Guzá Jesús lu nisa

Gunda bisibani Jesús gueʼtuʼ ne bisianda binni huará. Laaca gunda bicueezabe bi ne nisaguié. Biʼniʼ orar si Jesús lu dani que, biiyabe zedayasa ti tormenta lu nisadóʼ stiʼ Galilea. Biiyabe ca apóstol stibe nuucaʼ ndaaniʼ canuá que cayuni remarcaʼ nadipaʼ para cadi gudxiguetaʼ bi laacaʼ. Ngue runi biete Jesús de lu dani que ne guzá lu nisa zeʼ ra nuucabe. Ora biʼyaʼ ca apóstol que zeedazá tuuxa lu nisa que, guizáʼ bidxíbicaʼ. Peru Jesús guníʼ: «Naa ndiʼ. Cadi guidxíbitu».

Pedro guníʼ: «Señor, pa lii nga la? gudxi naa chaaʼ ra nuuluʼ». Para gudxi Jesús laabe: «¡Gudáʼ!». Ngue runi biete Pedro ndaaniʼ canuá que ne guzá lu nisa zeʼ ra nuu Jesús. Laga zidxiña Pedro ra nuu Jesús, biiyaʼ pabiáʼ reciu cundubi bi ne cayaba nisaguié, ngue runi bidxibi. Biʼniʼ sentirbe ziyaazibe ne bicaabe ti ridxi: «¡Señor, bilá naa!». Gunaazeʼ Jesús nabe ne gudxi laabe: «¿Xiñee bidxíbiluʼ pue? ¿Ñee qué gápaluʼ fe la?».

Gudxiʼbaʼ si Jesús ne Pedro ndaaniʼ canuá que, gulezadxí tormenta que. ¿Ñee ruxuíʼluluʼ xi biʼniʼ sentir ca apóstol que la? Laacabe guníʼcabe: «Dxandíʼ Xiiñiʼ Dios lii».

Cadi dxi que si nga gunda bicueeza Jesús fuerza stiʼ naturaleza. Sti biaje, ora zeʼ Jesús ne ca apóstol stiʼ ndaaniʼ canuá para chindacaʼ sti ladu nisadóʼ. Málasi biasa ti tormenta lu nisadóʼ. Nabé naroʼbaʼ ca ola que ne cadxelasaa cani canuá que ne bizulú bidaa nisa ndaaniʼ ni. Laga cayaca ndiʼ nisiaasiʼ Jesús, ngue runi bicuaaniʼ ca apóstol que laabe cucaacaʼ ridxi: «¡Maestru, maʼ chigátidu! ¡Bilá laadu!». Para biasa Jesús ne gudxi nisadóʼ que: «¡Gutadxí!». Oraqueca biaanadxí bi ne gutadxí nisadóʼ que. Para gunabadiidxaʼ Jesús ca apóstol stiʼ: «¿Ñee qué gápatu fe la?». Óraque ca apóstol que guniʼcaʼ: «¡Dede bi ne nisa ruzuubaʼ stiidxabe!». ¿Xi biziidiʼ ca apóstol que yaʼ? Biziidicabe pa gápacabe confianza Jesús la? gastiʼ qué zuchibi laacabe.