Jueces

2 De raqué biree ángel stiʼ Jehová de Guilgal zeʼ Bokim ne ná rabi laacabe: «Guleeʼ laatu de Egipto ne bedaniáʼ* laatu lu layú ni gudxeʼ ca bixhozebiidatu* chigudieeʼ laacaʼ. Ne gudxeʼ laatu “Qué ziuu dxi gucheeniáʼ acuerdu ni bineniáʼ laatu. 2 Ne laatu la? cadi naquiiñeʼ gúnitu nin ti acuerdu né ca binni ni nabeza lu ca layú riʼ, ne caquiiñeʼ gunitilutu ca altar stícabe”. Peru qué nuzuubatu stiidxaʼ. ¿Xiñee bíʼnitu zacá pue? 3 Ngue runi gudxeʼ laatu “Qué zabeeʼ diaʼ ca binni riʼ ládetu. Zeeda gácacabe ti trampa para laatu, ne zucaacabe laatu guni adorartu ca dios stícabe”».

4 Ora gudxi ángel stiʼ Jehová ca israelita ca diidxaʼ riʼ, bizulú bicaacaʼ ridxi cayuunacaʼ. 5 Ngue runi gulee lácabe lugar que Bokim* ne raqué bíʼnicabe sacrificiu para Jehová.

6 Ora gudxi Josué guidxi que maʼ zanda cheʼ, cada tobi de ca israelita que biguétacaʼ lu ca layú ni gucuaacaʼ casi herencia. 7 Biʼniʼ guidxi Israel ni ná Jehová biaʼ dxi bibani Josué hasta ca dxi bibani ca hombre huaniisi* ni nabani ca dxi gutiʼ Josué, ca ni biʼyaʼ guiráʼ milagru biʼniʼ Jehová pur guidxi Israel. 8 Guti Josué xiiñiʼ Nun, hombre ni biʼniʼ xhiiñaʼ Jehová,* dxi napa ti gayuaa chii iza. 9 Bicaachicabe laabe lu layú ni gucuaabe casi herencia, Timnat-Heres, ni nuu lade dani stiʼ Efraín, ladu guiaʼ de dani Gaas. 10 Guiráʼ ca israelita de generación que gúticaʼ cásica gutiʼ ca bixhozebiidacaʼ,* ne gule sti generación ni qué runibiáʼ Jehová ne qué gánnacaʼ xi guiráʼ bíʼnibe pur guidxi Israel.

11 Ne biʼniʼ ca israelita riʼ cosa ni cadi jneza nezalú Jehová ne bizulú biʼniʼ adorarcaʼ Baal.* 12 Bisaanacabe Jehová, Dios stiʼ bixhózecabe, ni gulee laacabe de Egipto, ne biʼniʼ adorárcabe xcaadxi dios, ca dios stiʼ ca guidxi nuu gaxha de laacabe. Bizuxíbicabe nezalucaʼ ne bichiichicabe Jehová. 13 Bisaanacabe Jehová ne biʼniʼ adorárcabe Baal ne ca bidóʼ stiʼ Astoret.* 14 Ngue runi guizáʼ bidxiichiné Jehová ca israelita ne bidiibe lugar gaxha binni guiráʼ ca cosa sticaʼ. Bisaanabe* laacaʼ lu náʼ ca enemigu sticaʼ, ngue runi maʼ qué ñanda ñuni ganarcaʼ guiráʼ ca enemigu ni nuu gaxha de laacaʼ. 15 Guiráʼ ladu guyécabe, maʼ qué ñacané Jehová laacabe ne bidii lugar gápacabe guendanagana, casi maca guníʼ Jehová ne casi maca biʼniʼ jurar Jehová laacabe. Ne nabé naná modo bibánicabe. 16 Ngue runi gudixhe Jehová chuʼ juez ni gulá laacabe de ca enemigu ni raxha ca cosa stícabe.

17 Peru laaca qué nucaadiágacabe ca juez que, biʼniʼ adorárcabe* xcaadxi dios ne bizuxíbicabe xañeecaʼ. Nagueenda bisiaandacabe ni bisiidiʼ ca bixhozebiidacabe laacabe. Ca bixhozebiidacabe yenándacaʼ ca mandamientu stiʼ Jehová, peru laacabe coʼ. 18 Cada juez gudii Jehová laacabe, racané Jehová juez ca, ne biaʼ dxi guibani juez ca, rulá laacabe de lu náʼ ca enemigu stícabe. Purtiʼ riá Jehová laacabe ora runadiaga cucaacabe ridxi purtiʼ cayuniná ne cuquiichináʼ ca enemigu laacabe.

19 Peru ora gatiʼ juez ca, ribiguetaʼ rúnicabe ni cadi jneza jma que ni biʼniʼ ca bixhózecabe, runi adorárcabe xcaadxi dios ne ruzuxíbicabe xañeecaʼ. Qué nusaanacabe de ñúnicabe cosa malu ne gúcacabe neciu. 20 Últimu la? guizáʼ bidxiichiné Jehová guidxi Israel ne guníʼ: «Maʼ bicheené guidxi riʼ acuerdu ni bineniáʼ ca bixhozebiidacaʼ ne cadi cuzuubacaʼ stiidxaʼ. 21 Nga runi qué zunduuxeʼ nin ti guidxi ni maʼ qué nunitilú Josué ante gatiʼ. 22 Zuneʼ ni para guuyaʼ pa ibiguetaʼ guidxi Israel lu neza stiʼ Jehová ne sácabe luni casi biʼniʼ bixhózecabe». 23 Ngue runi bidii Jehová lugar guiaana ca guidxi que ládecabe. Qué nibeegádibe laacaʼ ne qué nudiibe lugar nunduuxeʼ Josué laacaʼ.