Primé libru de Reyes

10 Binadiaga reina de Saba* pabiáʼ cusisaca binni Jehová pur guendabiaaniʼ bidii Salomón. Ngue runi guyebe ra nuu para gúnibe laa caadxi pregunta nagana, ti gánnabe pa dxandíʼ nuu xpiaaniʼ. 2 Yendánebe stale de ca xpínnibe Jerusalén, beedanécabe camellu ni nuaʼ aceite rindáʼ naxhi,* stale oro ne guié sicarú. Ne guyebe nezalú Salomón yetídxibe laa guiráʼ ni nuu ndaaniʼ ladxidoʼbe.* 3 Ne bicabi Salomón guiráʼ ni gunabadiidxabe laa. Qué ñaca nagana para rey que nusiene laabe guiráʼ xixé ni nuube gánnabe.

4 Ora biʼyaʼ reina de Saba pabiáʼ nuu xpiaaniʼ Salomón, ne biiyabe yoo ni bicuí, 5 ca guendaró ni nexheʼ lu mexaʼ stiʼ, modo zuba ca mozo stiʼ, modo cayuni tender ca meseru que ne ni nácucaʼ, ne ora bíʼyabe ca coperu stiʼ ne guiráʼ sacrificiu ni riaʼquiʼ ni rudii Salomón ra lidxi Jehová, dede qué nidxélabe xi niniʼbe. 6 Ngue runi rábibe rey que: «Dxandíʼ ngue guiráʼ ni huayunadiagaʼ ndaaniʼ xquidxeʼ de guiráʼ ni huayúniluʼ ne pabiáʼ nuu xpiaaniluʼ. 7 Peru qué ñuneʼ cré guiráʼ ni caníʼcabe dede dxi bedandayaʼ raríʼ ne naa piaʼ* biiyaʼ ni ne bidieeʼ cuenta gastiʼ ngue ni gúdxicabe naa. Nápaluʼ stale guendabiaaniʼ ne stale cosa risaca, jma que biaʼ binadiagaʼ. 8 ¡Dichoso ca binni xquídxiluʼ ne dichoso ca mozo stiluʼ, purtiʼ siempre nuucaʼ ra nuuluʼ cayunadiágacaʼ pabiáʼ nuu xpiaaniluʼ! 9 Guisaca Jehová, Dios stiluʼ, ni nuu nayecheʼ pur ni cayúniluʼ ne ni bicuí lii lu trono stiʼ Israel. Cumu qué ziuu dxi gusaana Jehová de gannaxhii guidxi Israel la? maʼ bíʼnibe lii rey para gúniluʼ ni jneza ne gúniluʼ justicia ora maʼ cayuni mandarluʼ».

10 De raqué bidiibe rey que ti gayuaa gande talentu* de oro ne ziáʼ aceite rindáʼ naxhi ne stale guié sicarú. Ne qué ñuuruʼ dxi ñedanécabe ziáʼ aceite ni rindáʼ naxhi casi ni bidii reina de Saba rey Salomón.

11 Ca barcu stiʼ Hiram, ni né oro de Ofir, laaca beedanécani stale yaga sándalo de Ofir ne stale guié sicarú. 12 Ne guiráʼ yaga sándalo que biquiiñeʼ rey que cani para bi’ni’ ca poste stiʼ ca barandal ni ziné lidxi Jehová ne lídxibe,* ne para guyáʼ arpa ne xcaadxi instrumentu ni napa cuerda para ca ni ruundaʼ. De yannadxí oraríʼ, qué ñuuruʼ dxi ñedanécabe yaga sándalo casi ni beedanécabe dxi que.

13 Laaca bidii rey Salomón reina de Saba guiráʼ ni gucala’dxi’ ne ni gunabaʼ laabe, aparte de ca cosa ni biale de laabe gusigáʼdebe laa. De raqué, biree reina que zeʼ, biguetané ca mozo stiʼ xquidxi.

14 Guiráʼ iza ricaa rey Salomón xhoopaʼ gayuaa sesenta y seis talentu de oro, 15 aparte de ni redané ca ni rutoo ne ca comerciante, ne ni rudii ca rey stiʼ ca árabe laabe ne ca gobernador stiʼ guidxi que.

16 Laaca bi’ni’ rey Salomón chupa gayuaa escudu naro’ba’ de oro ni nuchaʼ sti guiibaʼ (cada escudu napa xhoopaʼ gayuaa siclo* de oro) 17 ne chonna gayuaa escudu nahuiiniʼ* de oro ni nuchaʼ sti guiibaʼ (cada escudu napa chonna mina* de oro). Para yené rey que cani ndaaniʼ yoo ni láʼ Bosque stiʼ Líbano.

18 Laaca bi’ni’ rey que ti trono naro’ba’ de marfil ne bi’ni’ forrarbe ni de oro ni maʼ guca refinar. 19 Bíʼnibe xhoopaʼ escalón para quíbacabe ra nuu trono que ne luguiáʼ de laani bíʼnibe ti bandá’huiini’ casi ti arcu. Cada ladu de asientu que napa ra quixhenácabe ne cueʼ cada ladu ra riguixhenácabe que zuhuaa ti lión. 20 Lu xhoopaʼ escalón que zuhuaa 12 lión, tobi cada ladu de ca escalón que, ninruʼ sti rey qué gapa ti trono zaqué.

21 De oro guiráʼ ca copa stiʼ rey Salomón ne laaca de oro puru guiráʼ cosa ni riquiiñecabe ndaaniʼ yoo láʼ Bosque stiʼ Líbano. Qué ñápabe nin ti cosa de plata purtiʼ ca dxi bibani Salomón qué risaca plata. 22 Gupa rey que caadxi barcu lu nisadóʼ ni rié Tarsis ne guyuucani lade ca barcu stiʼ Hiram. Cada chonna iza ribiguetaʼ ca barcu que de Tarsis, maʼ nécani oro, plata, marfil, migu ne pavo real.

23 Beedagaca Salomón rey ni jma ricu ne ni jma nuu xpiaaniʼ lade guiráʼ rey nuu lu guidxilayú. 24 Ngue runi ruyubi binni de guiráʼ ladu cheʼ ra nuu Salomón para gucaadiágaca’ laabe ne gúʼyacaʼ pabiáʼ guendabiaaniʼ bidii Dios laabe. 25 Ne guiráʼ iza reedanécabe regalu ra nuube: rudiicabe laabe cosa de plata, de oro, lari, guiibaʼ ni rinécabe lu guerra, aceite rindáʼ naxhi, caballu ne mulaʼ.

26 Bitale Salomón ca carru ne ca caballu* stiʼ. Beeda gápabe ti mil tapa gayuaa carru ne doce mil caballu* ni bizuhuaabe ndaaniʼ ca guidxi ra nuu ca carru stibe, ne ndaaniʼ guidxi Jerusalén, gaxha de ra nuube.

27 Tantu stale plata gupa rey que Jerusalén, maʼ ruluíʼcani casi guié, ne bitálebe stale tablón de cedru casi ca sicómoro ni nuu Sefelá.

28 De ndaaniʼ guidxi Egipto reeda ca caballu stiʼ Salomón; maca pur manada rizíʼ ca xpinni Salomón ca caballu que* ne maca nexheʼ preciu stícame. 29 Cada carru rizíʼcabe Egipto risaca xhoopaʼ gayuaa pieza de plata ne cada caballu risaca ti gayuaa cincuenta pieza de plata. De raqué ruseendacabe cani ra nuu guiráʼ ca rey stiʼ ca hitita ne ra nuu ca rey stiʼ Siria.