiráʼ guidxi stiʼ ca ammonita. Últimu la? biguetaʼ David ne guiráʼ ca soldadu stiʼ Jerusalén.