Ti reinu ni chiguni mandar lu guidubi Guidxilayú

Maʼ qué zandaa ziuu ti reinu ni guni mandar lu guidubi Guidxilayú. Ñuulaʼdxuʼ ñannuʼ gunáʼ nga reinu riʼ la?... Laani nga Reinu stiʼ Dios. Zúnini guidubi Guidxilayú riʼ ti paraísu ne zácani ti lugar sicarú para guibani binni. Ñuulaʼdxuʼ ñannuʼ jma de Reinu riʼ la?...

Ñee nannuʼ tuu nga ti rey la? Ti rey nga ti binni ni runi mandar lu ti reinu. Reinu stiʼ Dios laaca napa ti rey. Ñee nannuʼ tu laabe la?... ¡Laabe nga Jesús! Guibáʼ nga nuube ne maʼ qué zandaa zuni mandarbe guidubi guidxilayú. Peru, ñee jneza zuni mandar Jesús la? Ñee ziuʼnu nayecheʼ dxi maʼ guni mandarbe lu Guidxilayú la?...

¡Ziuʼnu nayecheʼ pue! Dxi gaca Guidxilayú riʼ ti paraísu maʼ qué ziuu guerra. ¡Maʼ qué lica zadinde binni! Guirutiʼ qué zaca huará ne guirutiʼ qué zati. Zuuyaʼ ca binni ni qué ruuyaʼ ne zunadiaga cani qué runadiaga. Ca binni ni qué randa rizá, zuxooñecaʼ ne zachésacaʼ. Guiráʼ binni zapa stale cosa galán ni gó. Ziuu guiráʼ maniʼ tobi si ne zanda quítenenu laacame. Ne ni jma sicarú nga stale de ca binni ni maʼ guti yanna riʼ, zabánicaʼ sti biaje. Stale de ca hombre ne gunaa ni biziidiluʼ historia stiʼ lu folletu riʼ, casi Rebeca, Rahab, David, Elías ne xcaadxi binni zabánicaʼ sti biaje. Cadi dxandíʼ ñuulaʼdxuʼ ñunibiaʼluʼ laacabe la?...

Nabé nadxii Jiobá lii ne racaláʼdxibe chuʼluʼ nayecheʼ. Biziidiʼ jma de laabe ne biʼniʼ cani cusiidibe lii. Pa gúniluʼ ni la? zabániluʼ sin qué chuʼ dxi gátiluʼ ndaaniʼ ti paraísu. Ñuuláʼdxiluʼ nibániluʼ ndaaniʼ Paraísu ca la?...