Guiropa libru de Crónicas
31 Ora biluxe guiráʼ ngue, biree guiráʼ ca israelita ni nuu raqué zecaʼ ndaaniʼ ca guidxi stiʼ Judá ne binidecaʼ ca columna ni runi adorar binni, bisábacaʼ ca poste ni runi adorar binni ne binidecaʼ ca lugar ra nasoo* ne ca altar ni nuu guidubi naca Judá ne Benjamín, ne zaqueca bíʼnicabe ndaaniʼ ca guidxi stiʼ Efraín ne Manasés, dede ra binduuxecabe guirácani. Despué de ngue, guiráʼ ca israelita que biguétacaʼ ndaaniʼ xquídxicaʼ, cada tobi yebíʼ ra lidxi.
2 De raqué, guleechú Ezequías ca sacerdote ne ca levita que pur grupu sticaʼ, para ganda gúnicaʼ dxiiñaʼ ni gucuaacaʼ. Rudiicabe ca ofrenda ni riaʼquiʼ ne ca sacrificiu de paz, rúnicabe xhiiñaʼ Dios, ne rudiicabe xquixe peʼ Dios ne rusisácacabe laa ra nuu ca puertaʼ stiʼ ca patiu* stiʼ Jehová. 3 De lade guiráʼ ni bidii rey que, bidiibe stale maniʼ para ca ofrenda ni riaʼquiʼ, bidiibe maca né para ca ofrenda ni riaʼquiʼ siadóʼ ne huadxí, zaqueca para ca ofrenda ni riaʼquiʼ ca sábadu, dxi riree beeuhuiiniʼ ne ca dxi raca saa, casi maca cá ni lu Ley stiʼ Jehová.
4 Laaca biʼniʼ mandarbe ca binni ni nabeza Jerusalén gudiicaʼ ca sacerdote ne ca levita ca cosa ni caquiiñeʼ guicaacaʼ, para ganda gúnicabe guiráʼ dxiiñaʼ stícabe casi modo peʼ ná ley stiʼ Jehová. 5 Casi peʼ binadiaga ca israelita que xi caquiiñeʼ gúnicaʼ, bedanecaʼ ca primé cosa ni rudii lu layú sticaʼ, biidxiʼ, vinu nacubi, aceite, miel ne bedanérucabe stale cosa ni rudii lu ca layú stícabe; guizáʼ stale cosa bedanécabe, chii por ciento stiʼ guirani. 6 Ne ca binni de Israel ne de Judá ni nabeza ndaaniʼ ca guidxi stiʼ Judá laaca bedanecaʼ chii por ciento de ca vaca ne ca dendxuʼ sticaʼ, ne bedanecaʼ chii por ciento de ca cosa ni rusigáʼdecaʼ Dios, ni maʼ guleechucaʼ para Jehová, Dios sticaʼ. Bedanécabe guirácani ne bíʼnicabe cani stale montón. 7 Lu beeu guionna que bizulú bíʼnicabe montón ca cosa ni bedanécabe, ne bilúxecabe lu beeu gadxe. 8 Ora beeda Ezequías ne ca príncipe que ne biiyacaʼ ca montón que, bisisácacaʼ Jehová ne guluucaʼ ndaayaʼ xquídxibe Israel.
9 Para gunabadiidxaʼ Ezequías ca sacerdote ne ca levita que paraa biree guiráʼ cosa ni riʼ montón que. 10 Óraque ná Azarías, xaíque stiʼ ca sacerdote ni zeeda de familia stiʼ Sadoc, rabi laabe: «Dede dxi bizulú bedanécabe ca cosa ni cudiicabe para ra lidxi Jehová, cayó ca binni riʼ dede cadxá ndaanicaʼ ne stáleruʼ ni cayuni sobra, purtiʼ maʼ guluu Jehová ndaayaʼ xquidxi, ne guiráʼ ni cayuuyaluʼ riʼ nga ni maʼ biʼniʼ sobra».
11 Para gunabaʼ Ezequías laacabe cúʼcabe listu ca cuartu ra riaapaʼ cosa ni nuu ra lidxi Jehová. Ne zaqué bíʼnicabe ni. 12 Ne qué nusaana de ñedanécabe donación, chii por ciento de ca cosa ni nápacabe* ne ca cosa ni maʼ guleechúcabe para gusigáʼdecabe Dios. Ne gunábacabe Conanías, levita que, guʼyaʼ guiaapaʼ guiráʼ cosa que, ne bíʼchibe Simeí nga ni runi mandar despué de laabe. 13 Ne Jehiel, Azazías, Náhat, Asahel, Jerimot, Jozabad, Eliel, Ismakías, Máhat ne Benaya nga gucané Conanías ne bíʼchibe Simeí, purtiʼ rey Ezequías biʼniʼ mandar laacabe gúnicabe ni, ne Azarías nga naca xaíque ra lidxi Dios ni dxandíʼ. 14 Ne Coré xiiñiʼ Imná, levita ni rapa ra puertaʼ ni nuu ladu rindani gubidxa que nga rapa guiráʼ ca ofrenda ni rudii ca binni que de guidubi ladxidoʼcaʼ para Dios ni dxandíʼ ne laabe nga riguiizibe ca donación ni rudiicabe Jehová ne ca cosa ni maʼ guleechúcabe para gusigáʼdecabe laa. 15 Ne laaca laabe nga ruuyabe dxiiñaʼ ni runi Edén, Miniamín, Jesúa, Semaya, Amarías ne Secanías ndaaniʼ ca guidxi stiʼ ca sacerdote. Cumu nácacabe hombre de confianza la? dxiiñaʼ stícabe nga quíʼzicabe ca cosa que lu ca bíʼchicabe ni nuu lu ca grupu que, gastiʼ naca pa nahuiinicaʼ o pa maʼ huaniisicaʼ, biaʼ queca naquiiñeʼ gudiicabe guiracaʼ. 16 Ne laaca riguiizicabe ca cosa que lu ca ni cá lá lu registru stiʼ ca familia sticaʼ, laacabe nga ca hombre ni reeda guiráʼ dxi para guni dxiiñaʼ ra lidxi Jehová ne para gúnicaʼ dxiiñaʼ ni raca caber grupu sticaʼ, ne laaca riguiizicabe ca cosa riʼ lu ca xiiñiʼ ca hombre que, ca hombrehuiiniʼ ni napa chonna iza para delante.
17 Guca registru stiʼ ca familia stiʼ ca sacerdote ne ca levita ni napa gande iza para delante, según ca familia sticaʼ neza bixhózecaʼ ne según dxiiñaʼ ni runi cada grupu sticaʼ. 18 Ne lu registru stiʼ ca familia stícabe zeeda lá xheelacabe, ca xiiñicabe hombre ne gunaa, dede ca ni jma nahuiiniʼ, guiráʼ ca levita —purtiʼ bireechúcabe para gúnicabe xhiiñaʼ Dios ne gucuaacabe ca dxiiñaʼ riʼ purtiʼ nácacabe hombre de confianza—, 19 ne laaca zeeda lá ca ni zeeda de familia stiʼ Aarón, ca ni naca sacerdote ni nabeza lu ca layú ra rigaa guixi stiʼ ca guidxi ni gucuaacaʼ. Ndaaniʼ guiráʼ ca guidxi que gulícabe hombre para quíʼzicaʼ guendaró lu ca hombre ni naca sacerdote ne lu guiráʼ ca ni gucuá lá lu registru stiʼ ca familia stiʼ ca levita.
20 Biʼniʼ Ezequías guiráʼ ndiʼ ndaaniʼ guidubi naca Judá. Bíʼnirube cosa galán ne ni jneza nezalú Jehová, Dios stibe, ne qué nucheenebe laa. 21 Ne guiráʼ dxiiñaʼ ni bíʼnibe para guyúbibe Dios stibe —ca dxiiñaʼ ni raca ra lidxi Dios ni dxandíʼ o ni bíʼnibe para chinándacabe Ley ne ca mandamientu stiʼ Dios—, bíʼnibe guirani de guidubi ladxidoʼbe, ne biaʼsi bireecani.