Ñee cayuuyaʼ Dios lii la?

ÑEE randa ruuyaʼ Jiobá, Dios ni jma nanna guzáʼ guiráʼ xixé cosa la? ¡Randa pue! Biblia cayabi laanu: «Ni bizáʼ guielú binni, ñee qué zanda gúʼyabe la?» (Salmo 94:9). Jiobá zanda guʼyaʼ guiráʼ xixé cosa dede cani qué randa ruuyaʼ binni. Cadi ruuyasibe ximodo laanu, sínuque laaca ruuyabe xi nuu ndaaniʼ ladxidoʼno ne nánnabe ximodo nuuni (Proverbios 17:3; 21:2). Dios zanda ganna xi nuu lu xquendabiaaninu, xi racaláʼdxinu gúninu lu xquendanabáninu ne xi nuu ndaaniʼ ladxidoʼno.

Jiobá nuuca para gacané laanu ora guidxaagalunu guendanagana, ne ricábibe ca oración stinu. Hombre ni bicaa salmo riʼ guníʼ: «Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ. Jiobá nuu gaxha de cani maʼ gucadé ladxidóʼ; ne rulabe cani maʼ biree gana» (Salmo 34:15, 18). Nabé riéchenu nga gánnanu nanna Jiobá ximodo nabáninu ne rucaadiágabe oración ni rúninu de guidubi ladxidoʼno.

Jiobá ruuyaʼ dede cani raca ra nagaʼchiʼ. Dxandíʼ, «ruuya dxichi be irá xixé ni nuu, ne laabe cuidxi be cuenta laanu» (Hebreos 4:13). Dios ruuyaʼ guiráʼ ni rúninu cásica ni jneza zaqueca ni cadi jneza (Proverbios 15:3). Casi lu Génesis 6:8, 9 cayeeteʼ «guluu ndaayaʼ Jiobá Noé» ne laa «guzané Dios ni dxandíʼ». Guyuulaʼdxiʼ Jiobá ni bíʼnibe ne guluu ndaayaʼ laabe purtiʼ bizuubabe diidxaʼ ne yenándabe ca conseju bidii Dios laabe (Génesis 6:22). Bihuinni gadxé Noé de ca binni ni bibaniné que, purtiʼ laacaʼ nabé gudíndecaʼ ne puru guendaquéiquiiñeʼ bíʼnicaʼ. Biiyaʼ Dios guiráʼ ni biʼniʼ ca binni que. «Biiyaʼ Jiobá bidale guendaquéiquiiñeʼ ni cayuni binni ndaaniʼ guidxilayú, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora.» Ngue runi, binitilube ca binni malu que, peru Noé ne binnilidxi bilabe laacaʼ (Génesis 6:5; 7:23).

Ñee ziuulaʼdxiʼ Jiobá cani cayúniluʼ la? Guié lube «cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani naguixhe guidubi ladxidóʼ ra nuube» (2 Crónicas 16:9). Maʼ qué zandaa zunitilú Jiobá ca binni malu ni nuu ndaaniʼ Guidxilayú riʼ sti biaje ne zulabe cani nachaʼhuiʼ ladxidóʼ (Salmo 37:10, 11).