Primé libru de Crónicas

27 Biaʼsi veinticuatro mil israelita nuu lu cada grupu, ládecabe nuu ca xaíque familia stícabe neza bixhózecabe, ca xaíque stiʼ ti mil, ca xaíque stiʼ ti gayuaa ne ca hombre ni runi xhiiñaʼ rey, ca ni ruuyaʼ ca grupu ni raca turnar* cada beeu guidubi iza.

2 Comandante stiʼ primé grupu que nga Jasobeam xiiñiʼ Zabdiel, ne lu grupu stibe nuu veinticuatro mil hombre, riécabe primé beeu stiʼ cada iza. 3 De lade ca xiiñiʼ Pérez, laabe nga xaíque stiʼ guiráʼ ca xaíque grupu ni raca caber guni dxiiñaʼ primé beeu. 4 Ne xaíque stiʼ grupu ni rié guiropa beeu que nga Dodái, ahohíta que, sti xaíque ni racané laabe nga Miclot. Lu grupu stibe nuu veinticuatro mil hombre. 5 Comandante stiʼ guionna grupu que nga Benaya xiiñiʼ Jehoiadá, xaíque stiʼ ca sacerdote,* laacabe nga riécabe guionna beeu stiʼ cada iza, ne lu grupu stibe nuu veinticuatro mil hombre. 6 Benaya nga tobi de ca treinta soldadu nadipaʼ que, ne laabe nga xaíque stiʼ ca treinta que, ne xiiñibe Amizabad nga comandante stiʼ grupu stibe. 7 Guidapa comandante que nga Asahel, biʼchiʼ Joab —despué maʼ xiiñibe Zebadías guca comandante—, ne lu grupu stibe nuu veinticuatro mil hombre. Laacabe nga riécabe lu beeu tapa stiʼ cada iza. 8 Comandante gaayuʼ que nga Samhut, izrahíta que, ne lu grupu stibe nuu veinticuatro mil hombre. Laacabe nga riécabe lu beeu gaayuʼ stiʼ cada iza. 9 Comandante xhoopaʼ que nga Irá xiiñiʼ Iqués, tecoíta que, ne lu grupu stibe nuu veinticuatro mil hombre. Laacabe nga riécabe lu beeu xhoopaʼ stiʼ cada iza. 10 Comandante gadxe que nga Hélez pelonita que, ni zeeda de ca efraimita, ne lu grupu stibe nuu veinticuatro mil hombre. Laacabe nga riécabe lu beeu gadxe stiʼ cada iza. 11 Comandante xhono que nga Sibecái husatita que, ni zeeda de ca zerahíta, ne lu grupu stibe nuu veinticuatro mil hombre. Laacabe nga riécabe lu beeu xhono stiʼ cada iza. 12 Comandante gaʼ que nga Abí-Ézer anatotita que, ni zeeda de ca benjaminita, lu grupu stibe nuu veinticuatro mil hombre. Laacabe nga riécabe lu beeu gaʼ stiʼ cada iza. 13 Comandante chii que nga Maharái netofatita que, ni zeeda de ca zerahíta, ne lu grupu stibe nuu veinticuatro mil hombre. Laacabe nga riécabe lu beeu chii stiʼ cada iza. 14 Comandante once que nga Benaya piratonita que, ni zeeda de ca xiiñiʼ Efraín, ne lu grupu stibe nuu veinticuatro mil hombre. Laacabe nga riécabe lu beeu once stiʼ cada iza. 15 Comandante doce que nga Heldái netofatita que, ni zeeda de ca xiiñiʼ Otniel, ne lu grupu stibe nuu veinticuatro mil hombre. Laacabe nga riécabe lu beeu doce stiʼ cada iza.

16 Ndiʼ nga ca xaíque stiʼ ca tribu stiʼ Israel: xaíque stiʼ ca rubenita nga Eliezer xiiñiʼ Zicrí; xaíque stiʼ ca simeonita nga Sefatías xiiñiʼ Maacá; 17 xaíque stiʼ tribu stiʼ Leví nga Hasabías xiiñiʼ Quemuel; xaíque stiʼ ca ni zeeda de Aarón nga Sadoc; 18 xaíque stiʼ tribu stiʼ Judá nga Elihú, tobi de ca biʼchiʼ David; xaíque stiʼ tribu stiʼ Isacar nga Omrí xiiñiʼ Miguel; 19 xaíque stiʼ tribu stiʼ Zabulón nga Ismayá xiiñiʼ Abdías; xaíque stiʼ tribu stiʼ Neftalí nga Jerimot xiiñiʼ Azriel; 20 xaíque stiʼ tribu stiʼ ca efraimita nga Hosea xiiñiʼ Azazías; xaíque galaa tribu stiʼ Manasés nga Joel, xiiñiʼ Pedaya; 21 xaíque xcalaa tribu stiʼ Manasés ni nuu Galaad nga Idó, xiiñiʼ Zacarías; xaíque stiʼ tribu stiʼ Benjamín nga Jaasiel, xiiñiʼ Abner, 22 ne xaíque stiʼ tribu stiʼ Dan nga Azarel, xiiñiʼ Jehoram. Laacabe nga gúcacabe ca príncipe stiʼ ca tribu stiʼ Israel.

23 Qué nugabaʼ David ca ni napa gande iza para xagueteʼ, purtiʼ maca guníʼ Jehová zutale guidxi Israel ne zeeda gácacabe stale casi ca beleguí ni nuu guibáʼ. 24 Bizulú Joab xiiñiʼ Zeruyá biʼniʼ censu que, peru qué nunduuxeʼ ni. Pur censu riʼ nga guizáʼ bidxiichiné Dios* guidxi Israel, ne maʼ qué nicá diʼ pándacabe lu libru ra riete historia stiʼ rey David.

25 Ni ruuyaʼ guiaapaʼ ca cuartu ra riaapaʼ tesoro stiʼ rey que nga Azmávet, xiiñiʼ Adiel. Ne ni ruuyaʼ guiaapaʼ ca cuartu ra riaapaʼ ca cosa* ni nuu lu ca layú, ndaaniʼ ca guidxi que, ndaaniʼ ca guidxihuiiniʼ ne lu ca torre que nga Jonatán, xiiñiʼ Uzías. 26 Ne ni naca xaíque stiʼ ca ni rudxiibaʼ lu layú que nga Ezrí, xiiñiʼ Kelub. 27 Ni ruuyaʼ guiaapaʼ ca layú uva que nga Simeí, ramatita que. Ni ruuyaʼ guiaapaʼ ca bodega ra nuu vinu ni bíʼnicabe né ca uva ni rudii lu ca layú que nga Zabdí, sifmita que. 28 Ni ruuyaʼ guiaapaʼ ca layú ra zuhuaa yaga olivo ne yaga sicómoro ni nuu lu Sefelá que nga Baal-Hanán, guederita que. Ni ruuyaʼ ca bodega ra riaapaʼ aceite que nga Joás. 29 Xaíque stiʼ ca ni rapa ca vaca ni ro guixi ti lugar láʼ Sarón nga Sitrái, saronita que, ne xaíque stiʼ ca ni rapa ca vaca ni nuu lu ca layú ra napampa que nga Safat, xiiñiʼ Adlái. 30 Xaíque stiʼ ca ni rapa ca camellu que nga Obil, ismaelita que. Xaíque stiʼ ca ni rapa ca burru* que nga Jehdeyá, meronotita que 31 ne xaíque stiʼ ca ni rapa ca dendxuʼ ne ca chiva que nga Jaziz, hagrita que. Guirácabe nga nácacabe xaíque stiʼ ca cosa risaca stiʼ rey David.

32 Jonatán, sobrinu David la? naca ti hombre ni nuu xpiaaniʼ ni rudii conseju ne naca secretariu. Ne ni rapa* ca xiiñiʼ rey que nga Jehiel, xiiñiʼ Hacmoní. 33 Hombre ni rudii conseju rey que nga Ahitofel ne xhamigu rey que* nga Husái, arkita que. 34 Despué de Ahitofel maʼ Jehoiadá xiiñiʼ Benaya ne Abiatar biaanacaʼ lugar stibe ne Joab nga naca xaíque ejércitu stiʼ rey que.