Guiropa libru de Crónicas
17 Ne maʼ xiiñibe Jehosafat beeda gaca rey, ne bizuhuaa dxiichiʼ Jehosafat reinu stiʼ ndaaniʼ guidxi Israel. 2 Biseendabe stale soldadu ndaaniʼ ca guidxi nadipaʼ* stiʼ Judá. Laaca bizuhuaabe grupu de soldadu lu ca layú stiʼ Judá ne ndaaniʼ ca guidxi stiʼ Efraín, ca guidxi ni biʼniʼ ganar bixhózebe. 3 Qué nixeleʼ Jehová de Jehosafat purtiʼ yenándabe ni biʼniʼ bixhozebiidabe David dxiqué ne qué nuyúbibe ca bidóʼ stiʼ Baal. 4 Purtiʼ biyúbibe gacané Dios stiʼ bixhózebe laabe ne yenándabe ca mandamientu stiʼ lugar de ninándabe guiráʼ ni runi guidxi Israel. 5 Ne biʼniʼ Jehová reinu stibe nadipaʼ. Guidubi naca guidxi Judá gupa costumbre gudii regalu Jehosafat, ngue runi beeda gápabe stale cosa risaca ne nabé biʼniʼ respetárcabe laabe. 6 Gúcabe ti hombre nadxibalú* ne guzabe lu ca neza stiʼ Jehová. Dede guleebe ca lugar ra nasoo* ni nuu Judá ne ca poste ni runi adorar binni.
7 Ante gusaabe chonna iza de cayuni mandarbe bisendacaabe ca príncipe stibe, Ben-Hail, Abdías, Zacarías, Netanel ne Micaya, para chigusiidicaʼ ndaaniʼ ca guidxi stiʼ Judá. 8 Ne laaca yenécabe ca levita riʼ: Semaya, Netanías, Zebadías, Asahel, Semiramot, Jehonatán, Adonías, Tobiya ne Tob-Adonías. Ne laaca yenécabe sacerdote Elisamá ne Jehoram. 9 Ne bizulú bisiidicabe ndaaniʼ guidxi Judá, yenécabe libru ra cá Ley stiʼ Jehová. Guzácabe ndaaniʼ guiráʼ guidxi stiʼ Judá canagusiidicabe binni.
10 Guiráʼ ca reinu stiʼ ca guidxi ni nuu gaxha de Judá guizáʼ bidxíbicaʼ Jehová ne maʼ qué nucaalucaʼ Jehosafat. 11 Ne ca filisteu redanecaʼ regalu ne bueltu para Jehosafat, zaqué nga riguíxecabe laabe impuestu. Ne ca árabe la? de lade ca maniʼ sticaʼ redanecaʼ gadxe mil gadxe gayuaa dendxuʼ barracu ne gadxe mil gadxe gayuaa chivu barracu.
12 Zeʼ dxi ziyaca Jehosafat ti rey nabé risaca. Ne ndaaniʼ guidxi Judá bicuírube yoo naguidxi ne bíʼnibe guidxi para guiaapaʼ biidxiʼ ne xcaadxi cosa. 13 Nabé naroʼbaʼ ca dxiiñaʼ bíʼnibe ndaaniʼ ca guidxi stiʼ Judá, ne gúpabe soldadu nadipaʼ ndaaniʼ guidxi Jerusalén. 14 Sicaríʼ nga nexheʼ chaahuiʼ ca soldadu según familia sticaʼ neza bixhózecaʼ: de tribu stiʼ Judá la? nuu ca xaíque stiʼ ti mil. Tobi de laacabe nga Adná, ne lu grupu stibe nuu chonna gayuaa mil soldadu nadipaʼ. 15 Ne biʼniʼ mandarbe sti xaíque láʼ Jehohanán, ne lu grupu stiʼ nuu chupa gayuaa ochenta mil soldadu. 16 Ne laaca biʼniʼ mandar Adná Amasíah xiiñiʼ Zicrí, ti hombre ni biale de laa guni ni ná Jehová de guidubi ladxidóʼ, ne lu grupu stiʼ nuu chupa gayuaa mil soldadu nadipaʼ. 17 Ne de tribu stiʼ Benjamín nuu Eliadá, ti soldadu nadipaʼ, ne lu grupu stiʼ nuu chupa gayuaa mil hombre naaze arcu ne escudu. 18 Laaca biʼniʼ mandarbe Jehozabad, ne lu grupu stiʼ nuu ti gayuaa ochenta mil hombre ni nuu listu para cheʼ lu guerra. 19 Laacabe nga ca ni runi xhiiñaʼ rey, aparte de ca ni guluu rey que ndaaniʼ ca guidxi nadipaʼ* ni nuu guidubi naca Judá.