Guiropa libru de Crónicas
11 Ora yendá Rehoboam Jerusalén, nagueendaca bisendacaabe tribu stiʼ Judá ne Benjamín, biaʼsi ti gayuaa ochenta mil soldadu ni nanna tinde* para chitindenecaʼ guidxi Israel, ti guibiguetaʼ reinu que lu nabe. 2 De raqué bidii Jehová mensaje riʼ Semaya, hombre stiʼ Dios ni dxandíʼ: 3 «Ndiʼ nga ni naquiiñeʼ gábiluʼ Rehoboam xiiñiʼ Salomón —rey stiʼ Judá— ne guiráʼ israelita de tribu stiʼ Judá ne Benjamín: 4 “Ndiʼ nga ni ná Jehová: «Cadi chetu chitindenetu ca bíʼchitu. Cada tobi guibiguetaʼ ra lidxi, purtiʼ naa nga gunieeʼ gácani zacá»”». Ngue runi bizuubacabe stiidxaʼ Jehová ne biguétacabe; maʼ qué nitindenécabe Jeroboán.
5 Guleza Rehoboam ndaaniʼ guidxi Jerusalén ne bíʼnibe stale guidxi nadipaʼ Judá. 6 Ndiʼ nga ca guidxi ni bíʼnibe nadipaʼ: Belén, Etam, Tecoa, 7 Bet-Zur, Socó, Adulam, 8 Gat, Maresá, Zif, 9 Adoraim, Lakís, Azecá, 10 Zorá, Ayalón ne Hebrón. Laacani nga ca guidxi stiʼ Judá ne Benjamín ni bíʼnibe nadipaʼ. 11 Laaca bidiibe guiráʼ ni caquiiñeʼ ca guidxi ni napa muru que para ganda gudxiilucaʼ guiráʼ tu gucaalú laacaʼ. Gulibe tu gaca comandante ndaanicani ne biiyabe cadi guiaadxaʼ guendaró, aceite ne vinu ndaanicani. 12 Bidiibe guiráʼ ca guidxi riʼ escudu naroʼbaʼ ne lanza; bíʼnibe cani jma nadipaʼ. Ne qué nusaana de ñuni mandarbe tribu stiʼ Judá ne Benjamín.
13 Ne ca sacerdote ne ca levita ni nabeza lu guidubi naca guidxi Israel bisaanacaʼ ra nabézacaʼ ne biʼniʼ apoyarcaʼ Rehoboam. 14 Bisaana ca levita que ca layú sticaʼ ra rigaa guixi ne guiráʼ ni nápacaʼ, ne bedabiʼcaʼ Judá ne Jerusalén, purtiʼ maʼ qué niná Jeroboán ne ca xiiñiʼ ñácacabe sacerdote ni runi xhiiñaʼ Jehová. 15 Gulí Jeroboán caadxi hombre para gaca sacerdote stiʼ ne chuʼcaʼ ca lugar ra nasoo* para guni adorarcaʼ ca demonio ni ruluíʼ chiva* ne ca yuzehuiiniʼ ni bizaʼbe. 16 Ne ca tribu stiʼ Israel ca ni gudixhe ique gúnicaʼ ni ná Jehová, Dios stiʼ Israel, de guidubi ladxidoʼcaʼ, yenándacaʼ ca sacerdote ne ca levita Jerusalén para gudiicaʼ sacrificiu Jehová, Dios stiʼ ca bixhozebiidacaʼ. 17 Chonna iza biʼniʼ apoyárcabe Rehoboam xiiñiʼ Salomón, ne beeda gaca reinu stiʼ Judá nadipaʼ purtiʼ biʼniʼ adorárcabe Dios chonna iza casi biʼniʼ David ne Salomón ni.
18 Ne bichaganáʼ Rehoboam Mahalat. Bixhoze Mahalat nga Jerimot —xiiñiʼ David— ne jñaabe nga Abihail, xiiñiʼ Eliab, xiiñiʼ Jesé. 19 Despué, laabe ne Rehoboam gúpacabe xiiñicabe: Jeús, Semarías ne Zaham. 20 Despué bichaganáʼ Rehoboam Maacá, xnieta Absalón ne gúpacabe Abías, Atái, Zizá ne Selomit. 21 Gupa Rehoboam 18 xheelaʼ ne 60 concubina,* peru jma gunnaxhiibe Maacá, xnieta Absalon. Laaca gúpabe 28 xiiñibe hombre ne 60 xiiñibe gunaa. 22 Gulí Rehoboam Abías xiiñiʼ Maacá para gaca xaíque ne sániru lu ca biʼchiʼ, purtiʼ racaláʼdxibe gaca Abías rey. 23 Peru cumu nexhenabe* la? biseendabe* caadxi xiiñibe lu guiráʼ ca layú stiʼ Judá ne Benjamín, ra nuu ca guidxi ni napa muru. Laaca bidiibe laacaʼ stale guendaró ne bidiibe laacaʼ stale gunaa para guichaganacaʼ.