Primé libru de Reyes

17 Guyuu ti hombre ni guleza Galaad láʼ Elías,* tisbita laabe, ti dxi gúdxibe Acab: «¡Casi peʼ nuu Jehová, Dios stiʼ Israel ni runeʼ xhiiñaʼ,* qué ziaba gupa nin nisaguié ca iza zeeda riʼ dede qué guinieeʼ gácani!».

2 Laaca gudxi Jehová ca diidxaʼ riʼ Elías: 3 «Bixooñelú de raríʼ, guyé ladu rindani gubidxa ne bicachilú cueʼ valle* stiʼ Kerit, ladu rindani gubidxa de guiiguʼ Jordán. 4 Zeʼluʼ nisa ni cadiʼdiʼ ndaaniʼ valle ca ne zuseendaʼ ca cuervu chisaanacaʼ ni goloʼ racá». 5 Oraqueca bireebe zebe ne bíʼnibe casi peʼ gudxi Jehová laabe. Guyebe ne biaanabe cueʼ valle stiʼ Kerit, ladu rindani gubidxa de guiiguʼ Jordán. 6 Risaana ca cuervu que pan ne beela ra nuube siadóʼ, ne huadxí laaca risaanacame pan ne beela ra nuube, ne nisa ridiʼdiʼ ndaaniʼ valle que nga reʼbe. 7 Peru gudiʼdiʼ si chupa chonna gubidxa bibidxi nisa ni ridiʼdiʼ ndaaniʼ valle que purtiʼ qué huayaba nisaguié ndaaniʼ guidxi que.

8 Óraque gudxi Jehová Elías: 9 «Guyé Sarepta, guidxi ni nuu Sidón, ne biaana raqué. Ne zuneʼ mandar ti viuda gudii ni goloʼ». 10 Ngue runi bireebe zebe Sarepta. Ora yendabe ra entrada stiʼ guidxi que, biiyabe ti viuda cutopa yaga. Para bicaarídxibe laa ne gúdxibe laa: «Dané ti vasuhuiiniʼ nisa gueeʼ». 11 Ora zeʼ gunaa que zicaa nisa que, bicaarídxibe laa ne gúdxibe laa: «Biʼniʼ favor daneca ti ndaa pan gahuaʼ». 12 Para bicabi gunaa que laabe: «Casi nuu Jehová, Dios stiluʼ, dxandíʼ peʼ cayabeʼ lii, qué gapaʼ pan. Ni napaʼ siaʼ nga ti puñu harina ni nuu ndaaniʼ jarru naroʼbaʼ stinneʼ ne caadxihuiiniʼ aceite ni daʼ ndaaniʼ ti jarruhuiiniʼ. Ne yanna cutopaʼ caadxi yaga para guneʼ xiixa gahuaniáʼ xiiñeʼ. Ndiʼ nga últimu guendaró stidu ne oracaruʼ zátidu».

13 Óraque gudxi Elías laabe: «Cadi guidxíbiluʼ. Guyuu ne biʼniʼ ni naluʼ ca. Peru primeru biʼniʼ ti panhuiiniʼ redondo né biaʼ harina si ni nápaluʼ ne dané ni fuera riʼ. Óraca maʼ gúniluʼ xiixa para lii ne para xiiñiluʼ. 14 Purtiʼ ndiʼ nga ni ná Jehová, Dios stiʼ Israel: “Qué zará harina ni nuu ndaaniʼ jarru naroʼbaʼ ca ne qué zabidxi aceite ni daʼ ndaaniʼ jarruhuiiniʼ ca dede dxi gusaba Jehová nisaguié”». 15 Ngue runi biʼniʼ gunaa que ni gudxi Elías laa, ne stale dxi gupa Elías ne familia stiʼ gunaa que ni gocaʼ. 16 Qué nirá harina ndaaniʼ jarru naroʼbaʼ que ne qué nibidxi aceite ndaaniʼ jarruhuiiniʼ que, gúcani casi peʼ gudxi Jehová profeta Elías zazaaca.

17 Gudiʼdiʼ si ti tiempu, gucahuará xiiñiʼ gunaa ni nabeza ra cayaana Elías que, ne guca xiroo xquendahuará xiiñibe dede guti. 18 Para gudxi gunaa que Elías: «¿Xi bineʼ lii, hombre stiʼ Dios ni dxandíʼ? ¿Ñee beeduʼ para gusietenaláʼdxiluʼ naa donda stinneʼ ne para guutiluʼ xiiñeʼ la?». 19 Peru gudxi Elías laabe: «Dané naa xiiñiluʼ». Óraque bidii gunaa que laabe hombrehuiiniʼ que ne yenebe laa ndaaniʼ cuartu ni nuu ique yoo,* ra cayaanabe que, ne gudíxhebe laa lu cama ra ráʼtabe. 20 Ne bizulú bicaabe ridxi Jehová: «Jehová, Dios stinneʼ, ¿ñee zudiuu lugar dede né viuda ni cayaanaʼ ra lidxi riʼ guni sufrir ne gatiʼ xiiñiʼ la?». 21 Óraque gúʼtabe luguiáʼ hombrehuiiniʼ que chonna biaje ne gunábabe Jehová: «Jehová, Dios stinneʼ, bisibani hombrehuiiniʼ riʼ, por favor». 22 Bicaadiaga Jehová ni gunabaʼ Elías laa, para biguetaʼ gucuaa hombrehuiiniʼ que bi ne bibani sti biaje. 23 Para gucuaa Elías baʼduhuiiniʼ que, ne gundétebe laa de ndaaniʼ cuartu ni nuu ique yoo que. Ne yenebe laa ndaaniʼ yoo ra nuu jñaa. Óraque rábibe gunaa que: «Biiyaʼ, maʼ nabani xiiñiluʼ sti biaje». 24 Ora biʼyaʼ gunaa que ndiʼ, gúdxibe Elías: «Yanna huaxa nannaʼ dxandíʼ peʼ Dios biseendaʼ lii ne dxandíʼ guiráʼ diidxaʼ ni gudxi Jehová lii guiniʼluʼ».