Ñee nápanu razón para guni crenu laanu la?

XIMODO nga guni cré binni laa yaʼ. Ñee nannuʼ la?... Guidúʼyanu ximodo. Huayuu ora gacalaʼdxuʼ guʼnuʼ xiixa neca cadi galanpeʼ guiree ni lii la? Casi uguuñeluʼ pelota o guichésaluʼ lu ti doo. Ñee guyuu tu bixidxi lii ne gudxi lii: «Naa rúneni jma galán que lii la?»... Binni ni guni zacá la? cayuni cré laa.

Ximodo runi sentirluʼ ora gúnicabe zacá yaʼ. Riulaʼdxuʼ la?... Yanna, ximodo raʼbuʼ zuni sentir stuudxi pa liipeʼ nga cuchaluʼ naróʼ stiluʼ yaʼ.... Nouʼ galán nga gábinu tuuxa: «Naa jma nuu xpiaaneʼ que lii la?»... Ñee riulaʼdxiʼ Jiobá binni ni riníʼ zacá la?...

Maestru Ni Jma Nanna Gusiidiʼ que binibiaʼbe binni ni bichacaʼ naróʼ sticaʼ jma que stuudxi. Rudxiibacaʼ laca laacaʼ ne rindétecaʼ stuudxi binni. Ngue runi, ti dxi guniʼné Jesús laacabe ti historia ni rusihuinni pabiáʼ malu nga gudxíʼbanu laanu jma que stuudxi. Gucaadiáganu ni.

Laabe guniʼbe de ti fariseu ne de tobi ni runi cobrar impuestu. Ca fariseu que nga ca maestru ni rusiidicaʼ Ley stiʼ Dios, laacaʼ nabé rúnicaʼ laacaʼ jma nachaʼhuiʼ que stuudxi binni. Fariseu ni caníʼ Jesús riʼ guyebe ra yuʼduʼ ni nuu Jerusalén para guni orarbe Dios.

Jesús na hombre ni runi cobrar impuestu que laaca guyé ra yuʼduʼ para guni orar. Stale de ca binni que, qué ridxaagacaʼ cani runi cobrar impuestu que purtiʼ nabé ribáʼnacaʼ xpueltu binni. Ne dxandíʼ, stale de laacaʼ ribáʼnacaʼ.

Fariseu que guyuu ndaaniʼ yuʼduʼ que ne biʼniʼ orar sicaríʼ: Rudiéʼ xquíxepeʼ lii Dios, purtiʼ cadi nacaʼ casi xcaadxi binni ca. Qué ribanaʼ, ne cadi malu naa. Ne nin cadi nacaʼ casi ni runi cobrar impuestu ca. Nachaahueʼ ne riaanaʼ sin gahuaʼ chupa tiru ndaaniʼ semana para gapaʼ jma tiempu guiníʼ iqueʼ lii. Rudiéʼ lii chii lu ti gayuaa de lu guiráʼ ni runeʼ ganar. Fariseu que dxandíʼ runi crebe laabe jma nachaʼhuiʼ que stuudxi binni, cadi dxandíʼ la?... Ne dede gúdxibe ni Dios.

Peru hombre ni runi cobrar impuestu que cadi zaqué diʼ laa. Qué niná diʼ nindisalú guibáʼ para ñuni orar. Bizuhuaabe zitu ne bigaanda íquebe. Ne dede gudápabe ladxidoʼbe para gusihuínnibe cayuubaʼ laabe pur ca stóndabe. Ne qué ñábidibe Dios nacháʼhuibe, sínuque nabe: «Biá naa, Dios, purti nabé huachee».

Tu tobi de ca hombre riʼ raʼbuʼ guyuulaʼdxiʼ Dios modo biʼniʼ yaʼ. Fariseu ni na jma nachaʼhuiʼ que la? O ni runi cobrar impuestu ni guca arrepentir pur ca stonda que....

Jesús na hombre ni runi cobrar impuestu que nga guyuulaʼdxiʼ Dios modo biʼniʼ. Xiñee yaʼ. Purtiʼ nabe tu gudxiibaʼ laca laa la? zatuilú, peru tu guindeteʼ laa la? zusisaca Dios laa (Lucas 18:9-14).

Xi cusiidiʼ Jesús ne historia riʼ yaʼ.... Bisiidibe cadi galán diʼ nga guiníʼ íquenu jma nacháʼhuinu que stuudxi. Zándaca qué guininu ni, peru ni gúninu nga zusihuinni xi riníʼ íquenu. Ñee huayuu ora gúniluʼ zacá la?... Guníʼ ique si xi guca apóstol Pedru.

Ora guníʼ Jesús zusaana guiráʼ ca apóstol stiʼ laa ora igaa la? Pedru bidxiibaʼ laa ne bicabi: «Neca ixele irá cabe de lii, peru naa qué ziuu dxi ixele de lii». Peru cadi dxandíʼ ni guníʼ Pedru que. Nabé biʼniʼ crebe laabe stálepeʼ. Laapebe bisaanabe Jesús. Peru despué bibiguétabe, casi zadúʼyanu lu capítulo 30 stiʼ libru riʼ (Mateo 26:31-33).

Guzeetenu ti ejemplu de ca dxi stinu riʼ. Zándaca pa lii ne xcompañéruluʼ guinabadiidxacabe laatu xiixa ra scuela. Xi ñaca pa nicábiluʼ nagueendaca, peru xcompañéruluʼ que coʼ yaʼ. Ya, ziuuluʼ galán ora nannuʼ xi guicabuʼ. Peru, nouʼ jneza nga guiníʼ íqueluʼ jma nannuʼ que xcompañéruluʼ purtiʼ bindaa para bicabi la?... Ñee galán nga gacalaʼdxuʼ guyadxícabe lii para gusituiluʼ lú xcompañéruluʼ que la?...

Nga nga ni biʼniʼ fariseu que. Nabé bidxiibabe laabe que hombre ni runi cobrar impuestu que. Peru Maestru Ni Jma Nanna Gusiidiʼ que guníʼ cadi jneza diʼ ngue nuu fariseu que. Nécapeʼ gúninu xiixa jma galán que stuudxi binni, peru qué riníʼ diʼ nga jma nuu xpiaaninu que laacabe.

Nga runi, pa nánnanu jma que sti binni, nouʼ ti razón nga para gudxíʼbanu laanu la?... Guníʼ ique ndiʼ: Ñee laanu bizanu xquendabiaaninu la?... Coʼ, Dios nga bidii ni laanu. Ne stale de cani nánnanu bizíʼdinu ni de sti binni. Zándaca pa bíʼndanu ni ndaaniʼ ti libru o tuuxa bisiidiʼ ni laanu. Neca de laasinu gánnanu xiixa, xi riquiiñenu para gúninu ni yaʼ.... Riquiiñenu guendabiaaniʼ bidii Dios laanu.

Ora tuuxa runi stale stipa pur guni xiixa la? galán gábinu laabe xiixa ni uguu gana laabe. Gudxi laabe guyuuláʼdxiluʼ ni bíʼnibe. Ne zándaca gacaneluʼ laabe gúnibe ni jma galán. Ñee qué ñuláʼdxiluʼ ñúnicabe lii zacá la?...

Nuu binni jma nadipaʼ que stuudxi. Xi ñaca pa lii jma nadípaluʼ que bíʼchiluʼ o bizáʼnaluʼ yaʼ. Nuu razón para gudxiibaluʼ lii la?... Coʼ xa. Ni runi laanu nadipaʼ nga ni ridoʼno. Ñee cadi dxandíʼ Dios nga rudii laanu biaaniʼ stiʼ gubidxa, nisaguié ne guiráʼ ni caquiiñeʼ para guiniisi ca yagahuiiniʼ ca ti gápanu ni guidoʼno la?... Nga runi, pa nadípanu la? naquiiñeʼ gudiʼnu xquíxepeʼ Dios (Hechos 14:16, 17).

Guirutiʼ tu riulaʼdxiʼ gunadiaga tuuxa gudxiibaʼ laca laa, njaʼ.... Guietenaláʼdxinu ca diidxaʼ ni guníʼ Jesús riʼ: «Laguni laacabe ni racalaʼdxi tu guni cabe laatu». Pa gúninu casi na ca diidxaʼ riʼ la? qué ziuu dxi gácanu casi fariseu ni biʼniʼ cré laa casi zeeda lu historia ni guníʼ Maestru Ni Jma Nanna Gusiidiʼ que (Lucas 6:31).

Ti biaje gúdxicabe Jesús nachaʼhuiʼ. Nouʼ guníʼ Maestru Ni Jma Nanna Gusiidiʼ que: «Ajaʼ, dxandíʼ binni nachaʼhuiʼ naa la?»... Coʼ, qué niníʼdibe ni, sínuque nabe: «Iruti ru nachaʼhui jma que tobi lucha Dios» (Marcos 10:18). Nécaxa Maestru Ni Jma Nanna Gusiidiʼ que, qué liica nucheebe, peru qué nudxiibabe laca laabe. Ni bíʼnibe nga bisisácabe Bixhózebe, Jiobá.

Yanna, ñee nuu tuuxa ni zanda gudxíʼbanu laa la?... Nuu pue. Zanda gudxíʼbanu ni bizáʼ laanu, nga nga Jiobá Dios. Ora gúʼyanu ti huadxí sicarú o xiixa ni bizáʼ Dios, zanda gábinu stuudxi binni: «¡Dios stinu, Jiobá nga bizáʼ ni!». Chuʼnu listu guiráʼ ora para guininu de guiráʼ cosa guizáʼ sicarú ni bizáʼ Jiobá dxiqué ne ni chiguni.