Guiropa libru de Crónicas
36 De raqué biʼniʼ ca binni guidxi que Jehoacaz, xiiñiʼ Josías, rey ndaaniʼ guidxi Jerusalén para cuibe lugar stiʼ bixhózebe. 2 Napa Jehoacaz 23 iza dxi guca rey ne biʼniʼ mandarbe chonna beeu ndaaniʼ guidxi Jerusalén. 3 Peru maʼ qué niná rey stiʼ Egipto ñuni mandarbe Jerusalén ne gunabaʼ rey riʼ guidxi que ti gayuaa talentu* de plata ne ti talentu de oro. 4 Peru cadi ngasi, laaca biʼniʼ rey stiʼ Egipto Eliaquim, biʼchiʼ Jehoacaz, rey stiʼ Judá ne Jerusalén, ne bichaabe lá ne gulee labe laa Jehoiaquim. Peru Jehoacaz biʼchiʼ Eliaquim la? ziné Nekó laa Egipto.
5 Napa Jehoiaquim 25 iza dxi beeda gaca rey ne biʼniʼ mandarbe 11 iza ndaaniʼ guidxi Jerusalén. Bíʼnibe ni cadi jneza nezalú Jehová, Dios stibe. 6 Guyé Nabucodonosor rey stiʼ Babilonia luguiabe para guinaazeʼ laabe ne gundiibi laabe né chupa cadena de cobre ne chiné laabe Babilonia. 7 Ne ziné Nabucodonosor caadxi cosa ni nuu ra lidxi Jehová ndaaniʼ guidxi Babilonia ne guluube cani ndaaniʼ palaciu stibe ni nuu Babilonia. 8 Xcaadxi cosa ni bizaaca Jehoiaquim, ca cosa yuudxuʼ ni bíʼnibe ne guiráʼ ca cosa malu ni gúnnacabe bíʼnibe, zeedacani lu Libru stiʼ ca Rey stiʼ Israel ne stiʼ Judá ne maʼ xiiñibe Joaquín beeda gaca rey.
9 Napa Joaquín 18 iza dxi beeda gaca rey, ne biʼniʼ mandarbe chonna beeu ne chii gubidxa Jerusalén. Bíʼnibe ni cadi jneza nezalú Jehová. 10 Biaʼ ra ruzulú iza,* bisendacaa Nabucodonosor laabe Babilonia né stale cosa risaca ni nuu ra lidxi Jehová. Laaca biʼniʼ Nabucodonosor Sedequías, biʼchiʼ bixhoze Joaquín, rey stiʼ Judá ne Jerusalén.
11 Napa Sedequías 21 iza dxi beeda gaca rey ne biʼniʼ mandarbe 11 iza Jerusalén. 12 Bíʼnibe ni cadi jneza nezalú Jehová, Dios stibe. Qué ñácabe humilde ora guniʼné profeta Jeremías laabe, Jehová ndaʼ biseendaʼ laa. 13 Laaca bicaalube rey Nabucodonosor, ni bicaa laabe guni jurarbe nezalú Dios. Gúcabe ti hombre tercu ne naguidxi ladxidóʼ ne qué ninabe nuyúbibe Jehová, Dios stiʼ Israel. 14 Guiráʼ ca xaíque stiʼ ca sacerdote ne guidubi guidxi que bíʼnicaʼ stale cosa yuudxuʼ ni runi xcaadxi guidxi, zaqué bicheenecaʼ Dios ne biʼniʼ biidicabe ra lidxi Jehová, lídxibe ni bisiabe* ndaaniʼ guidxi Jerusalén.
15 Biseendaruʼ Jehová, Dios stiʼ ca bixhozebiidacabe,* hombre para quixhená xquídxibe. Stale biaje gudixhenabe laacaʼ, purtiʼ biabe xquídxibe ne ra nabézabe.* 16 Peru biʼniʼ búrlacabe ca hombre ni biseendaʼ Dios ni dxandíʼ ra nuucabe. Bicaanácabe stiidxabe ne biʼniʼ búrlacabe ca profeta stibe dede maʼ qué ñápacabe remediu, ngue runi biaba xiana stiʼ Jehová luguiáʼ xquidxi.
17 Para biseendabe rey stiʼ ca caldeu luguiacaʼ, biiti rey riʼ ca joven stícabe né espada ndaaniʼ santuariu stícabe. Qué ña rey riʼ ca joven, ca binnidxaapaʼ, ca binnigola nin ca ni huará. Bisaana Dios guirani lu nabe. 18 Guiráʼ ni riquiiñecabe ra lidxi Dios ni dxandíʼ —cásica naroʼbaʼ ne nahuiiniʼ—, ne ca tesoro ni nuu ra lidxi Jehová ne ca tesoro stiʼ rey ne stiʼ ca príncipe, guirani zinebe Babilonia. 19 Bicaaguibe lidxi Dios ni dxandíʼ, bisábabe muru stiʼ Jerusalén ne bicaaguibe ca torre naguidxi stini ne binidebe guiráʼ ca cosa risaca ni nuu ndaaniʼ guidxi que. 20 Gunaazebe ca ni qué ñuuticabe né espada ne zinebe laacaʼ Babilonia, ne bíʼnicabe xhiiñabe ne xhiiñaʼ ca xiiñibe dede dxi maʼ reinu stiʼ Persia biʼniʼ mandar, 21 para gaca cumplir stiidxaʼ Jehová ni guníʼ Jeremías, dede ora gudixe layú que guiráʼ sábadu ni nuzaabiʼ. Biaʼ tiempu biaanani stúbini casi ñaca biziiláʼdxini sábadu, dede ora bizaa 70 iza.
22 Lu primé iza de cayuni mandar Ciro, rey stiʼ Persia, biniibi Jehová ladxidoʼbe para cueebe ti ley ni guireeche lu guidubi naca reinu stibe para gaca cumplir stiidxaʼ Jehová ni guníʼ Jeremías. Bicaabe ley que lu guiʼchiʼ ne sicaríʼ nani: 23 «Ndiʼ nga ni ná Ciro, rey stiʼ Persia: “Maʼ bidii Jehová, Dios ni nuu guibáʼ, naa guiráʼ ca reinu ni nuu lu guidxilayú ne maʼ gunábabe naa gucueeʼ ti yoo Jerusalén, ni nuu Judá. Guiráʼ ca ni naca de xquídxibe, cadi guixeleʼ Jehová, Dios sticaʼ, de laacaʼ ne checaʼ raqué”».