Guiropa libru de Reyes
19 Casi peʼ binadiaga rey Ezequías ni, gucheza xhaba, gucu lari nachonga* ne guyuu ra lidxi Jehová. 2 Para biseendabe caadxi hombre chiguuyacaʼ profeta Isaías, xiiñiʼ Amoz. Biseendabe Eliaquim, hombre ni ruuyaʼ ca dxiiñaʼ raca ndaaniʼ palaciu, Sebná secretariu que ne ca hombre huaniisi ni zániru lade ca sacerdote, ne nácucaʼ lari nachonga. 3 Ndiʼ nga ni gúdxicabe Isaías: «Ndiʼ nga ni ná Ezequías: “Yannadxí guiradu nuudu xizaa,* nabé feu modo cadindenécabe laadu ne cusituícabe ludu, purtiʼ zeeda gácadu casi ti gunaa ni mayaca gapa baʼduʼ peru qué gapa stipa para xhana. 4 Zándaca Jehová, Dios stiluʼ, gunadiaga guiráʼ ni caníʼ rabsaqué, hombre ni biseendaʼ rey stiʼ Asiria para gucaalú Dios ni nabani, ne Jehová, Dios stiluʼ, cuidxi cuenta laabe pur ca diidxaʼ ni binadiaga caniʼbe. Nga runi biʼniʼ ti oración pur ca binni ni nabézaruʼ lu layú riʼ”».
5 Para guyé ca xpinni rey Ezequías ra nuu Isaías ne guyuucaʼ ra nuube, 6 de raqué ná Isaías rabi laacabe: «Ndiʼ nga ni naquiiñeʼ gábitu señor stitu: “Ndiʼ nga ni ná Jehová: «Cadi guidxíbiluʼ pur ca diidxaʼ ni binadiágaluʼ, cadi dxandíʼ ca cosa feu ni caníʼ ca xpinni rey Asiria de naa. 7 Zaguaaʼ ti ideá* ndaaniʼ íquebe, ne zunadiágabe ti noticia ne zabiguétabe xquídxibe; ne zudieeʼ lugar guuticabe laabe né espada ndaaniʼ xquídxibe»”».
8 Ora binadiaga rabsaqué que maʼ zeʼ rey stiʼ Asiria de Lakís, biguetaʼ yeguuyabe laa ne yendabe laa cadxelasaané guidxi Libná. 9 De raqué yetídxicabe rey que xi cayuni Tirhacá, rey stiʼ Etiopía: «Zeedabe para gucaalube lii». Para biguetaʼ biseendabe caadxi hombre ra nuu Ezequías ne biʼniʼ mandarbe laacaʼ: 10 «Ndiʼ nga ni chitídxitu Ezequías, rey stiʼ Judá: “Neca nápaluʼ confianza Dios stiluʼ, cadi gudiiluʼ lugar quítebe lii ora guiniʼbe «Qué ziaana Jerusalén lu náʼ rey stiʼ Asiria». 11 ¡Biaa! Maʼ binadiágaluʼ xi maʼ biʼniʼ ca rey stiʼ Asiria guiráʼ ca guidxi ni binitilucaʼ. Yanna, ¿ñee rábiluʼ zalaluʼ la? 12 ¿Gunda xa bilá ca dios stiʼ ca guidxi ni binitilú ca bixhozebiidaʼ* laacaʼ? ¿Paraa biaana Gozán, Harán, Rézef ne ca binni de Edén ni guyuu Tel-Asar? 13 ¿Paraa biaana rey stiʼ Hamat, rey stiʼ Arpad ne ca rey stiʼ ca guidxi stiʼ Sefarvaim, stiʼ Hená ne stiʼ Ivá?”».
14 De raqué gucuaa Ezequías ca carta ni bedané ca hombre que ne biindabe cani. Despué guyebe ra lidxi Jehová, bichiaabe cani ne gudíxhebe cani nezalú Jehová. 15 Para bi’ni’ Ezequías ti oración nezalú Jehová ne ná: «Señor Jehová, Dios stiʼ Israel, ni zuba lu trono stiʼ luguiáʼ* ca querubín. Lade guiráʼ ca reinu ni nuu lu guidxilayú, lii si nga Dios ni dxandíʼ. Lii bizaʼluʼ guibáʼ ne guidxilayú. 16 ¡Bicaadiaga naa Jehová, Dios stinneʼ, bicaadiaga naa! ¡Bixhelelú ne biiyaʼ, Jehová, Dios stinneʼ! Bicaadiaga guiráʼ ca diidxaʼ ni biseendaʼ Senaquerib ra nuaaʼ para gucaalú Dios ni nabani. 17 Jehová, Dios stinneʼ, dxandíʼ peʼ maʼ binitilú ca rey stiʼ Asiria ca guidxi ca ne ca layú stícani. 18 Ne maʼ bisáʼbicaʼ ca dios sticabe lu bele, purtiʼ cadi dxandíʼ dios laacaʼ, binni si nga bizáʼ cani de yaga ne de guié, nga runi gunda binidécabe cani. 19 Peru yanna, Jehová, Dios stidu, por favor, canábadu lii gulaluʼ laadu de lu nabe. Para ganna guiráʼ ca reinu ni nuu lu guidxilayú, lii si nga Dios, Jehová, Dios stinneʼ».
20 Para biseendaʼ Isaías, xiiñiʼ Amós, tu chitidxi Ezequías ca diidxaʼ riʼ: «Ndiʼ nga ni ná Jehová, Dios stiʼ Israel: “Maʼ binadiagaʼ oración ni bíʼniluʼ ra cayábiluʼ naa ni guníʼ Senaquerib rey stiʼ Asiria. 21 Ndiʼ nga ca diidxaʼ ni guníʼ Jehová para laabe:
«Cayuni binnidxaapaʼ stiʼ Sion menu lii, cayuni búrlabe lii.
Runiibi ique xiiñidxaapaʼ Jerusalén ora guyadxí lii.
22 ¿Tu laa bicaaluluʼ ne tudé guniʼluʼ mal?*
¿Tu luguiáʼ gundísaluʼ ridxi
ne tu laa biiyatúxhuluʼ?
¡Santo stiʼ Israel peʼ nga bíʼniluʼ ni!
23 Biquiiñeluʼ ca mensajeru stiluʼ para gucaaluluʼ Jehová ne guniʼluʼ:
“Zaguibaniáʼ guiráʼ carru stinneʼ ni rié lu guerra
dede ra nuu ca lugar jma nasoo ni nuu lu ca dani ca,
dede ca lugar jma zitu ni nuu lu Líbano.
Zugayaʼ ca yaga cedru ni jma nasoo zuhuaa luni ne ca yaga enebro ni jma galán nuu luni.
Ziuaaʼ ca lugar jma nagaʼchiʼ ne jma zitu stini, ca bosque stini ra jma zuhuaa yaga.
24 Zandaaʼ bizé lu xcaadxi layú ne zeeʼ nisa stícani;
né ca batañeeʼ zucuiidxeʼ guiráʼ canal* stiʼ Egipto.
25 ¿Qué huayunadiágaluʼ ni la? Maʼ xadxí gudixheʼ gácani* zacá.
Maʼ gudiʼdiʼ stale dxi, dede dxi gudixheʼ chaahueʼ ni.
Yanna nga chiguneʼ ni.
Zusaanaluʼ ca guidxi nadipaʼ ca casi riaana montón escombro ni maʼ xadxí de reeche.
26 Guiráʼ ca binni nabeza ndaanicani ziaana nacaʼ sin stipa;
guizáʼ zadxíbicabe ne zatuí lúcabe.
Ziaanacabe casi ca yagahuiiniʼ ni nuu lu ca layú ca
ne casi riaana guixi gaʼ, casi riaana guixi ni rigaa ique yoo, ni ruzaaquiʼ bi ni zeeda ladu rindani gubidxa.
27 Peru nannaʼ dxiicheʼ pora ribiluʼ, pora rireeluʼ ne pora riuuluʼ,
ne pora cadxiichineluʼ naa,
28 purtiʼ maʼ biiyaʼ cadxiichineluʼ naa ne maʼ binadiagaʼ cabidxiaaluʼ.
Nga runi zuzaa ti gandxu xiiluʼ ne zaguaa frenu stinneʼ lade ca guidiruaaluʼ,
ne zudxiguetaʼ lii nézaca zeeduʼ».
29 »”Ne ndiʼ nga chigaca ti señal para lii:* iza riʼ zoto ca biidxiʼ ni guindani stubi,* ne lu guiropa iza laaca zoto ca biidxiʼ ni gudiicani, peru lu guionna iza zudxiibatu ne zandísatu cosecha, zudxiibatu lubáʼ uva ne zoto ni gudiini. 30 Ca binni de Judá ni guxooñeʼ ne ca ni guiaana, zacaa xcucaʼ xagueteʼ ne zudiicaʼ cuananaxhi sticaʼ luguiáʼ. 31 Purtiʼ de Jerusalén zaree caadxi, ne de lu dani Sion zaree guiráʼ ca ni guilá. Zuni Jehová, Dios stiʼ ca ejércitu, ndiʼ purtiʼ guizáʼ racaláʼdxibe gúnibe ni.
32 »”Nga runi, ndiʼ nga ni ná Jehová chiguizaaca rey stiʼ Asiria:
«Qué ziuudibe ndaaniʼ guidxi riʼ,
qué zundaabe nin ti flecha guidxi ca,
qué lica zaquiiñebe escudu stibe ora gucaalube ni,
qué zandísabe nin ti rampa para gucaalube ni.
33 Nézaca zeedabe zabiguétabe;
qué ziuube ndaaniʼ guidxi riʼ», ná Jehová.
34 «Zadindeʼ pur guidxi riʼ ne pur naa zulaʼyaʼ ni
ne pur David, hombre ni biʼniʼ xhiiñaʼ»”».
35 Gueelaʼ queca beeda ángel stiʼ Jehová ne biiti ti gayuaa ochenta y cinco mil hombre ni nuu ra campamentu stiʼ ca asiriu. Ca ni biasa sti dxi siadóʼ que biiyacaʼ nexheʼ guiráʼ ca gueʼtuʼ que. 36 Para biree Senaquerib, rey stiʼ Asiria, zeʼ, biguetaʼ Nínive ne biaana raqué. 37 Ne laga zuxíbibe ndaaniʼ templu stiʼ Nisroc, dios stibe, beeda ca xiiñibe Adramélec ne Sarézer, ne biiticaʼ laabe né espada. Despué bixooñecaʼ lu layú stiʼ Ararat. Ne maʼ xiiñibe Esar-Hadón beeda gaca rey.