Guiropa libru stiʼ Samuel
10 Despué guti rey stiʼ ca ammonita, nga runi maʼ xiiñibe Hanún nga beeda gaca rey. 2 Para ná David: «Zacaniáʼ Hanún, xiiñiʼ Nahás, cásica gucané bixhózebe naa».* De raqué biseendaʼ David ca mozo stiʼ para chitixhedxicaʼ ladxidóʼ rey que pur guti bixhozebe. Peru, ora yendá ca mozo stiʼ David lu ca layú stiʼ ca ammonita, 3 gudxi ca príncipe stiʼ ca ammonita Hanún, rey sticaʼ: «¿Ñee rábiluʼ dxandíʼ biseendaʼ David ca mozo stiʼ para si quixhedxí ladxidoʼloʼ pur guti bixhózeluʼ la? ¿Ñee cadi rábiluʼ biseendabe laacaʼ para gueeda gundaachicaʼ ximodo nuu ndaaniʼ guidxi riʼ ne despué guibiguétacaʼ para gunitilucaʼ ni la?». 4 Para gucuaa Hanún ca mozo stiʼ David, ne bigabe galaa guicha ruaacaʼ, bigabe xhábacaʼ galaa galaa dede ra xáʼnacaʼ ne bidxiguétabe laacaʼ. 5 Ora gunna rey David ni bizaaca riʼ, ne pabiáʼ bisituícabe lu ca hombre riʼ la? biseendabe caadxi hombre chitidxi ca mozo stibe: «Laguiaana Jericó dede ora igaa guicha ruaatu, oracaruʼ maʼ guibiguétatu».
6 Gudiʼdiʼ si ti tiempu, bidii ca ammonita cuenta maʼ nanalaʼdxiʼ* David laacaʼ, para biseendacabe tu chitixe ca siriu de Bet-Rehob ne de Zobá para guieegucaʼ laacabe —biaʼsi gande mil soldadu ni rié a pie—, ne laaca gudíxecabe rey stiʼ Maacá ne ti mil xpinni ne doce mil hombre de Istob.* 7 Ora gunna David ni, biseendabe Joab ne guidubi ejércitu stibe, dede né ca soldadu ni jma nadipaʼ. 8 Laaca biree ca ammonita que ne yeguzuhuaacaʼ ra puertaʼ guidxi que para tíndecaʼ, ne ca siriu de Zobá ne Rehob, ca hombre de Istob* ne Maacá yeguzuhuaacaʼ sti ladu, lu ti layú ra napampa.
9 Ora biʼyaʼ Joab zeeda ca soldadu que delante ne atrá de laa, gulibe ca soldadu ni jma nanna tinde de Israel ne bizuhuaa chaahuibe laacaʼ para tindenecaʼ ca siriu. 10 Xcaadxi hombre que la? biseendabe laacaʼ ra nuu* bíʼchibe Abisái para guzuhuaa chaahuiʼ laacabe ne gucaalúcabe ca ammonita. 11 Ne gúdxibe laa: «Pa jma nadipaʼ ca siriu ca para naa la? gueedaluʼ gulaluʼ naa. Ne pa jma nadipaʼ ca ammonita ca para lii la? naa chaaʼ chigulaʼyaʼ lii. 12 Naquiiñeʼ gácanu nadxibalú ne cadi guidxíbinu tíndenu pur xquídxinu ne pur ca guidxi stiʼ Dios stinu, ne maʼ Jehová xcuenta guni ni racalaʼdxiʼ».*
13 Para biree Joab ne ca xpinni zigucaalucaʼ ca siriu, peru ora biʼyaʼ ca siriu que laabe bixoñelucaʼ. 14 Ora biʼyaʼ ca ammonita maʼ bixoñelú ca siriu, laaca bixoñelucaʼ de Abisái ne guyuucaʼ ndaaniʼ guidxi que. Despué de ngue maʼ qué nizananda Joab ca ammonita ne biguétabe Jerusalén.
15 Ora biʼyaʼ ca siriu maʼ biʼniʼ ganar guidxi Israel laacaʼ, bieegucaʼ sti biaje. 16 Ngue runi bisendacaa Hadadézer ca siriu ni nuu lu ca layú stiʼ Guiiguʼ* que ne guyécabe Helam. Ne Sobac, xaíque stiʼ ejércitu stiʼ Hadadézer, nga zániru lúcabe.
17 Ora yetídxicabe ni David, nagueendaca bisendacaabe guidubi naca ejércitu stiʼ Israel, gudíʼdicabe guiiguʼ Jordán ne yendácabe Helam. Óraque bizuhuaa chaahuiʼ ca siriu para gucaalucaʼ David ne gudindenecaʼ laabe. 18 Peru bixoñelú ca siriu que de ca israelita. Biiti David gadxe gayuaa hombre ni rusá carru* ni rié lu guerra ne cuarenta mil siriu ni riguiʼbaʼ caballu. Laaca bininabe Sobac, xaíque stiʼ ejércitu que, ne raqué gutiʼ. 19 Ora biʼyaʼ ca rey ni runi mandar Hadadézer biʼniʼ ganar guidxi Israel laacaʼ, nagueendaca biʼninécabe guidxi Israel ti tratu para cadi gucaalucaʼ laacabe ne guyuucabe dispuestu gúnicabe ni nacaʼ. Ne ca siriu que maʼ qué ninacaʼ ñacanecaʼ ca ammonita.