Guiropa libru de Crónicas
15 Ne biaba espíritu stiʼ Dios luguiáʼ Azarías xiiñiʼ Oded. 2 De raqué biree Azarías zidxagalú Asá ne rábibe laa: «¡Asá ne guiráʼ binni de Judá ne Benjamín! ¡Lagucaadiaga naa! Ziuu Jehová gaxha de laatu pa qué gusaana de chuʼtu gaxha de laabe. Pa guyúbitu laabe zudiibe lugar guidxélatu laabe, peru, pa gusaanatu laabe, laaca zusaanabe laatu. 3 Guizáʼ xadxí* bixeleʼ guidxi Israel de Dios ni dxandíʼ, qué ñápacabe nin ti sacerdote ni nusiidiʼ laacabe ne qué ninándacabe ni ná ley. 4 Peru dxi maʼ cayacanácabe, biguétacabe ra nuu Jehová —Dios stiʼ Israel— ne biyúbicabe laabe ne bidiibe lugar guidxélacabe laabe. 5 Cumu nabé guyuu guendanagana lade binni ni nabeza ndaaniʼ ca guidxi que la? huaxiéʼ seguru nga guiree binni cheʼ sti guidxi ca dxi que.* 6 Runitilú ti nación sti nación ne zaqueca runi ca guidxi que, purtiʼ qué nudii Dios lugar ñápacabe guendariuudxí ra biseendaʼ guiráʼ clase guendanagana luguiácabe. 7 Peru laatu la? lagaca nadipaʼ ne cadi guireetu gana,* purtiʼ zacaatu stale ndaayaʼ pur dxiiñaʼ ni cayúnitu».
8 Casi peʼ binadiaga Asá ca diidxaʼ riʼ ne profecía ni guníʼ profeta Oded, gúpabe valor ne guleebe guiráʼ ca bidóʼ yuudxuʼ ni nuu lu ca layú stiʼ Judá ne Benjamín ne ni nuu ndaaniʼ ca guidxi ni nuu lade ca dani stiʼ Efraín, ca ni biʼniʼ ganarbe. Laaca biʼniʼ chaahuibe altar stiʼ Jehová ni nuu frente de cuartu ni nuu ra entrada* ra lidxi Jehová. 9 Ne bisendacaabe guiráʼ ca binni de Judá ne Benjamín ne ca binni de Efraín, Manasés ne Simeón ni nabeza ládecabe, purtiʼ stale binni de ca tribu stiʼ Israel guyuucaʼ lade ca xpinni Asá ora bíʼyacaʼ nuu Jehová, Dios stibe, gaxha de laabe. 10 Bidxíñacabe Jerusalén dxi maʼ ziné Asá 14 iza ne chonna beeu de cayuni mandar. 11 De lade ca maniʼ ni biaananécabe stiʼ ca binni que, bidiicabe Jehová gadxe gayuaa yuze ne gadxe mil dendxuʼ casi sacrificiu para laabe dxi que. 12 Laaca bíʼnicabe ti acuerdu ra bidii stiidxacabe zuyúbicabe Jehová, Dios stiʼ ca bixhozebiidacabe, de guidubi ladxidóʼcabe ne guidubi xhiálmacabe. 13 Ne tutiica binni qué guyubi Jehová, Dios stiʼ Israel, napa xidé gatiʼ, gastiʼ naca pa nahuiinibe o maʼ huaniisibe, pa nácabe hombre o gunaa. 14 Ngue runi né ridxi nadipaʼ bíʼnicabe ti juramentu Jehová, cucaacabe ridxi de tantu cayéchecabe ne cuxhídxicabe trompeta ne cachu. 15 Guizáʼ nayecheʼ guyuu ca binni de Judá pur juramentu ni bíʼnicaʼ, purtiʼ bíʼnicabe ni de guidubi ladxidóʼcabe. Né stale gana biyúbicabe Jehová ne laa bidii lugar guidxélacabe laa, ne gucané Dios laacabe para cadi gusaana de gápacabe guendariuudxí* guiráʼ ladu.
16 Dede guxha Asá puestu risaca napa jñaabiidabe* Maacá casi reina, purtiʼ biʼniʼ ti bidóʼ yuudxuʼ para gusisácacabe poste ni runi adorárcabe. Bisaba Asá bidóʼ yuudxuʼ que ne binidebe ni ne bicaaguibe ni ndaaniʼ valle stiʼ Cedrón. 17 Peru biaanaruʼ ca lugar ra nasoo* ni nuu Israel. Neca zaqué, biaʼ dxi bibani Asá biʼniʼ ni ná Dios de guidubi ladxidóʼ. 18 Ne bedanebe ca cosa ni guleechube ne ni guleechú bixhózebe para ra lidxi Dios ni dxandíʼ: plata, oro ne xcaadxi cosa ni riquiiñecabe ndaanini. 19 Ne qué ñaca nin ti guerra hasta lu iza 35 de cayuni mandar Asá.