Primé libru de Crónicas
5 Ndiʼ nga ca xiiñiʼ Rubén, baʼduʼ primé stiʼ Israel. Laabe nga baʼduʼ primé, peru cumu gutanebe xheelaʼ* bixhózebe la? gudiʼdiʼ derechu ni nápabe casi baʼduʼ primé que lu náʼ ca xiiñiʼ José, xiiñiʼ Israel. Nga runi, lu ca registru stiʼ ca familia qué riete pa laabe nga nápabe derechu stiʼ baʼduʼ primé. 2 Neca Judá nga ni jma risaca lade ca biʼchiʼ ne de laabe nga zeeda ni chigaca xaíque, peru José nga gucuaa derechu stiʼ baʼduʼ primé. 3 Ca xiiñiʼ Rubén, baʼduʼ primé stiʼ Israel, nga Hanok, Palú, Hezrón ne Carmí. 4 Ndiʼ nga ca xiiñiʼ Joel: Semaya xiiñiʼ Joel, Gog xiiñiʼ Semaya, Simeí xiiñiʼ Gog, 5 Miqueas xiiñiʼ Simeí, Reayá xiiñiʼ Miqueas, Baal xiiñiʼ Reayá 6 ne xiiñiʼ Baal nga Beerá, laabe nga ni gulee Tilgat-Pilnéser, rey stiʼ Asiria, de xquidxi ne ziné laabe; laabe nga xaíque stiʼ ca rubenita. 7 Según registru stiʼ ca familia, ca familia stiʼ Beerá nga Jeiel —xaíque que—, Zacarías 8 ne Bela, xiiñiʼ Azaz, xiiñiʼ Sema, xiiñiʼ Joel, ni guleza lu ca layú ni nuu dede Aroer hasta Nebo ne Baal-Meón. 9 Ne biaanabe ladu rindani gubidxa, lu ca layú ni rindá dede lu desiertu, cueʼ guiiguʼ Éufrates, purtiʼ bidale ca yuze stibe lu layú stiʼ Galaad. 10 Tiempu biʼniʼ mandar rey Saúl, gudindené ca rubenita ca hagrita ne biʼniʼ ganárcabe laacaʼ. De raqué maʼ ca rubenita biaanané ca yoo de lari stícabe ni nuu ladu rindani gubidxa lu ca layú stiʼ Galaad.
11 Guleza ca ni zeeda de familia stiʼ Gad cuéʼcabe lu ca layú stiʼ Basán hasta Salecá. 12 Joel nga xaíque stícabe, Safam nga guiropa xaíque, ne ndaaniʼ guidxi Basán Janái ne Safat nga guca xaíque. 13 Ne ca bíʼchicabe neza familia stiʼ bixhózecabe nga Miguel, Mesulam, Seba, Jorái, Jacán, Zía ne Éber, biaʼsi gadxe. 14 Laacabe nga ca xiiñiʼ Abihail, xiiñiʼ Hurí, xiiñiʼ Jaróah, xiiñiʼ Galaad, xiiñiʼ Miguel, xiiñiʼ Jesisái, xiiñiʼ Jahdó, xiiñiʼ Buz. 15 Ne xaíque familia neza bixhózecabe nga Ahí, xiiñiʼ Abdiel, xiiñiʼ Guní. 16 Gulézacabe Galaad, Basán ne ca guidxihuiiniʼ nuu gaxha de laacani, ne lu guiráʼ ca layú ra rigaa guixi ni nuu Sarón, ne dede ra rugaanda ca layú stini. 17 Guirácabe guyuucabe lu registru stiʼ ca familia ni guca ca dxi biʼniʼ mandar Jotán, rey stiʼ Judá, ne ca dxi biʼniʼ mandar Jeroboán,* rey stiʼ Israel.
18 Gupa ca rubenita, ca gadita ne galaa tribu stiʼ Manasés lu ejércitu sticaʼ cuarenta y cuatro mil gadxe gayuaa sesenta soldadu nadipaʼ ni naaze escudu, espada ne arcu;* guizáʼ nánnacaʼ tíndecaʼ lu guerra. 19 Gudindenécabe ca hagrita, Jetur, Nafís ne Nodab. 20 Gunábacabe Dios gacané laacabe lu guerra, ne bicabi Dios laacabe purtiʼ gúpacabe confianza laa. Ngue runi gucané Dios laacabe lu guendaridinde que ne bisaana ca hagrita ne guiráʼ ca xpínnicaʼ lu nácabe. 21 Zinécabe ca maniʼ sticaʼ: cincuenta mil camellu, chupa gayuaa cincuenta mil dendxuʼ ne chupa mil burru. Ne laaca zinécabe ti gayuaa mil binni. 22 Guti stale binni raqué, purtiʼ Dios ni dxandíʼ nga gudinde lu guerra que. Ne guleza ca rubenita lu ca layú stiʼ ca binni que dede dxi guleecabe laacaʼ de raqué.
23 Ca ni zeeda de galaa tribu stiʼ Manasés que gulézacabe lu ca layú ni nuu Basán hasta Baal-Hermón, Senir ne lu dani Hermón. Guizáʼ stálecabe. 24 Ndiʼ nga ca xaíque familia neza bixhózecabe: Éfer, Isí, Eliel, Azriel, Jeremías, Hodavías ne Jahdiel; guirácabe nácacabe soldadu nadipaʼ, nabé binibiáʼ binni laacabe ne gúcacabe xaíque stiʼ ca familia stiʼ bixhozebiidacabe. 25 Peru bicheenécabe Dios stiʼ ca bixhozebiidacabe* ne biʼniʼ adorárcabe* ca dios stiʼ ca guidxi ni binitilú Dios nezalúcabe. 26 Ngue runi bicaa Dios stiʼ Israel Pul, rey stiʼ Asiria (laca laabe nga Tilgat-Pilnéser, rey stiʼ Asiria) para cueebe ca rubenita, ca gadita ne galaa tribu stiʼ Manasés de lu ca layú que ne chinebe laacaʼ Halá, Habor, Hará ne ra nuu guiiguʼ Gozán, ne dede yanna raqué nuucabe.