Riéchenu purtiʼ biʼniʼ ganarbe para chúʼnebe Cristu
LU IZA 1971, dxi maʼ ziné Carey W. Barber cincuenta iza, bicaa ti carta ra bizeeteʼ ximodo biʼniʼ sentir pur cayuni xhiiñaʼ Dios. Laabe bicaabe: «Biaʼ dxi maʼ ziniáʼ de cayuneʼ xhiiñaʼ Jiobá, qué huadxelaʼ sti cosa jma galán que laani. Maʼ binebiaʼyaʼ stale binni ndaaniʼ xquidxi Dios, maʼ biiyaʼ ximodo huayápabe xquídxibe de ca binni malu ni nuu lu guidxilayú stiʼ Binidxabaʼ riʼ. Laaca nannaʼ zanda guneʼ ganar para chuaaniáʼ Cristu Jesús tobi si ne modo rusihuinni Jiobá guendarannaxhii stiʼ la? ribaʼquidxini ne rápani ladxiduáʼ para quixheʼ iqueʼ guneʼ ganar».
Gudiʼdiʼ si xhoopaʼ iza, bíʼchinu Barber, ti xpinni Cristu ni bibí pur espíritu santu, beeda gaca tobi de cani nuu lu Grupu ni Zaniruʼ stiʼ ca Testigu stiʼ Jiobá, ne biaʼ dxi guyuube lade grupu ca gudixhe íquebe guni ganarbe para chúʼnebe Cristu. Qué nusaanabe de ñúnibe ni na Jiobá dede dxi gútibe, domingu 8 stiʼ abril 2007, dxi nápabe 101 iza (1 Corintios 15:57).
Carey Barber gule ndaaniʼ guidxi Inglaterra lu iza 1905 ne guyuunísabe ndaaniʼ guidxi Winnipeg (Canadá) lu iza 1921. Gudiʼdiʼ si chupa iza, laabe ne sti cuachi stibe, Norman, yegacanécabe lu ti dxiiñaʼ ni cayaca Brooklyn (Nueva York). Ca dxi que, xquidxi Dios chiguzulú guni ca libru ni riquiiñeʼ para guireeche ca diidxaʼ nacubi ne galán stiʼ Reinu lu «idubi naca guidxilayú» (Mateo 24:14). Tobi de ca primé dxiiñaʼ biziidiʼ Barber guni nga iquiiñeʼ ti prensa huiiniʼ ne máquina riʼ biʼniʼ imprimir guiʼchiʼ ni yenécabe nezalú ca juez Jma Risaca ni nuu Estados Unidos. Despué bíʼnibe dxiiñaʼ ndaaniʼ oficina ni ruuyaʼ ximodo careeche diidxaʼ, ne biiyabe ximodo biʼniʼ ca neza binni ridagulisaa dxiiñaʼ ne ximodo bireeche diidxaʼ ndaaniʼ guidxi que.
Cumu maʼ biziidibe stale la? bíchinu Barber gunda gucuaa sti dxiiñaʼ ni bidiicabe laa lu iza 1948: chiganna ca neza binni ridagulisaa. Yegánnabe ra guca guendaridagulisaa roʼ ladu riaaziʼ gubidxa stiʼ Estados Unidos ne guyebe ra nuu stale neza binni ridagulisaa ladu que. Guniʼbe ni jma guyuuláʼdxibe nga gucheechebe diidxaʼ laga cayeʼbe bi gaʼndaʼ. Dxiiñaʼ ni gucuaabe que gucaneni laabe gunibiaʼbe stale xpinni Cristu. Nabé gúcabe listu ne bicheechebe diidxaʼ ne stale gana ne ngue gucané laabe para gunda guyebe Scuela de Galaad stiʼ Watchtower, clase 26. Lu scuela que bidxaagabe ti baʼdudxaapaʼ láʼ Sydney Lee Brewer de Canadá. Biluxe si scuela que bichaganácabe, ne qué nireenebe xheelabe nizácabe, sínuque bireecabe de Nueva York ne guyécabe Chicago (Illinois), ra yegánnacabe ca neza binni ridagulisaa de lugar que. Nabé gucané bizánanu Sydney xheelaʼ ne guluube gana laa gande iza, biaʼ dxi yegánnacabe ca neza binni ridagulisaa.
Bíchinu Barber guca binnigola ni riganna ca neza binni ridagulisaa, gúcabe binnigola ni riganna ca guendaridagulisaa roʼ ne guyuube treinta iza lade Grupu ni Zaniruʼ. Guiráʼ cani binibiáʼ laabe zietenaláʼdxicaʼ guiráʼ libana stibe ne cani guniʼbe. Cásica laabe, nápanu stale razón para guiéchenenu laabe purtiʼ maʼ biʼniʼ ganarbe ne maʼ nuunebe Cristu guibáʼ.