Primé libru de Crónicas
15 Ne bicuiruʼ David yoo ndaaniʼ Xquidxi David. Laaca biʼniʼ prepararbe ti lugar ne bizuhuaabe ti yoo de lari para chuʼ Arca stiʼ Dios ni dxandíʼ. 2 Dxi que nga guníʼ David: «Guirútiruʼ zanda chiné Arca stiʼ Dios ni dxandíʼ, ca levita si, purtiʼ maʼ gulí Jehová laacabe para chinécabe Arca stiʼ Jehová ne para cadi gusaana de gúnicabe xhiiñabe». 3 De raqué bisendacaa David guidubi naca guidxi Israel Jerusalén para chinecaʼ Arca stiʼ Jehová lugar ra biʼniʼ prepararbe para laani.
4 Bisendacaa David ca ni zeeda de neza familia stiʼ Aarón ne ca levita: 5 de lade ca cohatita la? beeda xaíque Uriel ne ti gayuaa gande de ca biʼchiʼ; 6 de ca merarita la? beeda xaíque Asaya ne chupa gayuaa gande de ca biʼchiʼ; 7 de ca ni zeeda de neza familia stiʼ Guersom la? beeda xaíque Joel ne ti gayuaa treinta de ca biʼchiʼ; 8 de ca ni zeeda de neza familia stiʼ Elizafán la? beeda xaíque Semaya ne chupa gayuaa de ca biʼchiʼ; 9 de ca ni zeeda de neza familia stiʼ Hebrón la? beeda xaíque Eliel ne ochenta de ca biʼchiʼ; 10 de ca ni zeeda de neza familia stiʼ Uziel la? beeda xaíque Aminadab ne ti gayuaa doce de ca biʼchiʼ. 11 Laaca bisendacaa David sacerdote Sadoc ne Abiatar, ne ca levita Uriel, Asaya, Joel, Semaya, Eliel ne Aminadab, 12 ne gúdxibe laacaʼ: «Lade ca levita la? laatu nga xaíque familia neza bixhózetu. Lagusiá laatu* ne zaqueca ca bíʼchitu, ne lagudxiibaʼ* Arca stiʼ Jehová, Dios stiʼ Israel, lugar ra bineʼ preparar para laani. 13 Cumu cadi laatu guyuaʼtu* ni primé biaje que la? guizáʼ bidxiichiné Jehová, Dios stinu, laanu,* purtiʼ qué nuyúbinu ñánnanu ximodo naquiiñeʼ gácani». 14 Ngue runi bisiá ca sacerdote ne ca levita laacaʼ para gudxiibacaʼ* Arca stiʼ Jehová, Dios stiʼ Israel.
15 De raqué yené ca levita Arca stiʼ Dios ni dxandíʼ lu ca vara que ne dxiʼbaʼ ni lu xíʼquecabe, casi maca biʼniʼ mandar Moisés gácani, purtiʼ zacá nga guníʼ Jehová gácani. 16 Gudxi David ca xaíque stiʼ ca levita gábicaʼ ca bíʼchicaʼ, ca ni ruundaʼ, gúʼndacaʼ né guendanayecheʼ laga zixidxi instrumentu musical: instrumentu ni napa cuerda, arpa ne címbalo.*
17 Ngue runi, lade tribu stiʼ ca levita la? bicaabicabe dxiiñaʼ riʼ Hemán xiiñiʼ Joel, Asaf xiiñiʼ Berekías ne Etán xiiñiʼ Cusayá, de familia stiʼ ca merarita. 18 Ládecabe nuu sti grupu de familia stícabe: Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá ne Obed-Edom ne Jeiel, ca ni rapa ra puertaʼ que. 19 Hemán, Asaf ne Etán, ca ni ruundaʼ que, naquiiñeʼ guxhídxicaʼ címbalo de cobre; 20 ne Zacarías, Aziel, Semiramot, Jehiel, Uní, Eliab, Maaseya ne Benaya ruxhídxicaʼ instrumentu ni napa cuerda ni nexheʼ chaahuiʼ para xhidxi lu nota alamot;* 21 ne Matitías, Elifelehu, Micneyá, Obed-Edom, Jeiel ne Azazías ruxhídxicaʼ arpa ni nexheʼ chaahuiʼ para xhidxi lu nota seminit* para guni dirigircaʼ ca músicu que. 22 Ne Kenanías xaíque stiʼ ca levita que nga nanna ximodo jma jneza guácabe arca que, ngue runi laabe bíʼyabe ximodo chinécabe ni. 23 Ne Berekías ne Elcaná nga ca ni rapa Arca que. 24 Ne ca sacerdote Sebanías, Josafat, Netanel, Amasái, Zacarías, Benaya ne Eliezer guizáʼ reciu ruxhídxicaʼ trompeta nezalú Arca stiʼ Dios ni dxandíʼ, laaca dxiiñaʼ stiʼ Obed-Edom ne Jehías nga gápacaʼ Arca que.
25 Ne guizáʼ nayecheʼ guyé David, ca hombre huaniisi* stiʼ guidxi Israel ne ca xaíque stiʼ ti mil yecaacaʼ arca stiʼ acuerdu* stiʼ Jehová ra lidxi Obed-Edom. 26 Cumu gucané Dios ni dxandíʼ ca levita ni ziné arca stiʼ acuerdu stiʼ Jehová la? biiticabe gadxe torohuiiniʼ ne gadxe dendxuʼ barracu. 27 Nacu David ti lari ziuulaʼ sin manga de ni jma galán ne ngueca nacu ca levita ni nuáʼ Arca que, ca ni ruundaʼ, Kenanías, xaíque stiʼ ca ni ruaʼ Arca ne ca ni ruundaʼ; laaca nacu David ti efod de lino. 28 Ne guiráʼ ca israelita ni ziguibané arca stiʼ acuerdu stiʼ Jehová que guizáʼ ziyéchecaʼ ne zigucaacaʼ ridxi, ziguxhídxicabe cachu, trompeta ne címbalo; guizáʼ reciu ziguxhídxicabe ca instrumentu ni napa cuerda ne arpa.
29 Peru ora yendá arca stiʼ acuerdu stiʼ Jehová ndaaniʼ Xquidxi David, guleelú Mical, xiiñiʼ Saúl, ruaa ventana ne biiyadxibe xagueteʼ, ora bíʼyabe zichesa David ne guizáʼ ziyecheʼ dxi que, bizulú bidxiichinebe laa.*