Guiropa libru de Crónicas
19 De raqué biguetaʼ Jehosafat rey stiʼ Judá ra lidxi,* ni nuu Jerusalén, ne qué nizaacabe gastiʼ.* 2 Para biree Jehú xiiñiʼ Hananí, hombre ni ricaa visión que, zidxagalú rey Jehosafat ne nabe rábibe laa: «¿Ñee rábiluʼ jneza nga gacaneluʼ ca binni malu ne gannaxhiiluʼ ca ni nanalaʼdxiʼ Jehová la? Nga runi cadxiichiné Jehová lii. 3 Peru biiyabe cosa galán ndaaniʼ ladxidoʼloʼ, purtiʼ guleeluʼ ca poste ni runi adorar binni ndaaniʼ guidxi riʼ ne de guidubi ladxidoʼloʼ maʼ gudixhe íqueluʼ guyúbiluʼ Dios ni dxandíʼ».
4 Gulézaruʼ Jehosafat ndaaniʼ guidxi Jerusalén ne bireebe sti biaje yegánnabe ca binni guidxi que, guyebe dede Beer-Seba hasta ra nuu ca dani stiʼ Efraín, para gacanebe laacaʼ guibiguétacaʼ ra nuu Jehová, Dios stiʼ ca bixhozebiidacaʼ. 5 Gulibe juez para chuʼ ndaaniʼ cada guidxi que, ndaaniʼ cada tobi de ca guidxi nadipaʼ* stiʼ Judá. 6 Ne gúdxibe ca juez que: «Laguuyaʼ chaahuiʼ xi cayúnitu, purtiʼ cadi cayuni juzgartu para ti hombre, sínuque para Jehová. Ne nuunebe laatu ora runi juzgartu. 7 Yanna, laguidxibi Jehová, lachuu cuidadu né ni rúnitu, purtiʼ qué ziuu dxi guni Jehová, Dios stinu, cosa ni cadi jneza, runi tratarbe binni igual, ne qué ziuu dxi gudiibe lugar sícabe laabe para gúnibe xiixa».
8 Laaca gulí Jehosafat ndaaniʼ guidxi Jerusalén caadxi de ca levita ne ca sacerdote ne caadxi de ca xaíque familia* stiʼ Israel para guni juzgarcaʼ para Jehová ne gacanecaʼ ca binni de Jerusalén gaca chaahuiʼ ca guendanagana ni guedanecaʼ nezalúcabe. 9 Ne gúdxibe laacaʼ: «Ndiʼ nga ni naquiiñeʼ gúnitu, naquiiñeʼ guidxíbitu Jehová ora gúnitu xhiiñaʼ, cadi guireecueʼtu de ca ley stibe ne gúnitu ni de guidubi ladxidoʼto: 10 ti ora gueeda ca bíʼchitu, ca ni nabeza ndaaniʼ xcaadxi guidxi, ne guedanecaʼ ti guendanagana purtiʼ biiticabe tuuxa o purtiʼ qué gánnacaʼ ximodo chinándacaʼ xiixa ley, xiixa mandamientu, xiixa regla o xiixa decisión ni maca guʼtaʼ chinándacabe, naquiiñeʼ gábitu laacabe xi naquiiñeʼ gúnicabe para cadi gaʼniʼ donda íquecabe pur bicheenécabe Jehová; pa qué gúnitu ni la? zadxiichinebe laatu ne ca bíʼchitu. Ndiʼ nga ni naquiiñeʼ gúnitu para cadi quibaʼ donda íquetu. 11 Raríʼ nuu Amarías, xaíque stiʼ ca sacerdote,* laabe nga chigacanebe laatu gánnatu xi ná Jehová de ca cosa ca. Zebadías xiiñiʼ Ismael zaca xaíque stiʼ tribu stiʼ Judá ne laabe nga chiguuyabe guiráʼ ca dxiiñaʼ ni gaca para rey. Ne ziuu ca levita para gacanecaʼ laatu.* Lagaca nadipaʼ ne laguni dxiiñaʼ, ne cadi gusaana Jehová ca ni runi ni jneza».