Guiropa libru de Crónicas
28 Napa Acaz gande iza dxi beeda gaca rey, ne biʼniʼ mandarbe 16 iza ndaaniʼ guidxi Jerusalén. Qué ñúnibe ni jneza nezalú Jehová, cásica biʼniʼ David, bixhozebiidabe,* ni jneza. 2 Lugar de ngue, laga yenándabe ni biʼniʼ ca rey stiʼ Israel, ne dede bíʼnibe estatua de guiibaʼ* stiʼ ca bidóʼ Baal. 3 Laaca bíʼnibe guʼxhuʼ stiʼ sacrificiu ndaaniʼ valle stiʼ Xiiñiʼ Hinón* ne bizaaquibe ca xiiñibe lu bele, bíʼnibe ca cosa dxabaʼ ni runi ca guidxi ni gulee Jehová nezalú ca israelita. 4 Ne laaca bíʼnibe sacrificiu ne guʼxhuʼ stiʼ sacrificiu ca lugar ra nasoo,* lu ca danihuiiniʼ ne xaʼnaʼ guiráʼ ca yaga nagáʼ.
5 Ngue runi bisaanaʼ Jehová, Dios stibe, laabe lu náʼ rey stiʼ Siria, biʼniʼ ganárcabe laabe ne zinécabe stale xpínnibe Damasco. Laaca bisaana Dios laabe lu náʼ rey stiʼ Israel, ne biʼniʼ ganar rey riʼ laabe ne biiti stale xpínnibe. 6 Ti dxi si biiti Pécah, xiiñiʼ Remalías, ti gayuaa gande mil hombre nadxibalú ndaaniʼ guidxi Judá, purtiʼ bidxiidéchecaʼ Jehová, Dios stiʼ ca bixhozebiidacaʼ. 7 Ne Zicrí, ti soldadu efraimita, biiti Maseya, xiiñiʼ rey que, ne laaca biitibe Azricam hombre ni runi mandar ndaaniʼ palaciu* que, ne biitibe Elcaná, ti hombre risaca despué de rey que. 8 Laaca ziné ca israelita chupa gayuaa mil binni ni gunaazecaʼ de lade ca bíʼchicaʼ —gunaa, xiiñicabe hombrehuiiniʼ ne dxapahuiiniʼ—; laaca gúxhacabe stale cosa stiʼ ca binni riʼ ne zinécabe ni Samaria.
9 Peru raqué nuu ti profeta stiʼ Jehová ni láʼ Oded ne bireebe zidxagalube ejércitu ni zedayuu ndaaniʼ guidxi Samaria que. Ne rábibe laacaʼ: «¡Biaa! Cumu bidxiichiné Jehová, Dios stiʼ ca bixhozebiidatu, Judá la? nga runi bisaanabe laacaʼ lu natu, peru laatu nabé feu modo biititu laacabe ne dede guibáʼ biiyaʼ Dios ni. 10 Ne yanna laatu nuutu gúnitu ca binni de Judá ne de Jerusalén esclavu ne esclava stitu. Peru, ¿ñee cadi laaca nápatu donda nezalú Jehová, Dios stitu la? 11 Yanna, lagucaadiaga naa ne lagudxiguetaʼ ca binni ni gucuaatu lade ca bíʼchitu ni zedanetu casi esclavu, purtiʼ guizáʼ cadxiichiné Jehová laatu».
12 Ngue runi, caadxi xaíque stiʼ ca efraimita, Azarías xiiñiʼ Jehohanán, Berekías xiiñiʼ Mesilemot, Jehizquías xiiñiʼ Salum ne Amasá xiiñiʼ Hadlái, gudindenecaʼ ca soldadu ni biguetaʼ de lu guerra que 13 ne gúdxicabe laacaʼ: «Cadi cuʼtu ca binni ni gunaazetu ca raríʼ, purtiʼ zaaniʼ donda luguianu nezalú Jehová. Zutálesitu ca pecadu ne donda stinu pur ni nuutu gúnitu ca, maca la? stale donda nuanu yaʼ ne guizáʼ cadxiichiné Dios guidxi Israel». 14 Ngue runi gucuaa ca soldadu que ca binni ni gunaazecaʼ ne biʼniʼ entregárcabe laacaʼ ca príncipe ne guiráʼ ca ni bidxiña raqué ne laaca bidiicabe ca cosa ni gúxhacabe ca binni que. 15 De raqué gulícabe caadxi hombre para guni tender ca binni ni gunaazecabe que. Ne de lade ca cosa ni né ca soldadu que, guleecabe lari para gudiicabe ca binni ni cadi nacu lari. Bigácucabe ca binni riʼ lari, bidiicabe laacaʼ elaguidi, ni gocaʼ ne ni guecaʼ, ne laaca bidiicabe laacaʼ aceite para xhúbicaʼ ládicaʼ. Ne ca ni maʼ qué gapa stipa la? bidxiibacabe laacaʼ deche burru ne yenécabe laacaʼ ra nuu ca bíʼchicaʼ, ndaaniʼ guidxi Jericó, ni runibiáʼcabe casi guidxi palmera. De raqué biguétacabe Samaria.
16 Ca dxi que gunabaʼ rey Acaz ca rey stiʼ Asiria gacané laa. 17 Ne guyuu ca edomita ndaaniʼ guidxi Judá sti biaje, bicaalucaʼ ne zinecaʼ binni de raqué. 18 Laaca bicaalú ca filisteu ca guidxi ni nuu Sefelá ne ca ni nuu lu ca layú stiʼ Négueb ni nuu Judá, ne biʼniʼ ganárcabe Bet-Semes, Ayalón, Guederot, Socó ne ca guidxihuiiniʼ nuu gaxha de laacani, Timná ne ca guidxihuiiniʼ nuu gaxha de laani, ne Guimzó ne ca guidxihuiiniʼ nuu gaxha de laani; ne raqué biaanacabe. 19 Bidii Jehová lugar gacaná Judá pur donda stiʼ rey Acaz de guidxi Israel, purtiʼ bidii rey riʼ lugar guni Judá ni ná ique ne pur ngue guizáʼ bicheenecaʼ Jehová.
20 Ne lugar de ñacané Tilgat-Pilnéser, rey stiʼ Asiria laabe, laga bicaalú laabe ne bininá laabe. 21 Neca gulee rey Acaz guiráʼ ca cosa ni nuu ra lidxi Jehová, ra lidxi* rey ne ra lidxi ca príncipe que para gusigaʼdeʼ cani rey stiʼ Asiria, peru pur gana si bíʼnibe ni. 22 Ne neca cayacaná rey Acaz, jmaruʼ si bicheenebe Jehová. 23 Ne bizulú bíʼnibe sacrificiu para ca dios stiʼ Damasco nin né biʼniʼ ganarcaʼ laabe. Ne guniʼbe: «Cumu cayacané ca dios stiʼ ca rey stiʼ Asiria laacaʼ la? chigudieeʼ sacrificiu laacabe para gacanécabe naa». Peru pur biʼniʼ adorarbe laacaʼ gucanabe ne gucaná guidubi naca guidxi Israel. 24 Laaca bitopa Acaz guiráʼ cosa ni riquiiñeʼ ra lidxi Dios ni dxandíʼ ne binidebe cani, biseegube ca puertaʼ lidxi Jehová ne cada squina de ndaaniʼ guidxi Jerusalén bíʼnibe altar. 25 Ne ndaaniʼ guiráʼ ca guidxi stiʼ Judá bíʼnibe lugar ra nasoo para gúnibe guʼxhuʼ stiʼ sacrificiu para xcaadxi dios, ne zaqué bichiichibe Jehová, Dios stiʼ ca bixhozebiidabe.
26 Ne xcaadxi cosa ni bizaacabe, guiráʼ ca cosa ni bíʼnibe cá cani de primé ne últimu lu Libru stiʼ ca Rey stiʼ Judá ne stiʼ Israel. 27 Guti Acaz ne yanna maʼ caziiláʼdxibe casi caziilaʼdxiʼ ca bixhozebiidabe, ne bicaachicabe laabe ndaaniʼ guidxi Jerusalén. Peru qué niguucabe laabe ra gaʼchiʼ ca rey stiʼ Israel. Ne maʼ xiiñibe Ezequías beeda gaca rey.