Guiropa libru de Crónicas
30 Biseendaʼ Ezequías mensajeru guidubi naca guidxi Israel ne Judá, dede bicaabe carta para ca binni de Efraín ne Manasés, para gueedacaʼ ra lidxi Jehová ni nuu Jerusalén ne gúnicabe Pascua para Jehová, Dios stiʼ Israel. 2 Peru rey Ezequías, ca príncipe stiʼ ne guidubi naca guidxi Jerusalén gudíxhecaʼ gaca Pascua que lu guiropa beeu, 3 purtiʼ qué huayanda gúnicabe ni dxi maca rúnicabe ni, purtiʼ huaxiéʼ sacerdote ni maʼ bisiá laa* ne qué huadxiña ca binni guidxi que Jerusalén. 4 Cásica rey que ne guidubi guidxi que guyuucaʼ de acuerdu gácani zaqué. 5 Ngue runi bisendatídxicabe guidubi naca Israel, dede Beer-Seba hasta Dan, para gueeda binni Jerusalén ne gúnicabe Pascua para Jehová, Dios stiʼ Israel; purtiʼ qué huayuni guidxi que ni juntu, casi maca cá gácani.
6 Ngue runi guzá ca mensajeru* que guidubi naca guidxi Israel ne Judá, modo peʼ biʼniʼ mandar rey que gácani, yesaanacaʼ ca carta stiʼ rey ne stiʼ ca príncipe stiʼ ne gúdxicaʼ binni: «Binni de Israel caʼ, laguibiguetaʼ ra nuu Jehová —Dios stiʼ Abrahán, Isaac ne Israel— para guibiguétabe ra nuu ca ni bilá de lu náʼ ca rey stiʼ Asiria. 7 Cadi gácatu casi ca bixhozebiidatu* nin casi ca bíʼchitu, ca ni bicheené Jehová, Dios stiʼ ca bixhozebiidacaʼ, ngue runi bidii Dios lugar gacanácabe ne guiráʼ ni biʼyaʼ ne binadiaga ni bizaacacabe la? bidxíbicaʼ, casi cayuuyatu ni. 8 Cadi gácatu tercu casi ca bixhozebiidatu. Laguzuubaʼ stiidxaʼ Jehová ne latáʼ ra templu stibe, ni maʼ guleechube* para cadi gusaana de guni adorartu laabe ne laguni ni ná Jehová, Dios stitu, ti gusaana de guidxiichinebe laatu. 9 Purtiʼ ora guibiguétatu ra nuu Jehová, ziá ca binni ni naaze ca bíʼchitu ne ca xiiñitu laacaʼ ne zudiicabe lugar guibiguétacaʼ lu layú riʼ, purtiʼ naca Jehová, Dios stitu, ti Dios ni riá ne napa misericordia ne qué zudxiidéchebe laatu pa guibiguétatu ra nuube».
10 Ngue runi guyé ca mensajeru* que guidxi pur guidxi lu guidubi naca layú stiʼ Efraín ne Manasés, dede né lu layú stiʼ Zabulón, peru bixidxi ca binni que laacabe ne biʼniʼ búrlacaʼ laacabe. 11 Peru caadxi binni de Aser, Manasés ne Zabulón gúcacaʼ humilde ne beedacaʼ Jerusalén. 12 Laaca gupa ca binni de Judá ndaayaʼ stiʼ Dios ni dxandíʼ para ganda chuʼcaʼ tobi si ne gúnicaʼ ni biʼniʼ mandar rey ne ca príncipe que laacaʼ, casi guníʼ Jehová gácani.
13 Guizáʼ stale binni bidxiña Jerusalén para gúnicaʼ Saa stiʼ ca Pan Sin Levadura* lu guiropa beeu que. Nabé stale binni bidxiña raqué. 14 Bizulú gúxhacabe ca altar ni nuu Jerusalén, ne gúxhacabe ca altar ra ruzaaquicabe inciensu ne yesáʼbicabe cani ndaaniʼ valle stiʼ Cedrón. 15 Ne dxi 14 stiʼ guiropa beeu que biiticabe ca maniʼ ni chigudiicabe casi sacrificiu lu Pascua que. Ne cumu bituí lú ca sacerdote ne ca levita que la? bisiacaʼ laacaʼ* ne bedanecaʼ ofrenda ni riaʼquiʼ ra lidxi Jehová. 16 Ne bizulú bíʼnicabe dxiiñaʼ ni raca caber laacabe, casi ná Ley stiʼ Moisés, hombre stiʼ Dios ni dxandíʼ; ne redané ca levita que rini stiʼ ca maniʼ que ra nuu ca sacerdote para gurúbacaʼ ni lu altar. 17 Ne lade guiráʼ ca binni nuu raqué, nuu stale tu caʼruʼ gusiá laa,* ngue runi biiti ca levita ca maniʼ ni chigudiicabe casi sacrificiu lu Pascua que pur guiráʼ ca binni ni cadi nayá,* para chuʼcaʼ nayá nezalú Jehová. 18 Purtiʼ stale binni de guidxi que —jmaruʼ si ca de Efraín, Manasés, Isacar ne Zabulón— qué huasiacaʼ* laacaʼ, neca zaqué, gudocaʼ Pascua que ne qué ninándacaʼ casi maca cá gácani. Peru biʼniʼ orar Ezequías pur laacabe ne guníʼ: «Nannaʼ nacháʼhuiluʼ, Jehová, nga runi biá 19 guiráʼ ca ni maʼ guluu listu ladxidóʼ para guyúbicaʼ lii, Dios ni dxandíʼ, Jehová, Dios stiʼ ca bixhozebiidacaʼ, neca caʼruʼ gusiacaʼ laacaʼ casi ná ca ley stiluʼ». 20 Bicaadiaga Jehová Ezequías ne biʼniʼ perdonarbe* guidxi que.
21 Ngue runi né stale guendanayecheʼ biʼniʼ ca israelita que Saa stiʼ ca Pan Sin Levadura ndaaniʼ guidxi Jerusalén gadxe gubidxa. Guiráʼ dxi rusisaca ca levita ne ca sacerdote que Jehová, nadipaʼ ruxhídxicabe ca instrumentu que para Jehová. 22 Laaca guniʼné Ezequías guiráʼ ca levita ni cayuni xhiiñaʼ Jehová ne guluube gana laacaʼ, purtiʼ jneza cayúnicaʼ xhiiñacaʼ. Ne gudócabe gadxe gubidxa, biaʼ bindaa saa que, bidiicabe sacrificiu de paz ne bidiicabe xquixe peʼ Jehová, Dios stiʼ ca bixhozebiidacabe.
23 Ngue runi guidubi guidxi que guyuucaʼ de acuerdu gúnicaʼ xcadxe* gubidxa de saa, para bíʼnicabe xcadxe gubidxa de saa né stale guendanayecheʼ. 24 Ne bidii Ezequías, rey stiʼ Judá, ti mil toro ne gadxe mil dendxuʼ para guiráʼ ca binni que, ne ca príncipe que bidiicaʼ ti mil toro ne chii mil dendxuʼ para guiráʼ ca binni que; ne laaca guyuu stale sacerdote ni bisiá laa.* 25 Guizáʼ nayecheʼ guyuu ca binni de Judá, ca sacerdote, ca levita, guiráʼ ca binni ni beeda de Israel ne ca binni de sti guidxi ni beeda de lu layú stiʼ Israel ne ni nabeza Judá. 26 Guizáʼ nayecheʼ guyuucabe ndaaniʼ guidxi Jerusalén purtiʼ dede dxi cayuni mandar Salomón xiiñiʼ David, rey stiʼ Israel, qué huazaaca ti cosa zaqué ndaaniʼ guidxi Jerusalén. 27 Ne últimu la? bizuhuaa ca levita ni naca sacerdote que ne guluucaʼ ndaayaʼ guidxi que; bicaadiaga Dios laacabe ne yendá oración stícabe dede guibáʼ, ra nabeza Dios.