Primé libru de Reyes

14 Ca dxi que gucahuará Abías, xiiñiʼ Jeroboán. 2 Para gudxi Jeroboán xheelaʼ: «Biʼniʼ favor guyé Siló, peru gucu gadxé clase lari ti cadi gudiicabe cuenta pa xheelaʼ Jeroboán lii. Raqué nuu profeta Ahíya, laabe nga guniʼbe zacaʼ rey stiʼ guidxi riʼ. 3 Guyé ra nuube ne yené chii pan, caadxi pan ni birúbacabe semiá lu ne ti frascu miel. Laabe gábibe lii xi zazaaca hombrehuiiniʼ riʼ».

4 Para biʼniʼ gunaa que guiráʼ ni gudxi Jeroboán laa. Guyebe Siló ne yendabe ra lidxi Ahíya. Peru cumu maʼ nagola Ahíya la? maʼ qué ruuyaʼ; maʼ cá dxi si guielú.

5 Peru maca gudxi Jehová Ahíya: «Zeeda xheelaʼ Jeroboán ra nuuluʼ ne zanabadiidxabe lii de xiiñibe purtiʼ huará. Naa gabeʼ lii xi gábiluʼ laabe. Ora guedandabe qué zunibia’lu’ laabe, purtiʼ gadxé clase lari nácube».

6 Casi binadiaga Ahíya zedadxiña tuuxa ra entrada que guníʼ: «Xheelaʼ Jeroboán, ¿njaʼ? Guyuu. ¿Xiñee nucaachiluʼ tu lii pue? Gunábacabe naa gudieeʼ lii ti mensaje guizáʼ naná. 7 Guyé ne gudxi ndiʼ Jeroboán: “Ndiʼ nga ni ná Jehová, Dios stiʼ Israel: «Naa nga gulieeʼ lii lade ca binni xquídxiluʼ para gácaluʼ xaíque stiʼ Israel xquidxeʼ. 8 Ne guxhaʼ reinu ca xfamilia David ne bidieeʼ ni lii. Peru cadi cayúniluʼ casi biʼniʼ David, hombre ni biʼniʼ xhiiñaʼ, purtiʼ laa biʼniʼ ni ná ca mandamientu stinneʼ, ne de guidubi ladxidóʼ biʼniʼ ni rabeʼ ne puru si ni jneza biʼniʼ nezaluáʼ. 9 Jma feu ni cayúniluʼ que ni biʼniʼ ca rey ni guyuu ante de lii, bizaʼluʼ sti dios, caadxi estatua de guiibaʼ* para guchiichiluʼ naa, ne naa nga bidxiidécheluʼ. 10 ¡Nga runi, zuseendaʼ ti castigu para ca ni zeeda de familia stiʼ Jeroboán! ¡Ne ndaaniʼ guidxi Israel, zunduuxeʼ guiráʼ hombre* ni naca familia stiʼ Jeroboán, dede né ca ni qué zanda gaca defender ne ca ni qué gapa ti puestu risaca! ¡Casi runduubacabe ra ra’ta’ guíʼ, dede ora guiaanani nayá, zacá zunduubaʼ guiráʼ ca ni zeeda de familia stiʼ Jeroboán! 11 Guiráʼ ca ni zeeda de familia stiʼ Jeroboán, ni gatiʼ ndaaniʼ guidxi zo biʼcuʼ laacaʼ. Ne guiráʼ ni gatiʼ ndaaniʼ guiʼxhiʼ zo ca pájaru laacaʼ, purtiʼ zacá nga guníʼ Jehová»”.

12 »Yanna, biguetaʼ ra lídxiluʼ. Casi peʼ quixhe ñeeluʼ* ndaaniʼ guidxi ca zati hombrehuiiniʼ ca. 13 Guidubi naca guidxi Israel zuunacaʼ pur laabe ne zucaachicaʼ laabe. Laasibe de familia stiʼ Jeroboán zagaachiʼ ndaaniʼ ti baʼ, purtiʼ lade guiráʼ ca ni zeeda de familia stiʼ Jeroboán, laasibe biʼyaʼ Jehová, Dios stiʼ Israel, xiixa cosa galán ndaaniʼ ladxidoʼbe. 14 Zabí Jehová ti rey para guni mandar ndaaniʼ guidxi Israel, ne dxi ca zunduuxebe guiráʼ ca ni zeeda de familia stiʼ Jeroboán, ne maʼ bedandá dxi ca. 15 Zuniibi dxacha Jehová guidxi Israel, casi runiibi dxacha nisa ubaguí. Záxhabe guidxi Israel dede xcu de lu layú galán ni bidiibe ca bixhozebiidacaʼ* ne zucheechebe laacaʼ chericaʼ guiiguʼ,* purtiʼ bichiichicabe Jehová ra bizáʼcabe ca poste ni runi adorárcabe.* 16 Ne zudxiidechebe guidxi Israel pur ca pecadu stiʼ Jeroboán ne pur ca pecadu ni bicaa guidxi Israel guni».

17 De raqué biguetaʼ xheelaʼ Jeroboán ne yendá Tirzá. Casi peʼ yendabe ra puertaʼ lídxibe, guti hombrehuiiniʼ que. 18 Bicaachicabe laa ne guidubi guidxi Israel biinaʼ pur laabe, casi maca guníʼ Jehová de ruaa profeta Ahíya, hombre ni biʼniʼ xhiiñaʼ.

19 Peru xcaadxi cosa ni bizaaca Jeroboán, modo gudíndebe lu guerra ne modo biʼniʼ mandarbe, zeedacani lu libru ra riete historia stiʼ ca rey stiʼ Israel. 20 Biaʼsi 22 iza biʼniʼ mandar Jeroboán. De raqué gútibe ne yanna maʼ caziiláʼdxibe casi caziilaʼdxiʼ ca bixhozebiidabe, ne maʼ xiiñibe Nadab nga beeda gaca rey.

21 Ne beeda gaca Rehoboam xiiñiʼ Salomón rey stiʼ Judá. Nápabe 41 iza dxi beeda gácabe rey, ne biʼniʼ mandarbe 17 iza Jerusalén, guidxi ni gulí Jehová lade guiráʼ ca tribu stiʼ Israel para gusisácacabe lá. Jñaa Rehoboam nga Naamá, ammonita que. 22 Biʼniʼ ca binni de Judá stale cosa ni cadi jneza nezalú Jehová, ne jma bichiichi ca pecadu stícabe laabe que ca pecadu biʼniʼ ca bixhozebiidacabe. 23 Ne biʼnirúcabe xcaadxi lugar ra nasoo,* columna ne poste para guni adorárcabe lu guiráʼ ca danihuiini’ nasoo ne xaʼnaʼ guiráʼ ca yaga napa stale bandaga ne nagáʼ. 24 Laaca guyuu prostituto stiʼ templu* ndaaniʼ guidxi que. Bíʼnicabe guiráʼ cosa dxabaʼ ni runi ca guidxi ni gulee Jehová nezalú ca israelita.

25 Dxi maʼ ziné Rehoboam gaayuʼ iza de naca rey, yegucaalú Sisac, rey stiʼ Egipto, Jerusalén. 26 Zinebe ca tesoro ni nuu ra lidxi Jehová ne ca tesoro ni nuu ra lidxi* rey que. Zinebe guirani, dede né guiráʼ escudu de oro ni bizáʼ Salomón. 27 Ngue runi bizáʼ Rehoboam caadxi escudu de cobre lugar stícani, ne bisigápabe cani ca xaíque stiʼ ca guardia ni rapa entrada ra lidxi rey que. 28 Cada cheʼ rey que ra lidxi Jehová, riné ca guardia que ca escudu que ne despué rudxiguétacabe cani ndaaniʼ ca cuartu stiʼ ca guardia que.

29 Xcaadxi cosa ni bizaaca Rehoboam, guiráʼ ni bíʼnibe, zeedacani lu libru ra riete historia stiʼ ca rey stiʼ Judá. 30 Siempre gudindesaa Rehoboam ne Jeroboán. 31 Ne bicaachicabe Rehoboam ra gaʼchiʼ ca familia stiʼ, ndaaniʼ Xquidxi David, ne yanna maʼ caziiláʼdxibe casi caziilaʼdxiʼ ca bixhozebiidabe. Jñaabe nga Naamá, ammonita que. Ne maʼ Abiyam,* xiiñiʼ Rehoboam, nga beeda gaca rey.