Cusiene ti gunaa judía xiñee bichaa ca ni runi cré

Gudxi laadu xiixa de lii.

Guleʼ Estados Unidos lu iza 1979. Dxi napaʼ chonna iza guca divorciar bixhozeʼ ne jñaaʼ. Bisiniisi jñaaʼ naa casi judía, ne guyaaʼ ca scuela stiʼ ca judíu ni láʼ yeshivás. Dxi napaʼ gadxe iza yendézadu guidxi Israel ne raqué guyaaʼ scuela ni nuu kibutz, ti colonia ra rúnicabe dxiiñaʼ lu layú. Guyuʼdu raqué ti iza ne despué guyuʼdu México.

Neca gastiʼ ti sinagoga gaxha de ra lidxeʼ, qué nusaanaʼ ca costumbre stinneʼ: guiráʼ sábadu rucaaguieʼ guiʼriʼ, ruundaʼ Torá, ti libru ni bicaa ca judíu ne riquiiñeʼ sidur, libru ra zeeda caadxi oración para guneʼ orar. Riuuladxeʼ gabeʼ ca ni riniáʼ scuela religión stinneʼ nga ni dxandíʼ. Qué huayuu dxi guundaʼ Nuevo Testamento ra cuzeeteʼ modo biʼniʼ predicar Jesucristu ne ca ni bisiidiʼ purtiʼ siempre gudxi jñaaʼ naa cadi galán guundaʼ cani purtiʼ zándaca guchaa cani modo riníʼ iqueʼ.

¿Xiñee bíʼndaluʼ Nuevo Testamento?

Dxi napaʼ 17 iza bibiguetaʼ Estados Unidos para gunduuxeʼ scuela stinneʼ. Gudxi ti xhamiguaʼ naa naca xpinni Cristu ne para guibaneʼ nayecheʼ caquiiñeʼ guneʼ cré dxandíʼ nuu Jesús.

-Óraque gudxeʼ laabe: «Cadi dxandíʼ ni rusiidicabe ca binni ni runi cré Jesús.

-¿Huayúʼndaluʼ Nuevo Testamento la?

-Coʼ.

-Yanna, ¿ximodo zanda guiniʼluʼ zacá yaʼ? Cadi galán guiniʼluʼ zacá pa qué gánnaluʼ.

Ne dxandíʼ ni nabe que. Dede catuí luaʼ gucuaaʼ Biblia stibe para guundaʼ ni zeeda lu Nuevo Testamento.

¿Ximodo bíʼyaluʼ ni bíʼndaluʼ que yaʼ?

Guizáʼ bidxagayaaʼ ora gunnaʼ caadxi judíu nga bicaa ni zeeda lu Nuevo Testamento. Ra jma ziyuundaʼ ni, bidieeʼ cuenta naca Jesús ti hombre ni nadxii, humilde ne ni racalaʼdxiʼ gacané binni ne cadi gacanécabe laa. Dede guyaaʼ ra biblioteca ne biyubeʼ caadxi libru ni caníʼ de laabe. Peru nin tobi de laacani qué ñacané ca ni naa ñeneʼ pa laabe nga Mesías. Caadxi de ca libru que ná Jesús nga Dios, peru qué ñuneʼ cré ngue. Guníʼ iqueʼ: «¿Tu riniʼné Jesús ora runi orar yaʼ? ¿Laca laa la?». Ne Jesús guti, peru Biblia ná Dios qué ziuu dxi gatiʼ.a

¿Xi bíʼniluʼ óraque yaʼ?

Biyubeʼ gannaʼ gunna nga ni dxandíʼ. Ngue runi, dede cayuunaʼ bineʼ orar Dios de guidubi ladxiduáʼ ne ngue nga primé biaje bineʼ ni sin niquiiñeʼ sidur. Casi peʼ biluxeʼ bineʼ orar bixhidxi náʼ chupa testigu stiʼ Jehová ra puertaʼ lidxeʼ. Gunidu ti ratu ne bisaananécabe naa tobi de ca folletu stícabe. Pur ca ni bisiidicabe naa que ne ca ni biindaʼ lu folletu que bidieeʼ cuenta cani runi crécabe dxandíʼ peʼ zeeda cani lu Biblia. Casi tobi de laacani nga, ca Testigu qué runi crecaʼ naca Jesús parte de Trinidad, sínuque laabe nga «Xiiñiʼ Dios»b ne «ni bizáʼ Dios primé lade guiráʼ cosa».c

Despué bibiguetaʼ México ne qué nusaanaʼ de ñuneʼ estudiar niaʼ ca Testigu ca profecía ni caníʼ de Mesías. ¡Guizáʼ stale ca ni! Peru neca zaqué gúparuaʼ duda. Guníʼ iqueʼ: «¿Ñee Jesús si nga biʼniʼ cumplir ca profecía ca la? ¿Laga pa bíʼnisibe de que laabe nga Mesías para quítebe binni yaʼ?».

¿Xi gucané lii chuʼluʼ seguru dxandíʼ ca ni caziidiluʼ que yaʼ?

Biluíʼ ca Testigu naa xcaadxi profecía para gucanecaʼ naa guieneʼ Jesús si nga biʼniʼ cumplir cani. Tobi de laani nga, jma de gadxe gayuaa iza ante guníʼ Miqueas zale Mesías guidxi Belén.d ¿Peru tu laa zanda cuí paraa chigale yaʼ? Isaías bicaa zuuticabe Mesías casi ti binni malu, peru zucaachicabe laa lade binni ricu.e Guca cumplir ca profecía riʼ luguiáʼ Jesús.

Ora gunnaʼ padé zeeda Jesús bidieeʼ cuenta laabe nga Mesías. Lu Biblia ná zeeda Mesías de familia stiʼ rey David.f Cumu gupa ca judíu que ca registru stiʼ ca familia ca la? nga runi gunna dxíchicabe zeeda Jesús de familia stiʼ David ne pur nga maʼ qué ñanda niníʼ ca enemigu stiʼ Jesús cadi laabe nga Mesías. Purtiʼ rihuinni dxichi zeedabe de familia stiʼ rey David. Ne dede guníʼ stale binni laabe nga «Xiiñiʼ David».g

Lu iza 70, treinta y siete iza despué de guti Jesús bicaalú ca romanu guidxi Jerusalén ne biniti ca judíu guiráʼ ca registru ni nápacaʼ. Nga runi para guihuinni Jesús nga Mesías que gupa xidé beedabe ante de iza ca.

¿Xi decisión gucuaaluʼ yaʼ?

Lu Deuteronomio 18:18, 19, guníʼ Dios ziuu sti profeta ndaaniʼ guidxi Israel casi Moisés ne laaca guniʼbe: «Zabidxeʼ cuenta ca ni qué gucaadiagaʼ guiráʼ ca diidxaʼ ni guiniʼbe lu laʼyaʼ». Ra bineʼ estudiar chaahueʼ guidubi Biblia, bidieeʼ cuenta dxandíʼ Jesús de Nazaret nga profeta que.