Bidxiguétabe ni bidxélabe

NELMA nga ti baʼdudxaapaʼ ni rugá guicha ique binni ndaaniʼ ti guidxi huiiniʼ ni láʼ Cruzeiro do Sul stiʼ guidxi Brasil. Cadi xadxí gudíʼdibe lu ti guendanagana ni bicaa laabe gusihuínnibe pa dxandíʼ rúnibe ni jneza casi ti xpinni Cristu. Dxi bizaaca ti desgracia neza ra nabézabe, ti gunaa ni napa ti negocio naroʼbaʼ ne rié rigaca chaahuiʼ guicha ique ra nuube, bisigaʼdeʼ laabe caadxi lari. Ora bichiabe ca lari que, bidxélabe 1,000 dólar ndaaniʼ ca bolsa stiʼ ti pantalón.

Bueltu ni bidxélabe que, biaʼ que ñuni ganarbe gadxe beeu ne cumu cadíʼdibe lu ti guendanagana la? caquiiñebe ni. Cumu biaba ti nisaguié naroʼbaʼ xquídxibe la? bidaa nisa que ndaaniʼ lídxibe ne binítibe guiráʼ ni nápabe, zaqueca bizaaca ca binnilídxibe. Ne bueltu que ñanda ñuni chaahuibe lídxibe ne dede ñaanaruʼ para ñacanebe ca binnilídxibe. Peru cumu nánnabe zucheenebe Dios pur cani maʼ biziidibe de lu Biblia la? ngue bicaa laabe gudxiguétabe xpueltu gunaa que (Hebreos 13:18).

Sti dxi que, ante guixeleʼ ra rúnibe dxiiñaʼ biyúbibe gunaa ni bisigaʼdeʼ laabe ca lari que. Nelma bidii xquíxepeʼ gunaa que pur cani bisigáʼdebe laa que, ne guníʼ qué zanda diʼ guiaanané bueltu ni bidxela cueʼ pantalón que. Nabé biecheʼ gunaa que ora gúdxibe laa zaqué, purtiʼ bueltu que chiguiquiiñeʼ gunaa que ni para quixe ca binni ni runi xhiiñaʼ. Gunaa que guníʼ sicaríʼ: «Maʼ huaxiéʼ si binni nga nachaʼhuiʼ yanna ne rudxiguetaʼ ni ridxela».

Zándaca chuʼ tu náʼ cadi caquiiñepeʼ gaca binni nachaʼhuiʼ. Peru ca binni ni riuulaʼdxiʼ gusiecheʼ Jiobá la? rúnicaʼ stipa pur gácacaʼ nachaʼhuiʼ (Efesios 4:25, 28). Nelma guníʼ: «Pa naa qué nudxiguetaʼ bueltu que la? qué ñuudxí diʼ xquendabiaaneʼ ne qué ñanda diʼ ñaseʼ».