Guiropa libru de Crónicas

29 Napa Ezequías 25 iza dxi beeda gaca rey, ne biʼniʼ mandarbe 29 iza ndaaniʼ guidxi Jerusalén. Jñaabe nga Abías xiiñiʼ Zacarías. 2 Biʼniʼ Ezequías ni jneza nezalú Jehová, casi biʼniʼ David bixhozebiidabe.* 3 Lu primé iza de cayuni mandarbe, lu primé beeu, bixhélebe ca puertaʼ lidxi Jehová ne biʼniʼ chaahuibe cani. 4 Despué bedanebe ca sacerdote ne ca levita ne bichíñabe laacaʼ lu patiu ni nuu ladu rindani gubidxa. 5 Para gúdxibe laacaʼ: «Laatu, ca levita, lagucaadiaga naa. Yanna la? lagusiá laatu ne lagusiá* lidxi Jehová, Dios stiʼ ca bixhozebiidatu, ne lacuee ca bidóʼ yuudxuʼ ni nuu ndaaniʼ templu* ca. 6 Purtiʼ bicheené ca bixhózenu Jehová, Dios stinu, ne bíʼnicaʼ ni cadi jneza nezalube. Bisaanacabe laabe, maʼ qué ñuni respetárcabe lidxi Jehová ne bidxiidéchecabe laabe. 7 Laaca biseegucabe ca puertaʼ stiʼ cuartu ni nuu ra entrada* que ne bisuíʼcabe ca lámpara que. Maʼ qué nuzaaquicabe inciensu ne maʼ qué nudiicabe sacrificiu ni riaʼquiʼ Dios stiʼ Israel ra templu* que. 8 Ngue runi bidxiichiné Jehová guidxi Judá ne Jerusalén, ne bidiibe lugar gacanacaʼ, ne guiráʼ ni biʼyaʼ ne binadiaga ni bizaacacabe que bidxíbicaʼ, bidxagayaacaʼ ne biʼniʼ búrlacaʼ laacabe,* casi peʼ cayuuyatu ni. 9 Ngue runi biiticabe ca bixhozebiidanu né espada, ne gunaazecabe xheelanu ne ca xiiñinu, hombre ne gunaa. 10 Yanna, de ndaaniʼ ladxiduáʼ cayale guneʼ ti acuerdu né Jehová, Dios stiʼ Israel, para maʼ cadi guidxiichinebe laanu. 11 Xiiñecaʼ, cadi para quiidxinásitu* yanna riʼ, purtiʼ Jehová peʼ gulí laatu para guzuhuaatu nezalú, para gúnitu xhiiñaʼ ne para gúnitu guʼxhuʼ stiʼ ca sacrificiu stibe».

12 Ngue runi bizulú ca levita que guyuucaʼ listu para gúnicaʼ xhiiñacaʼ. De lade ca cohatita la? nuu Máhat xiiñiʼ Amasái ne Joel xiiñiʼ Azarías; de lade ca merarita la? nuu Quis xiiñiʼ Abdí ne Azarías xiiñiʼ Jehalelel; de lade ca guersonita la? nuu Joá xiiñiʼ Zimá ne Edén xiiñiʼ Joá; 13 de lade ca xiiñiʼ Elizafán la? nuu Simrí ne Jeuel; de lade ca xiiñiʼ Asaf la? nuu Zacarías ne Matanías; 14 de lade ca xiiñiʼ Hemán la? nuu Jehiel ne Simeí; de lade ca xiiñiʼ Jedutún la? nuu Semaya ne Uziel. 15 Bichíñacabe ca bíʼchicabe, bisiácabe laacabe ne bisiácabe* ra lidxi Jehová casi biʼniʼ mandar rey que laacabe ne casi peʼ modo guníʼ Jehová. 16 Para guyuu ca sacerdote que ra lidxi Jehová ne bisiacaʼ ni, guleecabe guiráʼ ca cosa yuudxuʼ ni bidxélacabe ndaaniʼ templu stiʼ Jehová ne yenécabe cani lu patiu stiʼ lidxi Jehová. De raqué gulee ca levita que guiráʼ ca cosa que ne yenécabe cani ndaaniʼ valle stiʼ Cedrón. 17 Zaqué nga bizulú bisiácabe primé dxi stiʼ primé beeu que, ne biaʼsi ra bizaa xhono gubidxa stiʼ beeu que yendácabe ra nuu pórtico stiʼ Jehová. Xhono gubidxa bisiácabe ra lidxi Jehová ne 16 stiʼ primé beeu que bilúxecabe.

18 Despué guyécabe ra nuu rey Ezequías ne gúdxicabe laa: «Maʼ bisiadu guidubi naca lidxi Jehová, altar ra rudiicabe ofrenda ni riaʼquiʼ ne guiráʼ ca cosa ni riquiiñecabe para laani, ne mexaʼ stiʼ ca pan ni raʼtaʼ pur capa* ne guiráʼ ca cosa ni riquiiñecabe para laani. 19 Ne maʼ bisiadu guiráʼ ca cosa ni guxhaʼ rey Acaz tiempu biʼniʼ mandar, dxi bicheené Dios, maʼ guluʼdu cani listu ne yanna maʼ nuucani nezalú altar stiʼ Jehová».

20 Tempránuruʼ biasa rey Ezequías, bichiña guiráʼ ca príncipe stiʼ guidxi que ne guyécabe* ra lidxi Jehová. 21 Yenécabe gadxe toro, gadxe dendxuʼ barracu, ne gadxe dendxuhuiiniʼ ne gadxe chivu barracu para gudiicabe casi ofrenda pur pecadu stiʼ guiráʼ ca ni nabeza ra lidxi rey que, stiʼ guiráʼ ca ni runi dxiiñaʼ ndaaniʼ templu que ne stiʼ ca binni de Judá. Ne gúdxibe ca sacerdote, ca ni zeeda de familia stiʼ Aarón, gudiicaʼ ca ofrenda riʼ lu altar stiʼ Jehová. 22 De raqué biiticabe ca toro que ne bitopa ca sacerdote rini stícame ne birubacaʼ* ni lu altar que; despué biiticabe ca dendxuʼ barracu que ne birúbacabe rini stícame lu altar que, laaca biiticabe ca dendxuhuiiniʼ que ne birúbacabe rini stícame lu altar que. 23 De raqué yenécabe ca chivu barracu stiʼ ofrenda pur pecadu nezalú rey ne nezalú guidxi que, ne gudixhenácabe luguiácame. 24 Ne biiti ca sacerdote que laacame ne bíʼnicabe ti ofrenda pur pecadu lu altar que né rini stícame para guixiá donda stiʼ guidubi guidxi Israel, purtiʼ guníʼ rey que naquiiñeʼ gudiicabe ofrenda ni riaʼquiʼ ne ofrenda pur pecadu que pur guidubi naca guidxi Israel.

25 Laga cayaca ndiʼ, biʼniʼ mandarbe ca levita guzuhuaacaʼ ra lidxi Jehová ne guinaazecaʼ címbalo,* instrumentu ni napa cuerda ne arpa, casi biʼniʼ mandar David, Gad —hombre ni ritidxi rey que ca visión ni rudii Dios laa— ne profeta Natán gácani, purtiʼ nga nga mandamientu ni bidii Jehová laacabe de ruaa ca profeta. 26 Ngue runi bizuhuaa ca levita que raqué, naazecaʼ ca instrumentu stiʼ David ne ca sacerdote que naazecaʼ trompeta.

27 Para biʼniʼ mandar Ezequías gudiicabe sacrificiu ni riaʼquiʼ que lu altar que. Ora bizulúcabe cudiicabe sacrificiu ni riaʼquiʼ que, bizulú cayuundacabe ti canción para Jehová ne laaca bixhídxicabe ca trompeta que laga caxidxi ca instrumentu stiʼ David, rey stiʼ Israel. 28 Ne guiráʼ ca ni nuu raqué bizuxíbicaʼ laga cayuundacabe canción que ne cuxhídxicabe ca trompeta que, ne bíʼnicabe guiráʼ ndiʼ dede ora biluxe bidiicabe ofrenda ni riaʼquiʼ que. 29 Casi peʼ biluxe bidiicabe ofrenda que, bizuxibi rey que dede gudixhe ique layú, ne ngueca biʼniʼ guiráʼ ca ni nuu ra nuube. 30 Gudxi rey Ezequías ne ca príncipe que ca levita iquiiñecaʼ ni guníʼ David para gusisácacaʼ Jehová ne ni guníʼ Asaf, hombre ni ricaa visión que. Ngue runi biindacabe né stale guendanayecheʼ ne bizuxíbicabe dede gudixhe íquecabe layú.

31 Para guníʼ Ezequías: «Yanna, cumu maʼ bireechutu para gúnitu xhiiñaʼ Jehová la? latáʼ ra lidxi Jehová ne latané sacrificiu ne ofrenda para gudiitu xquixe peʼ Dios». Ngue runi guiráʼ binni que bizulú bedanecaʼ sacrificiu ne ofrenda para gudiicaʼ xquixe peʼ Dios, ne zaqueca biʼniʼ guiráʼ ca ni biale de ndaaniʼ ladxidóʼ gudii ofrenda ni riaʼquiʼ. 32 Biaʼ riʼ nga ca ofrenda ni riaʼquiʼ ni bedané ca binni que, 70 yuze, ti gayuaa dendxuʼ barracu, chupa gayuaa dendxuhuiiniʼ —guiráʼ ofrenda ni riaʼquiʼ riʼ nga bedanécabe para Jehová—, 33 ne ndiʼ nga xcaadxi ofrenda bidiicabe Dios, xhoopaʼ gayuaa yuze ne chonna mil dendxuʼ. 34 Peru huaxiéʼ sacerdote nuu para cuee guidiladi guiráʼ ca maniʼ ni chigudiicabe para ofrenda ni riaʼquiʼ que. Ngue runi gucané ca bíʼchicabe laacabe, ca levita, dede ora biluxe dxiiñaʼ que ne dede ora biluxe bisiá ca sacerdote que laacaʼ, purtiʼ jma bizaalaʼdxiʼ ca levita gusiacaʼ laacaʼ que ca sacerdote que. 35 Laaca bidiicabe stale ofrenda ni riaʼquiʼ, aparte za stiʼ ca sacrificiu de paz ne ca ofrenda ni rixii* para ca ofrenda ni riaʼquiʼ. Zaqué nga biguetaʼ bíʼnicabe dxiiñaʼ ra lidxi Jehová. 36 Guizáʼ nayecheʼ guyuu Ezequías ne guidubi guidxi que pur ni biʼniʼ Dios ni dxandíʼ pur laacabe, purtiʼ guizáʼ nagueenda bizaaca guiráʼ ndiʼ.