Promesa ni biʼniʼ Jefté

Bisaana ca israelita de guni adorarcaʼ Jiobá sti biaje ne bizulú biʼniʼ adorarcaʼ dios falsu. Peru qué ñapa ca dios falsu que laacabe ora bicaalú ca ammonita laacabe. Stale iza bininácabe ca israelita. Últimu la? gúdxicabe Jiobá: «Maʼ bichéʼnedu lii. Bilá laadu de lu náʼ ca enemigu stidu». Binidé ca israelita que ca bidóʼ nápacaʼ ne bizulú biʼniʼ adorarcaʼ Jiobá sti biaje. Ngue runi, ora biʼyaʼ Jiobá modo cayacanácabe la? biá laacabe.

Ngue runi gulí ca israelita ti hombre ni láʼ Jefté. Laa zaca líder stícabe ora tindenécabe ca ammonita. Biʼniʼ Jefté ti promesa Jiobá ne gúdxibe laa: «Pa gacaneluʼ laadu guni ganardu ca ammonita, zudieeʼ lii primé binni ni guiree ndaaniʼ lidxeʼ ni guidxágaluʼ naa ora guibiguetaʼ». Bicaadiaga Jiobá oración stiʼ Jefté ne gucanebe laa guni ganar.

Ora bibiguetaʼ Jefté ra lidxi, primé binni bidxagalú laabe nga xiiñibe. Tobi lucha xiiñidxaapabe. Zeeda guyaa ne zeeda guxhidxi pandereta stiʼ ora bidxagalú laabe. Yanna, ¿xi guni Jefté yaʼ? Bietenaláʼdxibe promesa ni bíʼnibe que ne guniʼbe: «¡Ay, xiiñeʼ! Maʼ gundaaluʼ ladxiduáʼ. Bineʼ ti promesa Jiobá ne para guneʼ cumplir ni la? napaʼ xidé guseendaʼ lii ndaaniʼ tabernáculo ni nuu Siló para gúniluʼ xhiiñabe». Sicaríʼ bicabi xiiñibe laabe: «Pa nga biʼniʼ prometerluʼ Jiobá la? apá, naquiiñeʼ guni cumplirluʼ ni. Peru rinabaʼ lii gudiiluʼ lugar chaaʼ né ca xhamigaʼ lu dani chupa beeu. Despué de nga, ziaaʼ ra tabernáculo». Bizuubaʼ xiiñiʼ Jefté diidxaʼ ne biʼniʼ dxiiñaʼ ra tabernáculo guidubi xquendanabani. Ne cada iza riganna ca xhamígabe laabe Siló.