Guiropa libru stiʼ Samuel
9 Ti dxi gunabadiidxaʼ David: «¿Ñee nabániruʼ tuuxa de familia stiʼ Saúl la? Racalaʼdxeʼ gusihuinneʼ guendarannaxhii stinneʼ laabe pur promesa ni bineʼ Jonatán». 2 Ca dxi que, nabani ti mozo stiʼ Saúl ni láʼ Zibá, ngue runi bisendacaacabe laa. Para gunabadiidxaʼ rey David laabe: «¿Ñee lii nga Zibá la?». Óraque bicábibe: «Ajaʼ, naa nga Zibá, mozo stiluʼ». 3 Para ná rey que rabi laabe: «¿Ñee nabániruʼ tuuxa de familia stiʼ Saúl la? Purtiʼ racalaʼdxeʼ gulueeʼ laabe pabiáʼ nachaʼhuiʼ Dios». Óraque bicabi Zibá rey que: «Nabániruʼ ti xiiñiʼ Jonatán, nachiitaʼ guiropaʼ chú ñeebe». 4 Óraque gunabadiidxaʼ rey que laabe: «¿Paraa nuube yaʼ?». Para bicabi Zibá: «Nuube Lo-Debar, ra lidxi Makir, xiiñiʼ Amiel».
5 Nagueendaca biseendaʼ rey David tu chicaa laabe Lo-Debar, ra lidxi Makir, xiiñiʼ Amiel. 6 Para bedandá Mefibóset —xiiñiʼ Jonatán, xiiñiʼ Saúl— ra nuu David. Oraqueca bizuxíbibe dede gudixhe íquebe layú. Para gudxi David laabe: «¡Mefibóset!», óraque bicábibe: «Raríʼ nuaaʼ, señor stinneʼ». 7 Para ná David rabi laabe: «Cadi guidxíbiluʼ purtiʼ qué zusaanaʼ de gannaxhieeʼ lii pur promesa ni bineʼ Jonatán, bixhózeluʼ. Zudxiguetaʼ lii guiráʼ layú stiʼ bixhozebiidaluʼ Saúl ne siempre zabiluʼ ruaa mexaʼ stinneʼ para goloʼ».*
8 Óraque gudixhe íquebe layú sti biaje ne guniʼbe: «Señor stinneʼ, ¿xiñee nuuluʼ gacaneluʼ mozo stiluʼ pa naa zeeda gacaʼ casi ti biʼcuʼ ni maʼ guti yaʼ?». 9 De raqué, bisendacaa rey que Zibá, mozo stiʼ Saúl, ne gúdxibe laa: «Guiráʼ ca cosa stiʼ Saúl ne stiʼ ca familia stiʼ cudieeʼ ni xniétube. 10 Lii, ca xiiñiluʼ ne ca mozo stiluʼ zúnitu dxiiñaʼ lu ca layú ca ne zandísatu cosecha para gapa ca familia stiʼ nietu xpixuaanaluʼ ni gocaʼ. Peru Mefibóset, nietu stiʼ xpixuaanaluʼ, siempre zabí ruaa mexaʼ stinneʼ para go».
Napa Zibá 15 xiiñiʼ ne gande mozo. 11 Para ná Zibá rabi rey que: «Zuni mozo stiluʼ guiráʼ ni canábaluʼ laa, señor rey». Dede dxi que, bizulú gudó Mefibóset ruaaʼ xmexaʼ David* casi runi ti xiiñiʼ rey. 12 Laaca napa Mefibóset ti xiiñiʼ nahuiiniʼ láʼ Micá. Ne guiráʼ ca binni ni nabeza ra lidxi Zibá, gúcacaʼ mozo stiʼ Mefibóset. 13 Ne guleza Mefibóset, hombre ni nachiitaʼ guiropaʼ chú ñee que, Jerusalén purtiʼ siempre ribibe ruaa xmexaʼ rey que para gobe.