Ñee gupa Jesús ti Biblia dxi guyuu lu Guidxilayú riʼ la?
COʼ, QUÉ ñápadibe. Xiñee yaʼ. Purtiʼ ca dxi stibe que caʼruʼ chuʼ diʼ Stiidxaʼ Dios casi modo runibiaʼnu ni yanna riʼ. Peru ndaaniʼ ca yuʼduʼ ni guyuu dxiqué, guluu chaahuicabe caadxi rollo, ne despué ni gucuá lu ca rollo que gucuá cani lu Biblia, ni laanu runibiaʼnu yanna. Ñee dxandíʼ guyuu ca rollo que dxiqué la? Guyuu pue, purtiʼ Jesús biindaʼ de rollo stiʼ Isaías dxi guyé ndaaniʼ yuʼduʼ stiʼ Nazaret (Lucas 4:16, 17). Apóstol Pablu bicaadiaga «ni bicaa Moisés ne ni bicaa ca profeta» dxi guyé ndaaniʼ guidxi Antioquía de Pisidia (Hechos 13:14, 15). Ne discípulo Santiagu bicaa «ruunda cabe [ni bicaa Moisés] ra yuʼdu irá dxi enda riziilaʼdxiʼ» (Hechos 15:21).
Ñee gupa tuuxa binni ni bibani lu primé siglu rollo ra cá Stiidxaʼ Dios la? Gupa pue, purtiʼ dxi bidxela Felipe ti hombre biʼniʼ dxiiñaʼ para reina Candace lu neza zécabe Gaza «ziyuunda be ni bicaa profeta Isaías» (Hechos 8:26-30). Xi gudxi apóstol Pablu Timoteu dxi biseendacaabe laa yaʼ. Laabe guniʼbe: ora gueedu dané «ca [rollo] stinneʼ. Ne qué chi usiaandu ca guiʼchi stinneʼ» (2 Timoteo 4:13). Neca Pablu qué niníʼ xii nga ca rollo que, zándaca laacani nga Stiidxaʼ Dios ni gucuá lu diidxaʼ hebreu.
Zándaca ca binni «risaca de Palestina, cani biʼndaʼ stale, caadxi fariseu ne maestru casi Nicodemo», laasicaʼ nga gunda gúpacaʼ rollo ra cá Stiidxaʼ Dios casi na Alan Millard, ti maestru ni biʼndaʼ diidxaʼ ni guníʼ binni ante gueeda Jesús. Xiñee yaʼ. Purtiʼ nabé caru ni. Millard na zándaca «ti copia stiʼ Isaías bisácani de xhoopaʼ a chii denariu» ne ti Biblia ni gucuá lu diidxaʼ hebreu ni napa «quince o gande rollo» bisácani biaʼ runi ganar binni galaa iza.
Lu Biblia cadi cá diʼ pa gupa Jesús o ca discípulo stiʼ rollo ra cá Stiidxaʼ Dios. Peru Jesús binibiáʼ chaahuiʼ ni cá lu ca rollo que dede gunda bizeetebe de laacani ne guniʼbe cani de memoria (Mateo 4:4, 7, 10; 19:4, 5). Ejemplu stibe ca naquiiñeʼ gucaani laanu gánnanu xiná Biblia, jmaruʼ si ca dxi stinu riʼ cadi nagana para gápanu tobi ne cadi cárupeʼ ni.