Guiropa libru de Crónicas
26 De raqué, guidubi naca guidxi Judá bíʼnicaʼ Uzías rey dxi napa 16 iza para guni mandarbe xlugar bixhózebe Amasías. 2 Biʼniʼ chaahuibe guidxi Elot ne bidxiguétabe ni lu náʼ Judá despué de guti rey* que ne yanna maʼ caziilaʼdxiʼ casi caziilaʼdxiʼ ca bixhozebiidaʼ.* 3 Napa Uzías 16 iza dxi guca rey, ne biʼniʼ mandarbe 52 iza Jerusalén. Jecolías láʼ jñaabe ne de Jerusalén laa. 4 Biʼniʼ Uzías ni jneza nezalú Jehová casi peʼ biʼniʼ bixhózebe Amasías ni. 5 Biyúbibe gúnibe ni ná Dios ca dxi bibani Zacarías, purtiʼ laa nga bisiidiʼ laabe guidxíbibe Dios ni dxandíʼ. Biaʼ dxi bíʼnibe ni ná Jehová, guluu Dios ni dxandíʼ ndaayaʼ guiráʼ ni bíʼnibe.
6 Guyebe yetindenebe ca filisteu ne gundaabe muru stiʼ Gat, stiʼ Jabné ne stiʼ Asdod para gunda guyuube ndaaniʼ ca guidxi riʼ. Despué bíʼnibe caadxi guidxi lu ca layú stiʼ Asdod ne lu ca layú stiʼ ca filisteu. 7 Ne gucaneruʼ Dios ni dxandíʼ laabe para tindenebe ca filisteu, ca árabe ni nabeza Gurbaal ne ca meunim. 8 Bizulú ca ammonita gudíxecaʼ impuestu Uzías. Beeda gácabe ti rey nabé nadipaʼ ne risaca, dede ndaaniʼ guidxi Egipto binibiáʼcabe laabe. 9 Laaca bicuí Uzías torre ndaaniʼ guidxi Jerusalén cueʼ Puertaʼ stiʼ Squina, cueʼ Puertaʼ stiʼ Valle ne lugar ra jma naguidxi stiʼ muru que,* ne bíʼnibe cani jma naguidxi. 10 Laaca bicuibe torre lu desiertu ne gundaabe* stale lugar para bizaʼbe cisterna (purtiʼ nápabe stale maniʼ); ngueca bíʼnibe lu Sefelá ne lu ca lugar ra nasoo ne planu. Nápabe ca xpínnibe ni runi dxiiñaʼ lu layú, ne ni rudxiibaʼ lubáʼ uva lu dani ne lu Carmelo, purtiʼ nabé riuuláʼdxibe dxiiñaʼ layú.
11 Laaca gupa Uzías ti ejércitu ni nuu listu para cheʼ lu guerra. Maca nexheʼ chaahuicabe pur grupu cada biaje riécabe lu guerra. Ne biʼniʼ mandar Hananías, tobi de ca príncipe stiʼ rey que, secretariu Jeiel ne xaíque Maaseya ugábacaʼ laacabe ne gucaacaʼ lácabe lu ti registru. 12 Biaʼsi chupa mil xhoopaʼ gayuaa xaíque stiʼ ca familia neza bixhózecabe nga runi mandar ca hombre nadipaʼ riʼ. 13 Biaʼsi chonna gayuaa gadxe mil, gaayuʼ gayuaa hombre ni nuu listu para cheʼ lu guerra nuu lu ejércitu stibe. Gupa rey que ti ejércitu guizáʼ nadipaʼ para gacané laa gucaalú ca enemigu stiʼ. 14 Bidii Uzías guidubi naca ejércitu stiʼ escudu, lanza, cascu, coraza,* arcu ne guié para guixhe bixeendaʼ.* 15 Laaca bíʼnibe máquina ndaaniʼ guidxi Jerusalén para gucaalunécabe lu guerra ni bizáʼ ca ingenieru; bizuhuaacabe cani lu ca torre ne squina ca muru que, ne rundaacani flecha ne guié naroʼbaʼ. Zaqué nga binibiáʼcabe laabe guiráʼ ladu, purtiʼ guizáʼ gucanécabe laabe ne beeda gácabe ti rey nabé nadipaʼ ne risaca.
16 Peru casi peʼ gúcabe ti rey nadipaʼ ne risaca biguidxi ladxidoʼbe ne laapebe biyúbibe guendananá stibe, ne bicheenebe Jehová, Dios stibe, purtiʼ guyuube ndaaniʼ templu stiʼ Jehová para guzaaquibe inciensu lu altar ra riaʼquiʼ inciensu. 17 Nagueendaca guyuu sacerdote Azarías ne sti 80 sacerdote nadxibalú stiʼ Jehová nándacaʼ laabe. 18 Guluu jnézacabe rey Uzías ne rábicabe laa: «¡Uzías, cadi lii diʼ nga naquiiñeʼ guzaaquiluʼ inciensu para Jehová! Ca sacerdote si nga caquiiñeʼ guzaaquicaʼ inciensu, purtiʼ laacabe nga zeedacabe de familia stiʼ Aarón, ne laasícabe nga ca ni maʼ bireechú para guni dxiiñaʼ riʼ. Biree de ndaaniʼ santuariu riʼ, maʼ bicheeneluʼ Jehová Dios, ne qué zusisácabe lii pur ni bíʼniluʼ ca».
19 Ora binadiaga Uzías ndiʼ guizáʼ bidxiichi, naazebe ti braseru lu nabe para guzaaquibe inciensu. Ne ora biaaxhabe luguiáʼ ca sacerdote que cadindenebe laacaʼ, oraqueca biree lepra lucuabe nezalú ca sacerdote ni nuu ra lidxi Jehová cueʼ altar ra ruzaaquicabe inciensu que. 20 Ora biiyadxí Azarías, xaíque stiʼ ca sacerdote, ne guiráʼ ca sacerdote que laabe, biiyacabe biasa lepra lucuabe, ngue runi nagueendaca guleecabe laabe de raqué. Laabe laaca biree guxooñebe purtiʼ bininá Jehová laabe.
21 Gupa rey Uzías lepra dede dxi gutiʼ, gulézabe ndaaniʼ ti yoo aparte casi ribeza ca binni napa lepra, purtiʼ guleecabe laabe de ra lidxi Jehová. Ne maʼ xiiñibe Jotán biʼniʼ mandar ndaaniʼ palaciu stiʼ rey que ne biʼniʼ juzgar ca binni guidxi que.
22 Xcaadxi cosa ni bizaaca Uzías, de primé ne últimu, profeta Isaías xiiñiʼ Amós nga bicaa cani. 23 Ne guti Uzías ne yanna maʼ caziiláʼdxibe casi caziilaʼdxiʼ ca bixhozebiidabe, ne bicaachicabe laabe gaxha de ra gáʼchicaʼ, lu layú stiʼ ca rey peru ra rigaachiʼ binni, purtiʼ guníʼcabe: «Nápabe lepra». Ne maʼ xiiñibe Jotán beeda gaca rey.